Шудо семьялэн инъетъёсыз но секретъёсыз

Асьме шаерамы Президентмылэн Указэзъя 2024 ар Семьялэн ареныз ялэмын. Элькунамы но ёросамы, семьяосты сӥлы карыса, трос гинэ ужрадъёс радъясько но ортчо. 

Семья — со мерлыкез ӝутонын самой кулэ луись люкетэз.

Котькуд семья кунмылэн улоназ нимысьтыз инты басьтэ. Ведь макем адями тыр мылкыдо улэ семьяяз, сокем трос пайдаёзэ но кулэ луисьсэ со лэсьтыны быгатэ шаер понна но.
Юанды но кылдыны быгатэ: малы Ижкарын улӥсьёсын вераськон ортчиз? Малы ёросысь семьяосын уг тодматӥськы? Эн дыртэ, текстэз лыдӟиды ке, ваньмыз валамон луоз. 
Туала технологиослэн азинскеменызы, сюрс иськемъёсты но матын карыны луэ. Соин адямиен герӟаськыны-вераськыны но шугъяськонъёс уг кылдо. Ижкарын улӥсь семьяен но мерлыко сетьёс пыр герӟаськи. Зэмзэ вераса, Аверьянэз но Кристинаез пичи дыръёсысен тодӥсько ни. Аверьян Вуж Кушкет гуртын вордӥськиз но будӥз, Кристина — Балтась каргуртысь, но трос гинэ дырзэ анаезлэн вордскем гуртаз — Вуж Кушкетын — ортчытӥз. Озьы ик кылдӥз егитъёс вискын небыт но шуныт кусыпъёс. Собере сюан, нылпи вордскон, мукет элькунэ выжон но ас «пузкарзэс» радъян... 

Та егит но зэмос удмурт семьяен тодматыны, калык азе поттыны тупась учыр но шедиз. Семьялэн арезлы сӥзьыса, кыӵе семьяез меда гожтоно, кинэн меда вераськоно шуыса кылдэм юанъёсты сэрттон-пертчон вакытэ ик шуак кылдӥз йырам соослэн узыр но егит семьязы. Аверьян но Кристина асьме элькунамы уг уло ке но, соос асьме, Татарстанысь удмуртъёслэсь, лулчеберетмес, сям-йылолъёсмес азинто, нылпиоссылы но соосты вордскем дырысенызы ик пыӵатыны тыршо. Егит арлыдзы шоры учкытэк, соослэн улон шоры учконзы но азьланез сярысь малпанъёссы зэмзэ ик паймыто.

Кристина — «энерджайзер» шуи ке, сое тодӥсь тросэз мурт таин соглаш луоз, малпасько. Со котькытчы вутскыны тырше, котькуд ужрадэ пыриське, али театральной кружокъёсы но ветлэ, шуг-секытъёслы уг ӝожтӥськы. Вакчи дыр куспын висъяськыны кутскиз, «Мынам Удмуртие» телеканалын но ӝуатскиз. Ваньмыз та солэсь тыршемзэ возьматэ. Кристина — аслыз ачиз оскись, кужмо сямо, юн мылкыдо егит нылкышно, соин ас вылаз кылкутымон бадӟым ужъёсты но басьтыны уг кышка, ас кужымезлы оске но азяз пуктэм ужпумъёсты быдэстэ. Ваньмыз та улонэ выжыны, оло, ӧй но быгатысал, дыр, но кузпалэзлэн юрттэменыз, соослэн вань ужъёссы пӧрмо.

Котькуд семья — со нимысьтыз шормуӵ кадь, кытын пӧртэм мылкыдъёс пӧзё. Вунэтоно ӧвӧл, куке тон семьяын, тон ачид понна гинэ кыл уд кутӥськы, тон табере одӥг бадӟым кыллэн люкетэз. Нош кыӵе мылкыдъёс пӧзё трос нылпиё егит семьяын, ойдолэ, эскеромы ӵошен.

— Кристина, тодматы вал милемыз семьяеныд. Кызьы тыныд кышно статусэн улыны но кызьы тӥ Ижкаре вуиды?

