«Мудорвай» маин таяз паймытӥз?

Котькуд арлэн йылпумъяcькон вакытаз удмурт пиналъёс понна туж чебер но тунсыко вожвылъяськон ортче — «Мудорвай».

Удмурт лулчеберетэз но кылэз дано карыны, утьыны дышетӥсь вожвылъяськон туэ но туж узыресь номеръёсын тодэ кылиз. 

Тодады вайытом, нырысь ик вожвылъяськон нимаз зонаосын ортчиз — Ципья, Ӟаны, Покчи Лӧзя гуртъёсын. Нош толлэн нырысетӥ нуналаз — 1 декабре — вожвылъяськонлэн зональной этапез ортчиз Балтась ёросысь лулчеберетъя юртын. Татын номеръёссэс эшшо но рос-просгес учкыса, эскерыса, нылпиос Казаньын ортчись гала-концертэ пыриськон понна нюръяськизы. 

Котькуд адями понна нылпиослэсь выступлениоссэ туж секыт бырйыны. Озьы ке но, ёросын пуктэм жюри «покчи артистъёс» шоры сак учкизы. Азьланяз соослы ёросмылэсь данзэ утёно, соин мултэс мылкыдъёсты палэнтыны кулэ луиз.

34 номеръёс пӧлысь жюри быръёз тужгес но чеберзэ, паймымонзэ. 

Кивалтӥсьёслы бадӟым тау шуэммы потэ сыӵе аспӧртэмлыко номеръёс дасямзы понна, нош нылпиослы туж бадӟым тау шуиськом дӥсьтэмзы но удмурт лулчеберетэз утемзы понна!