Пиштӥсь удмурт «Кизили»

Со дыр куспын куинь сю витьтонлэсь уно номеръёсыз потэмын ни, огъя тиражез одӥг но ӝыны миллион экземплярозь вуиз. Нош кӧня адями сое лыдӟиз, нокин вераны уз быгаты. Кылбуръёс, веросъёс, выжыкылъёс, сценкаос, кырӟанъёс, шудонъёс, йыртӥянъёс, суредъёс, иллюстрациос – ваньзы соос нылпиослэн сюлэмъёссы но йырвизьзы пыр потэмын но улоназы кыӵе ке пытьыос кельтӥзы.
Журналмылэсь нырысетӥ аръёсаз потэм номеръёссэ лыдӟисьёс табере анай-атайёс, нош куд-огъёсыз песянай-песятай луэмын ни. Пӧлазы вань тодмо но дано дышетӥсьёс, писательёс, журналистъёс, суредасьёс, артистъёс… Журналмы уг персьмы, ялан егит. Солы сыӵе возиськыны пинал лыдӟисьёсмы но юртто, озьы ик пиналъёс понна гожъясь, суредась бадӟымъёс но «Кизили»-лы пичи дырысь кошкыны уг лэзё.
Туэ «Кизили» журналмы 2175 экземплярен потэ. Нош лыдӟисьёсмы солэсь кык-куинь поллы уногес шуыса малпаськом. Журналмес тужгес но трос басьто Завьял (340 экземпляр), Пичи Пурга (336), Вавож (226 ), Шаркан (200), Алнаш (170) ёросъёсын. Отысь лыдӟисьёсмы пӧлысь уноез журналмылы редакция пыр гожтӥськемын. Соин ик «Кизили»-лы гожтӥськонэз радъясьёслы, журнал номеръёсмес нуллӥсьёслы бадӟым тау кареммы потэ. Соос пӧлын: дышетӥсьёс, руноын но ёрос газетъёслэн редакциосазы ужасьёс, библиотекарьёс, визьнодасьёс…
Татарстанын туэ «Кизили» журналмес 92 адями басьтэ. Тужгес но трос гожтӥськисьёсмы Агрыз ёросын – 49 адями, Кукмор ёросын – 29, Бавлы ёросын – 1. Тӥляд Балтаси ёросады та вакытэ 13 адями басьтэ журналмес. Милям малпаммыя, та лыдпус бадӟымгес луыны быгатысал. Куд-ог школаосады «Кизили»-лы гожтӥськемъёс воксё ӧвӧл. Отысь пиналъёс журналэнымы эшъяськыны уг дырто. Соос кӧня тунсыко веросъёсты, выжыкылъёсты, кылбуръёсты лыдӟытэк, чебересь суредъёсты, иллюстрациосты адӟытэк, малпаськытӥсь шудонъёсын, йыртӥянъёсын, кроссвордъёсын тодматскытэк кылё. Табере журналмылы почта пыр гожтӥськыны луэ. Быдэс арлы но подписка карыны луонлык кылдытэмын.
Редакцимы журналмылэн вуоно арын потоно номеръёсыз сярысь малпаське ни. Лыдӟисьёсмес чебересь, мур пуштросо ужъёсын шумпоттыны сюлмаськом. Пиналъёслы выль конкурсъёс, викторинаос луозы. Одӥгез конкурсмы сӥземын журналмылэн кылдэмез дырысен 35 ар тырмонэзлы. «Кизили»-е пӧртэм темая тунсыко произведениос, суредъёс ыстыса, лыдӟисьёсмы журналмылы усто кузьым лэсьтозы. Кин «Кизили» журналэз матысь эшен лыдъя, со конкурсамы одно ик пыриськыны кулэ. Устоосыз ужъёс журнал бамъёсын печатласькозы. Вормисьёсты грамотаосын, кузьымъёсын пусъёмы.
«Анай кыл» викторинамы, огдышем сямъя, тулыспал толэзе (феврале) потоз. Туэ но сыӵе ӵошатсконмы вал. Отчы ог 80 пиналъёс пыриськизы. Тӥ палась пиналъёс ужъёссэс ӧз ыстэ.
Лыдӟисьёсмы табере журналэ печатлам кырӟанъёсты, суредъёсты QR кодъя интернет пыр кылзыны но учкыны быгатозы. Вуоно арын журналамы удмурт мультфильмъёсты но сётылом.
Вылез ар понна журналмылы гожтӥськон мынэ ни. Редакция пыр гожтӥськон дун быдэс арлы 200 манет усе. Почта ёзэтъёсын ПР908, ПА666 (быдэс арлы) индексъёсъя подписка лэсьтыны быгатоды.

Фото: https://pixabay.com/