— Шумпотыса тодмато бадӟым семьяеным. Милям егит семьяямы 5 адями улэ: кузпалэ — Аверьян, мон но милям куинь муспотон нылъёсмы. Бадӟымез нылмы — Есения, шоретӥез — Евангелина, покчиез — Агата. (Кыӵе та семьяын аспӧртэмлыко но тунсыко нимъёс, паймымон кадь — Ю.Щ.). Мынам яратон сюресэ но историе Вуж Кушкет гурт клубысен кутскиз. Со дыре кузпалэ гуртысь фольклор коллективе пыриське вал. Нырысь пумиськонамы ик со мыным чебер, юрттыны дась но визьмо адямиен адскиз, туннэ нуналозь но сое сыӵеен лыдъясько. Улон инты сярысь верано ке, мынам кемалась Ижевскын улэме потэ ни вал. Туж вожъяськисько вал татын улӥсьёслы но дышетскисьёслы... Татын ӵыжы-выжыосы но уло: кык ӵужапайёсы но соослэн семьяоссы. Соос доры лыктыку, котьку верасько вал: «Будӥ ке, мон одно ик татчы улыны интыясько». Туннэ нуналэ улонмы каньыл, ас радызъя мынэ, сяськаяське но ӝужа. Пичи кельшымон шыпыт город, кытын мон асме вуысь чорыген ӵошатӥсько. Татын эшъёсы но трос ини, котькуд праздникъёсы огазе люкаськиськом, аспӧртэмлыко «диаспора» кылдӥз шуыны луэ.

— Тӥляд куинь нылъёсты, пичи дырысеныд ик астэ трос нылпиё анаен адӟид-а? Нылъёсыд сямъёсынызы висъясько-а?

— Нылпиосты мон туж яратӥсько, но куинь нылпие луоз шуыса ноку ӧй малпа. Кыӵе ке льӧль малпанъёсам гинэ котьку син азям одӥг пи пуктӥсько вал. Но Инмарлэн аслаз учконъёсыз, нылъёсы мыным ватсам кужым сёто, анай луыны дышето, небыт но шуныт мылкыдъёс кузьмало. Куинь нылъёс — куинез но пӧртэмесь. Есения ужзэ пумозяз быдэстыны, ас малпанъёссэ улонэ пыӵытыны тыршись нылаш. Евангелина адями азьын туж шаплы, кышкасьтэм адӟиське, нош улонын со туж шӧдӥсь, ненег сюлэмо ныл, мукетъёс понна сюлмаське, ма, тани кутъёслэсь гинэ но кышка. Нош куинетӥез ини воксё мукет. Есения но Евангелина ог-огенызы маин ке огкадь луо ке, Агата соослэсь трослы висъяське. Интыяз пукыны уг тоды, ваньмыз солы тунсыко, ваньмыз борды вутсконо. Малпасько, дыр ортчемъя, со но воштӥськоз, улон дуннеен «тодматскыны» али гинэ кутске на ук. Но ваньзы ӵошен шаянъясько, экто, шулдыръясько. Милемлы со самой валтӥсез, куке нылпиос ог-огзэс валаса, ог-огзылы пыкет луыса будо. Оскиськом, азьланяз но кусыпъёссы юн герӟет кадь луозы но ялан ог-огзылы юрттыса улозы шуыса.

— Бадӟымез нылэд Есения мыло-кыдо пӧртэм удмурт лулчеберетэн герӟаськем вожвылъяськонъёсы пыриськыны кутскиз. Пичиоссэ но сыӵе ик сюрес возьма-а? 

— Ваньмыз кутскиз, куке Есения чагыр экран пыр пичи пиналъёслэсь сцена вылын кырӟамзэс-эктэмзэс адӟиз. Соку со ачиз мылкыд кариз удмурт кырӟан кырӟаны. Паймымон, кырӟанлэсь кылъёссэ но туж чаль дышетскиз. Евангелина но Агата сярысь верано ке, соос но бадӟым апайзы сьӧры кыстӥсько, кыӵе ке движениоссэ быдэстыны тыршо. 

Мылкыдзы луиз ке кырӟаны яке эктыны, мон котьку дась соослы юрттыны. Но кужмысь отчы уг кыскы, асьсэлэн быръёнзы медло. Вань медонъёсазы одно ик соослы пыкет луыны тыршо. Мон — анай, та кылэ пыкет но юрттон гинэ уг пыры, куддыръя пиналлы эш но луыны кулэ. Ас пуш малпанъёссэс кытын ке палэнын медаз кисьтэ, доре бертыса, монэным мед кенешозы, тунсыкъяськозы. Сыӵе анай луыны тыршисько. Кузпалэ но ас примерез вылын возьматэ, кыӵе атай-пиосмурт луыны кулэ. Нылъёслы пичи дырысенызы ик возьматоно, кыӵе кусыпъёс луыны кулэ пиосмуртлэн но нылкышнолэн. Макем юн ныл шӧдэ атаезлэсь яратонзэ, сокем азьпалан но улоназ сыӵе ик яратон луоз. Нылъёс но улоназы шонер быръён лэсьтозы шуыса юн оскисько.

