Ожгарчиосмы понна сюлэммес сётӥськом! (4-тӥ люкет)

Малпасько, таиз люкет самой шуныт но небыт мылкыдъёсын тырмемын. Пуштросэзъя ик валамон: татын нылпиос ожгарчиосмылы сюлэм шунытсэс келяло, ӝоген доразы бертыны сӥзёнъёс ысто.

Ёросысь школаосын «Ожгарчилы гожтэт» проектэ котькуд дышетскись пыриськиз. Огшоры пусъет понна гинэ ӧвӧл, куддыр гожтэтъёс зэмзэ ик мур малпаськытӥсь пуштросэн но быдэ вуэм адямилэн кадь малпанъёсын тырмемын луо. Ожгарчиос понна но соос туж кулэ луизы. «Дорысь нылпилэн шунытэз вуиз кадь», шуылӥзы. Синкылиосын тырмем ымныръёссэс учкыса, валамон луиз: воргорон семьяез доры дыртэ, мӧзме вордскем интыезлэсь. Нылпилэн киыныз гожтэм чуръёс ожгарчилэн сюлмаз шунытэн интыяськизы.

Та ужын азьпал радын сылэ Ципья шоръёзо школа но. Дышетскисьёс валало, мар со сыӵе ожлуд, малы атайёс но агайёс синкылизэс ватыса нош ик сюрес вылэ пото.

— Асьме ёросысь котькуд школа кадь ик, милям школамы но кужымезъя асьме ожгарчиосмылы но утисьёсмылы юрттэт сётыны тырше. Нылпиос мыло-кыдо пырисько гожтэт гожтонэ, гуманитарной юрттэт сётонэ, маскировочной сеть лэсьтонэ. Милям дышетскисьёсмы туж трос гожтэт гожъязы, открыткаос но лэсьтылӥзы. Та ужын шӧдскымон вал покчи классъёсысь нылпиос. Куддыр отын трос янгышъёс вал ке но, туж шумпотымон, кыӵе соослэн бадӟымесь сюлэмъёссы, кыӵе соос сюлмасько. Юнме сыӵе чидатэк уг возьмало ини гожтэтъёсты ожгарчиосмы! Вань сыӵе классъёс, кытын анай-атайёс коньдон люкан но радъязы. Кыӵе ке классын трос гинэ гуманитарной юрттэт люказы. Адӟем карымон луэ мобилизаци улсы шедем дышетскисьлэн семьяезлы юрттон. Со 2Б класс, кивалтӥсез — Оксана Степанова. Та классын вань пияш, кудӥзлэн атаез нимысьтыз ожгар операцие пыриське. Анай-атайёс но нылпиос сӥзьыл урожай октыны, нош толалтэ гидкуазьзэ лымылэсь сузяны юрттӥзы. Сыӵе бадӟым юрттэт сётӥзы соос ӵош дышетскись эшезлэн семьяезлы. Со сяна, трос гинэ коробка гуманитарной юрттэтэн лэземын.

Тау карисько ды-шетӥсьёслы но анай-атайёслы тыршемзы понна, кудъёсыз юрттэт но радъяны, нылпиоссэс но уже кыскыны быгато, палэнэ уг кылё. Уг яра дугдыны, юрттонэз одно ик азьланьтоно. Ведь асьмеос ваньмы вормонэз но тынӥсь улонэз возьмаськом, — малпанъёссэ шараяз школалэн визьноданъя директорезлэн воштӥсез Нина Давлекова.

Та веранъёс вань ёросысь школаослы но тупамонэсь. Нимысьтыз школаын ик нылпи дышетске юрттыны, сюлмаськыны но ӟеч ужъёс лэсьтыны. Та пумысен, дышетӥсьёслы но визьнодасьёслы бадӟым тау шуыны кулэ. Нош анай-атайёс пыкет луизы ке, та эшшо но бадӟым пайдаё уж луэ. Огкылысь нылпиос, дышетӥсьёс но анай-атайёс улонэз ӟеч пала берыктозы. Со ик вань школалэн валтӥсь ужез — нылпиез зэмос адями карон!

Ӵошен луыны дыртэ

Ар ӵоже асьмеос трос гинэ пӧртэм ӧнерлыко яке календарной праздникъёсын пумиськиськом. Соосты ваньзэ бадӟым масштабен пусйиськом, сиён-юон дасяськом, куноосты ӧтчаськом. Но соос пӧлысь зэмзэ но кулэ луись нуналъёсты куддыр висъяны ум быгатӥське.

Туннэ нуналлы гуманитарной юрттэт сётон — самой валтӥсь но дуно уж. Со трос кужым кулэ уг кары, со понна мылкыдэз но ӝутэ, калыкез но огазея. Малы тае шуг-секытъёс вуэм бере гинэ тодамы вайиськом меда? Валэктонэ ӧвӧл, тӥ но уд быгатэ соку ик ответ сётыны.

Дыртэлэ адямилыко луыны! Дыртэлэ огазеяськыны но пайдаё уж лэсьтыны. Лэсьтэм ужъёсты азьпал улонлы инъет луыса мед кылёзы но нылпиостылы данъяськымон пример мед луозы!

Туспуктэм Ципья школалэн мерлыко бамысьтыз басьтэмын