«Сюрес усьтӥське мынӥсьлы…» (1 люкет)

Берпуметӥ гырлы куара — вань дышетскисьёс понна туж кема витем праздник. 1-тӥ классын та вакыт тон понна туж кыдёкын адске, нош шӧдыса ик уд вуттӥськы — тон выпускникъёс радын сылӥськод ни. Дыр туж ӝог ортче, ву кадь бызе, нош школа борддоръёсын ортчем аръёс весяклы син азе кылё, пинал вакытъёс яркыт туспуктэмъёс кадь тодэ лыкто. Со ик вань улонлэн нырысетӥ тодэ ваёнъёсыз. Нырысетӥ яркыт вакытъёс, нырысетӥ синмаськон, йыртэманъёс, шумпотонъёс но синкылиос, яратоно дышетӥсьёсын люкиськон, ваньмыз туж мӧзмыт шӧдӥське. Но азяд усьтӥсько эшшо но паськытэсь сюресъёс... 
Вань выпускникъёс понна али туж ӟырдыт вакыт вуиз: берпуметӥ гырлы праздниклы, экзаменъёслы, кельшымон ӧнеръя дышетскон интые пырыны дасяськон. Ма борды басьтӥськыны паймоно. 

Ципья шоръёзо школаын туэ 10 выпускникъёс. Классэн кивалтӥсьсы — Алина Ивановна Григорьева — англи кылъя дышетӥсь. 

Куинь удмурт нылкышноос асьсэлэсь нылпиоссэс туж кылкутымон вамыше вуттӥзы. Арысен аре нылпиослы кыкетӥ анай луыса, ас нылпизэс кадь яратыса, вань кылдэм ужпумъёссэс радъяса, куке но кышкась комокъёс луыса лыктэм пиналъёс быдэ вуэм егитъёслы пӧрмизы, кудъёсыз кыл куто быдэс школа понна.

Выпускникъёслэсь малпанъёссэс, сюлмаськонъёссэс шонергес валаны соосын вераськыса гинэ тодыны луэ. Паймымон кадь, соос туж шаплы но мыло-кыдо валэктонъёс сётӥзы, вань веранъёссы быдэ вуэм адямиослэн кадь лад-лад радъямын, мур валэктэмын.
Азьло ик тодматӥсько тӥледыз Ципья шоръёзо школаысь активисткалэн — Ольга Кузнецовалэн (1 туспуктэмын сьӧр радысь паллянысен кыкетӥез) — малпанъёсыныз. Ёросысь пӧртэм ужрадъёсы пыриськись но соосты радъясь нылаш туж трос тыршиз школалэсь улонзэ чебертыны но аспӧртэмлыко карыны.

— Зэмзэ вераса, школаен люкиськон туж мӧзмыт, 11 ар ӵоже татын дышетским ук! Ваньмы семья кадь луимы вал ини: школаысь но одӥг классын дышетскисьёс но, дышетӥсьёс но, ужасьёс но. Та аре таӵе атмосфера эшшо но золгес шӧдӥськиз. Одӥг классын дышетскем эшъёсын гинэ матынгес ӧм луэ, мукет классъёсысь дышетскисьёсын но матынъяським. Озьы кылдӥз, ӵошен форумъёсы, олимпиадаосы, пӧртэм вожвылъяськонъёсы, ӵошатсконъёсы ветлӥм, школаын ужрадъёс радъямы. Ваньмыз та туж матын кариз милемыз. Татын туж бадӟым тау шуыны кулэ «Нырысетӥослэн движенизылы». Школаысь берпуметӥ нуналъёс сярысь верано ке, туж секыт но ӝож мылкыдъёс кылдо. Озьы ке но, мылкыдэз куашкатыны ум дыртӥське, эшшо но золгес яркыт тусъёс пыртӥськом. Кылсярысь, ми пӧртэм тунсыко нуналъёс радъямы: одӥгаз ваньмы рюкзакъёс интые пакетъёсын лыктӥм, мукетаз тапочкаосын но пӧртэм носкиосын, нош туннэ (вераськонмы 20 куартолэзе вал — ред.) Пионерилэн нуналэзлы сӥзьыса, ваньмы пионерской галстукъёсын лыктӥм. Та ваньмыз экзаменъёслэсь кышканэз быдтыны но кыйгыронэз палэнтыны юрттӥз. 

— Кызьы ортчо экзаменъёслы дасяськонъёсыд но кыӵе сӥзёнъёсыд дышетскисьёслы, кудъёсыз али тон кадь ик экзаменъёслы дасясько?

— Экзаменъёс пумысен верано ке, татын йыры ик берга... Тодон-валанъёс дырен-дырен вуно (11 ар ӵоже туж трос информация люкаськиз), пумтэм паранойя, экзаменъёсты ум сётэ шуыса кышкан но мукетэз, но ми умоезлы оскиськом, пуктэм ужпуммес быдэстыны тыршиськом. Вань выпускникъёслы интыын сылытэк азьлань мыныны сӥзисько, выль тодон-валанъёс басьтыны, соткалы (100 баллы — ред.) тыршыны но пырыны отчы, кытчы сюлэмед ӧте.