Верано ке удмурт лулчеберет сярысь, татын но валэктон капчиен шедьтыны луэ. Мон — удмурт нылмурт но таин туж данъяськисько! Нылъёсы но ас кылзэс, сям-йылолъёссэс мед дунъялозы кадь потэ, ваньмыз анай-атаен герӟаськемын со. Кызьы соос вордскем кылзэс, сям-йылолъёссэс утё, азинто, озьы ик нылпиос но кыстӥсько вашкалазэ утьыны. Но али пусйыны быгатӥськом ини: куке удмурт кырӟанъёсты лэзиськод, нылъёс соку ик мукет комнатаысь потыса эктыны, кырӟаны кутско, та туж дуно мон понна.

— Кин юрттэ тыныд нылъёсыныд? Кузпалэныд ужъёстэс люкиськоды-а?

— Песяй-бабайёсмы Татарстанын уло бере, нылъёсыз будэтон ваньмыз милям пельпумъёсамы усе. Ӝожтӥськыса вераны уг быгатӥськы, асьмелэн нылпиосмы ук, вань секытъёсты ортчыны дась. Ми асьмеос но пинал бере, янгышъёс вылын дышетскиськом, огазе вормонъёсмылы шумпотӥськом. Татын пусйыны кулэ, кузпалэ мыным уг юртты, со — будэтэ! «Юрттыны» но «будэтыны» кылъёс вискын туж бадӟым пӧртэмлык, малпасько. Кузпалэ ас атай ужъёсызлэсь ноку уг куштӥськы. Нылъёс понна атай — со бадӟым адями но кыл, яратоно атай но шудонъёсын оскымон юлтош. Нылпи будэтонын кузпаллэн юрттэтэз туж кулэ луэ, ӟуч сямен вераса «мужское плечо» нылпиослы туж бадӟым кужым сётэ. Нылъёс пичи на, соин вань секытъёсты кузпалэным валче ортчиськом. Нош нылъёс милемлы юрттыны тыршо, одӥг аресъем Агата но пылесосить карыны, радъяськыны юрттэ. Малпасько, бадӟым апайёсызлэсь адӟем каре.

— Кыӵе тӥляд семьяяды валтӥсь девизды но кыӵе дунлыкъёсты?

— Татын трос малпаськоно уг луы. Семьямылэн девизэз: адями шудо соку, куке со шудо семьяяз. Мынам песянае вера: «Куке адями шудо, солэн семьяяз но, ужаз но ваньмыз умой».
Кристиналэн та кылъёсыз зэмзэ но туж мур пуштросо луо. Адями быдэс улоназ семьяез понна тырше, солэн валтӥсь ужъёсыз но малпанъёсыз ваньмыз семьяен герӟаськемын. Вань лушкем малпанъёсыз но матысь адямиосызлы сӥземын. 

— Мар сӥзьысалыд тон котькуд семьялы Семьялэн араз?

— Семья — со туж бадӟым уж. Дунне вылысь вань адямилэн мед луоз семьяез. Нош семьяын кӧня адями, соиз котькудӥз понна аслыз медло. Мед отын луоз кык, куинь, сизьым, валтӥсез — семья пушкын яратон, гажан но ог-огдэ валан мед пушъёз. Вӧзын котьку матысь но яратоно адямиосты мед луозы. Ведь со ик вань семья!

— Вераськемед понна бадӟым тау, Кристина! Семьяяды котьку яратон, ог-огдэс валан мед луоз, нош нылпиосты тӥлесьтыд умойзэ но шонерзэ гинэ басьтыса мед будозы!
Кристиналэн кылъёсыз арлыдоослэн кадь туж малпаськытӥсь но азьпалан семья кылдытӥсьёс понна «ӝӧквыл» книгаысь веранъёс кадь луо. Соос вылэ пыкиськыса, зэмзэ но шудо семья кылдытыны луэ шуыса оскисько. Егит семья кылдытэ аслэсьтыз дуннезэ, соос ваньзэ лэсьто ӵошен, «гопо-нюко» улон сюреслэсь люкетъёссэ но огазе ортчыто. Та ик вань зэмос семья!