Хезмәт

Пинал дыр уг вуны

Редакцилэсь: Пор-Кутеш гуртысь Елизавета Никифоровна Самаева трос тодӥсь-валась адями луэм. Гожъяськон устолыкез сярысь но арлыдо поколение трос ушъян кылъёс вералоз шуыса малпаськом.

Ас дыраз «Азьлане» газетмылэн со одӥгез матысь эшез луэм, кема аръёс ӵоже лыдӟисьёсты тунсыко гожъямъёсыныз шумпоттэм. Сыӵе гожъямъёс, аръёс ортчыса но, ас кулэлыксэс но чеберлыксэс уг ышто угось. Туннэ ми тӥледлы Лиза апайлэсь 1990-тӥ арын «Кенеш» журналын потэм статьязэ лыдӟыны ӵектӥськом. Сётӥськом сое воштытэк. Соин туннэ нуналлы тупасьтэм куд-ог фактъёс, янгышъёс шедёзы, малы ке шуоно 30 ар куспын трос ву кошкемын ини, верам адямиослэн но куд-огез табере пӧламы ӧвӧл ни, дыр, яке улон интызы воштӥськемын. Сое лыдэ басьтыны куриськом.

Пинал дыр уг вуны

«Ортчем улон — бызись ву», — озьы верало калыкын. Бен, ӵапак бызись ву кадь со — улон, одӥг нуналдэ но, минуттэ но берен берыктыны уг луы ни. 50-60 аресэ вуыку, йырсиосыд пурысьтаны кутскыку ортчем улон сярысь малпаны кутскиськод. Тӥни соку сайкатскем кадь луиськод, улон сюрестэ син азяд пуктӥськод. Адямиос понна кулэ мурт луи-а мон? Кыӵе мынам улонэ, нылпиосме ӟеч будэтыны быгатӥ-а? Мӧйыосты ‡оже ӧй уськыты-а? Лыдъяд ке, та улонын ортчем нюжаос вераса быдтонтэм ук. Мӧйымемъя-а, мар-а таӵе малпан вуылэ: нуналъёс кызьы ке но калленгес мед ортчысалзы вылэм.

Паймымон дыр вуиз ук. Ву бызён ӧръёсты но воштыло ни, кулэ ке луиз, гурезьёсты но тэгызато ни, нош ортчись аръёсты дугдытыны амал уг шедьто на.

Туж кемаласен кылдэм малпанъёсме гожтыны киям ручка кутӥ. Кылчинэ-а, мар-а ялан маза уг сёты, юа кадь: гожтыны малпад бере, малы уд гожтӥськы, малы ваньзэ ик ас сюлэм пушкад гинэ ватыса возиськод?

Ураметӥ сумка кутыса школае вамышъясь пиналъёсты адӟемелы быдэ тодам уськытӥсько пинал дырмес. Милям, 1930-32 аръёсы вордскемъёслэн, школае ветлон дырмы туж секыт дырлы кемдӥз-учыраз. Со дыр сярысь верад ке, туала пиналъёс уз но оске, дыр. Нош со ваньмыз озьы вал. Мон гинэ ӧвӧл, со дыре улэм но дышетскем, али ини пенсие потэм мӧйыос но ваньзэ сое туж ӟеч тодо на.

... Тани ураметӥ пиналъёс вамышъяло. Котькудзылэн я киязы, я тыбыр сьӧразы дэралэсь вурем сумка. Таин гинэ уг тырмы. Малы ке кык пис пу нуо на. Одӥгез кӧс, мукетыз ыль. Школаын кезьыт луэ вал, соин ик гурез эстон понна дорысьтымы пу нуллыса дышетскимы. Со писэз нуыкуз огезлэн дышетскисьлэн кияз шырпу мертчиськем. Ой, бӧрдӥз со соку, школаысь ик кошконо луиз. Со но тӥни нокызьы уг вуны.

Пор Кутешын со дыре дышетӥзы Полина Степановна (фамилизэ вунэтӥ), берлогес — Татьяна Васильевна Васильева. Ньылетӥ классэ Шор Кушкетэ ветлӥм. Отысь дышетӥсе Александра Фёдоровна Шляпкина (Эшкеева) али улэп на. Ципья гуртын улэ. Туж яратӥськом вал ми сое. Нош туннэ нуналмес верано ке, солэн нылыз Галина Алексеевна дышетэ Шор Кушкетысь школаын, покчи пиелэсь Володялэсь Пётр пизэ дышетэ ини.

Ньылетӥ класс бере но дышетсконо ук. Табереяз Вуж Кушкетэ ветлоно. Со тужгес но секыт вал. Пыдамы кут, школае вуытозь со суч-суч котме. Но классъёсын кезьыт, кутъёсмы пыд бордын гинэ куасьмо ик, вылды. Бертыкумы ни весяк сямен бызиськомы, каллен вамышъяд ке, кынмод. Дӥсь но со порма гинэ. Кӧт сюман сярысь веранэз ик ӧвӧл. Куд-огъёсыз сыӵе секытъёслы ӧз чидалэ, дышетсконзэс куштӥзы. Сизьыметӥ класс бере Ципьяын дышетсконо, нош со понна ӟуч классэз быдтоно. Милемды, удмурт классын дышетскемъёсты, Ципьяын выльысь сизьыметӥ классэ пуктӥзы. Уг тодӥськы, маин сэрен озьы каризы. Тӥни соин Ципья сюресэз ньыль ар ӵоже лёгано луиськиз.

Милям-а, пе, пыдъёс табере уз виселэ? Автобусъёс но мукет машинаос ӧй вал. Али кадь интернатъёсты но ӧм адӟылэ. Котькуд дышетскись кыӵе ке мурт дорын патерын улӥз. Мон Марья ӵужанае дорын улӥ. Отчы ик бигер пи но интыяськиз, Салихов Ильгиз. Солэн атаез колхоз председатель вал, ӵужанаелы ӧжыт ке но пызь но вайылӥз. Пархода гуртысь вал со. Туннэ кадь ик тодам Ильгизэн нюлэскы ветлэммы. Со кыз йылэ тубыса чаг пуртэн кӧс улвайзэ кора. Кытӥ ке ӧвӧл дорамы караулчи (лесник) вуиз. Ильгиз писпу йылысь васькиз, кыкнамылэн ик синкылиосмы тани-тани шурен ӧръяськозы. Ӧз жаля ке? Салазкимес талаз ке? Мар карод на? Ӵужанаймы доры кызьы возьматскод на? Киямы тӥрмы ӧвӧлысь, лэся, вожзэ сокем ӧз потты. «Давай дӥняды бертэ. Татысь медам адӟылы ни», — шуиз но лэзиз. Шумпотыса э-э! ширтӥськом ук. Ялан мышкамы учкылӥськом: сьӧрамы гинэ медам уиськы.

Текстэз пыр-поч «Азьлане» газетлэн 23 номерысьтыз лыдӟыны быгатӥськоды.


Елизавета Самаева

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: