Поръёс быгато!

Салкын, зоро нунал луиз ке но, ӝыт шутэтскон интые трос гинэ калык люкаськиз.

Балтась ёрос трос йӧскалыко луэменыз висъяське. Бигер, ӟуч, удмурт, крашин калык праздникъёслы вань адями дышемын ке но, поръёслэн шулдыръяськонзы сокем ик вӧлмемын ӧвӧл, (та валамон но, асьме ёросын поръёс одӥг гуртын гинэ уло — Улисьялын. Уло эшлыко, кузьыли муӵын кадь ужъёссэс но, шулдыръяськонъёссэс но, шуг-секытъёссэс но ӵошен вормо). Озьы ке но, ваньзы тодо задор пор эктонъёсты, кудъёсыз сюлмез бугырто но весяклы синмаськыто.

Зэмзэ вераса, туэ аслым но нырысетӥзэ пор празднике вуыны кылдӥз. Нырысь ик калыклэн туж трос луэмез паймытӥз. Нокыӵе мерлыко сетьёсын та ужрад сярысь ивортэмын ӧй вал ке но, калык пӧртэм интыосысь вуэм вал. Кезьыт тӧл но адямиослэсь шулдыръяськон мылкыдзэс ӧз сӥяты. 

Пор кырӟанъёсын калыкез шулдыртӥзы Володя Матвеев, Саша Иванов, Никита Козлов, Эльвира Токташева. Кӧня ке кырӟанъёс удмурт кылысь но берыктэмын вал, соин удмуртъёс но асьсэ тодмо гуръёссы улсын эктыны но шулдыръяськыны быгатӥзы. 

— Улисьял гурт Кугунур гурт поселение пыре. Та поселение самой трос йӧскалыкъем шуысал. Со сяна, Улисьял гуртын гинэ самой трос поръёс уло, соин данъяськисько татын улӥсь калыкен, кызьы соос шулдыръяськыны быгато, кызьы вань ужъёсты валче быдэсто, кызьы ас калыксылэсь чеберзэ возьматыны быгато. Та ваньмыз одӥг гурт пушкын улэ. Соос уг тыршо висъяськыны, соос каллен уло асьсэлэсь улонзэс, ог-огзылы юртто, татын сокем бадӟым ченгешонъёс но уг кылдо, соос мушъёс выллем валче тыршо умой улон понна. Мон понна та туж бадӟым показатель. Соослы нырысь ик бадӟым оскон кылдэ, вань сётэм ужъёсты дыраз лэсьто. Тани туннэ но гурт калык ваньзэ ачиз радъяз, магазинъёсты ӧтчазы, шудонъёс дасязы, артистъёсты мылысь-кыдысь пумитазы. Та понна интыысь калыклы бадӟым тау шуисько, нимысьтыз ик Виктор но Лада Фёдоровъёслэсь семьязэс пусйысал, соос котькуд ужрадэз пыр-поч дасяло, вань семьяен тыршо, — ивортӥз Кугунур гурт поселенилэн главаез Руслан Егоров.

Праздникын пор калык дӥськутэн потэмъёс но адскизы. Та эшшо но чебертӥз ӝытэз. Артистъёслэн кырӟамзы улсын соос огъя круге люкаськыса эктӥзы но кырӟазы. Со дыре ик мукет площадкаосын шудонъёс мынӥзы. Пиналъёс понна батутъёс пуктэмын вал, пӧртэм ческыт сиёнъёс вузазы. 

Огъя вераса, пор калык мылысь-кыдысь шутэтскыны быгатэ, тае эшшо одӥг пол соос возьматӥзы. Асьсэ сям-йылолъёссэс улӟытыса, кырӟанъёссэс вӧлмытыса, соос лулчеберетсэс утё, мукет калыкъёс пӧлын азинто. Мед луоз озьы азьланяз но, вань калыкъёс ог-огзэс гажаса но валаса мед улозы!