«Огыр -бугыр» яке Анай кыллэн нуналэзлы сӥзем ужрад

Туэ, 6-11 классъёсты огазеяса, ортчытӥмы аспӧртэмлыко шудон.  Шудонмы удмурт кыллэн пӧртэм удысъёсызлы сӥземын вал: визькылъёс но крезьгуръёс, гожъясьёс но дано адямиос, шаертодон но мукет. Шумпотымон, 6 классын дышетскисьёс вормизы. Озьы ик (та нуналлы сӥзьыса) 10 классын дышетскисьёсын пыриським улоскуспо квест-шудонэ «Жингырты, удмурт кылы!». Та шудон 5 этапъёслэсь кылдэмын (1 этап — визитка, 2 этап — удмурт кыл сярысь кылбур гожтон, 3 этап — «Канва» программаен удмурт книгалы реклама лэсьтон, 4 этап — «Облако из слов» амалэн литературной геройёслэн нимъёсынызы кылсуред лэсьтон, 5 этап — ZOOM платформаын ортчытӥськись йыртӥян). Квест-шудонэз кылдытӥзы Агрыз ёросысь Сарсак-Омга лицейысь удмурт кылъя дышетӥсьёс. (Соослы юрттэ Удмуртиысь, Алнаш ёросысь Вуж Шудья инъетъёзо (ООШ) школаысь удмурт кылъя но литературая дышетӥсь али «Алнаш колхозник» газетлэн валтӥсь редакторез, Евдокимова Ирина Михайловна). Малпасько, та шудон пиналъёслы кельшиз шуыса. Нылпиослы гинэ ӧвӧл, дышетӥсьёслы но. Интернет-шудонъёс дышето пӧртэм туала выль амалъёслы. Мыным туж тунсыко потӥз кылбур гожтон, реклама кылдытон но нимъёсын суредо пилем малпан. Малпасько, азьланяз но улонлэсь бере ум кыле, туала улонлэн ӧраз пырыса, азинлыко ужалом. Анай-атайёс, пиналъёс гинэ удмурт кылэз медаз вунэтэ. Удмуртлык мед бызёз вирамы, мед йыгалоз сюлмамы, мед  вераськытоз калыкмес, вуоно пиналъёсмес.

Наталия Антонова,

Покчи Лӧзя огъядышетон шоръёзо школаысь удмурт кылъя но литературая дышетӥсь