Праздниклы сӥзьыса

Та ужрадэз ортчытонэ пыриськизы Ципья шоръёзо школаын дышетскись пиналъёс. Соос, асьсэлэсь анайёссэс но гуртысь нылкышноосты ӟечкыласа, огез бӧрсьы мукетсэ тунсыкоесь, мылкыдэз ӝутӥсь номеръёссэс ӵектӥзы. Залын пукисьёс, соослэсь котькуд выступленизэс шуныт мылкыдын пумитаса, сцена вылысь кужмо кичабконъёсын келяллязы. Жаляса верано, калык туж ик трос ӧй вал.

Концертэз усьтӥзы покчи классъёсын дышетскисьёс анайёссылы сӥзьыса лыдӟем кылбуръёсынызы. Озьы ик соос быдэстӥзы на «Барбарики» эктонэз но пӧртэм кырӟанъёсты, крезьгур инструментъёсын шудӥзы. Нош бадӟым классъёсын дышетскись нылъёс паймытӥзы асьсэлэн жингрес кырӟанъёсынызы, ӟырдыт эктонъёсынызы. Пусъеме потэ, эктонъёс пӧртэмесь вал шуыса: удмурт, бигер, ӟуч, туала. Котькудзэ соос туж капчиен быдэстӥзы. Ӝытэз эшшо но шулдыргес карыса, сцена вылэ потӥзы на егит мызганчиосмы. Нош дышетскись егит пиослэн пыриськеменызы быдэстэм эктонъёс, кырӟанъёс, мызган улсын кырӟамзы - вераса ик быдтымон ӧвӧл. Шумпоттӥзы ик соос гурт калыкез! Озьы ик гуртысь «Инвожо» нимо самодеятельной коллектив но быдэстӥз аслэсьтыз «Тулкым» кырӟанзэ. Огъя вераса, туж быгатыса дасямын вал та концерт.