Шурысь ву но дун-чылкыт луэ

Священной Писание асьмелы вера, макем зол Ин Атай яратӥз дуннеез. Сьӧлыко адямиосты, улонэз утён понна, Со курадӟыны сётӥз, кулонэ ыстӥз одӥг гинэ Пизэ. Мынам тодам лыктэ одӥг офицер сярысь лыдӟеме. Война дыръя пиосмурт быронэ озьы ик ыстӥз аслэсьтыз пизэ. Эшъёсыз юазы: малы тон аслэсьтыд пидэ отчы лэзид, тодӥд ук, со уз берытскы. Офицер шуиз: бен, мон тодӥ, солдат быроз шуыса, соин ик ас нылпиме отчы лэзи, нош мурт анай-атайлэсь пизэс кулыны ыстыны ӧй быгаты.

Та учыр возьматэ: пиосмурт Ин Атай сямен мукетъёссэ утён понна быронэ келяз ас пизэ. Со сётӥз самой дунозэ - нылпиезлэсь улонзэ. Евангелиын гожтэмын: самой бадӟым яратон, тон улондэ сётыны дась ке матысь адямиосыд понна. Но улондэ сётон - со одно ик кулон, бырон ӧвӧл. Нырысь ик со аслэсьтыд улондэ мукетызлы сӥзён, матысьёсыдлы юрттон, котырысь адямиослы капчигес мед луоз шуыса. Ёрмись муртлы дӥськутэн, коньдонэн юрттон, сютэм муртлы сиён сётон, кайгырись, бӧрдӥсь адямилы ӟеч кыл веран. †апак сыӵе яратонэн улӥзы нырысетӥ христианъёс. Пӧлазы ӧй вал узыръёс но начаръёс, малы ке шуоно байёс, асьсэлэсь узырлыксэс вузаса, коньдонзэс вайылӥзы апостолъёслы, соос ини люкылӥзы ёрмисьёслы.

Туала вакытэ сыӵезэ уд пумита ни. Тани Россиысь огаз монастыре игумен секыт висись муртэ пыртӥз. Та адямилэн улон интыез вылымтэ. Но пиосмурт бурмыса вуымтэ, игумен ӧвӧл дыръя сое монастырьысь улляллям. Кыдёке ик кошкымтэ пиосмурт, шугмем. «Скорой» вуыса, висись муртэ больницае нуиллям. Врачъёс пиосмуртэз эмъяллям но выль паспорт лэсьтыны сюлмаськиллям. Али та адями православной приютын улэ.

Жаляса верано, котькуд учыр таӵе ӟеч уг йылпумъяськы. 2012-тӥ арын тол кезьытъёсы Ижысь огаз коркалэн сигаз вить бомжъёс кынмыса кулӥзы. Туннэ нуналлы шоркарамы одӥг инты но ӧвӧл, кытын улон сэрегтэк кылем, кураськись адямиос толэз потыны, уез ортчытыны быгатозы. Таӵеез ӧй вал кышкыт но сютэм война аръёсы но. Али адямиез, кин понна Ин Эксэй улонзэ сётӥз, уг дунъяло, уг жаляло, уг юртто. Зоопаркысь пӧйшурез вылӥегес пуктӥськом, утялтӥськом.

Соин ик та бадӟым праздник азьын калыклы шуэм потэ: шонер улэ, ӟеч ужъёс лэсьтэ. Кыӵе валэктон сётоды тӥ Ин Эксэйлы асьтэлэн улэмды сярысь? Али дун-чылкыт нуналъёс мыно. Адямиос 40 нунал кӧсутемзы бере куноостӥ ветло, ог-огзэс ӟечкылало. Ымусьтон азьын сямен ик Йӧвылэсултон азьын но одӥг нуналзэ зол визяно. Крещение азьын сочельник дыръя, 18-тӥ толшоре, куд-ог адямиос номыр уг сиё. Нош 19-тӥ январе, кезьытъёс шоры учкытэк, Иисус Христослы оскись калык киросэн мынэ ошмесъёс, люкмесъёс доры Ин Эксэй ву пыр быдэс дуннеез вӧся. 19-тӥ-27-тӥ толшоре быдэс музъемысь ву дун-чылкыт луэ. Кык сюрс арлэсь кема ини Йӧвылэсултон дыръя басьтэм вуэз быдэс ар адямиос корказы возё, котькуд ӵукна сютэм вылазы юо, молитва лыдӟыса. Та вуэз одно ик бекчеосын, ведраосын возёно ӧвӧл. Тӥ сое быгатӥськоды ошмес вуэн сураны.

Пусйыны кулэ на тани мае. 19-тӥ толшоре одно ик люкмесэ мыноно, вуэ зымылоно ӧвӧл. Куд-огез калык пӧлын донгаськыса, керетыса, вуэ зыме но кынмонтэм вылысь курытсэ ӟузе. Сыӵе выремлэн пайдаез ӧвӧл. Тӥ, сюлмысь вӧсяськыса, черкысь дун-чылкыт ву басьтӥды яке котькыӵе ошмесысь омыртӥды ке, со сыӵе ик святой луоз, малы ке шуоно та нуналъёсы со котькытын чылкыт луэ. Йӧвылэсултон дыръя Ин Эксэймы вуэз сыӵе чылкыт каре, та сярысь тодытэ Иордан шур.

Иордан бызе Израильысь удобрениосын тырмытэм бусыос-лудъёс вискытӥ. Израильысь врачъёс пусъё: Иордан вуын 20-лэсь уно кышкыт микробъёс уяло. Озьы ке но ортчем кык даур куспын та шурысь ву нокинэ но ӧз виы, ӧз черлаты на. Эмъясьёсты со паймытэ. Нош Израильысь баӵкоос соослы пумит шуо: ми та шурысь вуэз микробъёссэ утчаны ум омыртӥське, Ин Эксэйлэсь сётэм благодатьсэ озьы басьтӥськом. Мынам но дорам Иордан шурысь ваем дун-чылкыт ву утиське, солы укмыс ар ини, но вулэн тусыз но, шӧмыз но азьвыл кадь ик чылкыт но ческыт.