«Сюрес усьтӥське мынӥсьлы…» (3 люкет)

Берпуметӥ гырлы куара — вань дышетскисьёс понна туж кема витем праздник.

Покчи Лӧзя шоръёзо школаын 6 кузя дышетскисьёс школаез йылпумъяло, кивалтэ соосын — Наталия Михайловна Артемьева — математикая дышетӥсь.

Покчи Лӧзя школаысь Дарья Артемьева (3 туспуктэмын сьӧр радысь паллянысен нырысетӥез) дышетскон вакытаз бадӟым «кизили» луыса ӝуатскиз. Пӧртэм ёрос, элькун, улоскуспо вожвылъяськонъёсын, олимпиадаосын, конференциосын со одно ик азьпал радын сылӥз. 

— Кыӵе луиз тынад дышетскон сюресэд но кыӵе мылкыдэн вуиськод берпуметӥ школа нуналъёсы?

— 11 дышетскон аръёс туж ӝог но шӧдскымон чаль ортчизы. Та аръёс ӵоже трос умоез вал но кӧня ке начарез но луылӥз, но ӧй вал сыӵе нунал, кудӥз тодэ ваёнъёстэк кылиз. Самой яркыт примеръёс — со школьной дискотекаос но походъёс, куке ваньзы умой вакытъёслы куано но шутэтско, дорысь ужъёс, контрольнойёс но проектъёс сярысь малпанъёс ӧвӧл. Нош али, куке экзаменъёс дырозь туж ӧжыт дыр кылемын но школа борддоръёсын дышетскон пумаз вуэмын, туж трос тулкымъяськонъёс но кышкыт малпанъёс кылдо, озьы ик туж ӝож мылкыдъёс сюлэмез басьто, ведь табере ноку но уз берытске ни школаын ортчытэм ӵыдонтэм дыръёс.

— Огъя вань выпускникъёслы мылкыдъёстэ вера вал.

— Выпускникъёслы ваньзылы сӥзисько, одно ик вань экзаменъёсты вылӥ баллъёслы сётыны, пырыны сыӵе дышетскон интые, кудӥз льӧль малпанъёсын улӥз но ӟучъёс верамъя, «мечты имеют свойство сбываться». Та веранэз котьку тодады возьыны кулэ.
Гажано выпускникъёс! Берпуметӥ гырлы куара — улонлэн одӥг люкетэз гинэ. Сыӵе ужрадъёс улонады трос гинэ луозы на. Тӥ понна валтӥсез — улонысь зэмос адямиос луыны но калык понна пайдаё ужъёс лэсьтыны. Азяды — паськытэсь сюресъёс, ӵыдонтэм вормонъёс но дыраз кылдӥсь могӟетъёс. Соос тӥледыз кыдато но улонысь эскеронъёслы дасяло. Лэсьтэ асьтэлэсь вамышъёстэс, янгышъёстэс, соостэк зэмос улонэз валаны уг луы. Ваньмыз капчи мед ортчоз, калык верамъя «тылытэк но гонтэк», дуно пиналъёс!