Сяськаос будӥсь фермаын

Малы Нуринерын шуэм юанлы конкурслы йылпумъян лэсьтон праздникын районлэн главаезлэн Рамиль Нутфуллинлэн выступленияз ответ шедиз. «Кызыл юл» хозяйствоын пудо вордон шӧдскымон азинскем. Татын кивалтӥсь специалистъёсын кельшыса-валаса, азьпала учкыса ужа. Новатор кивалтӥсь но специалистъёс шуэм малпанэз конкурсэз усьтыку аслаз выступленияз районысь гурт хозяйствоя но сиён-юонъя управленилэн начальникез Фирдавес Набиуллин но верам вал. Конкурсэ асьсэлэсь скал кыскисьёссэс но пудоосты искусственной амалэн бызьылытонъя технологъёссэс ваем валтӥсь зоотехникъёс но «Кызыл юлысь» азинсконзэс адӟыса синмаськыса сылӥзы. Озьы гинэ но ӧвӧл, скал кыскисьёс но технологъёс теоретической но практической тодонъёссэс возьматыкузы соос хозяйствоысь ужъёсын тодматскыса, асьсэлы опыт люкаса но ветлӥзы. Нырысь ик пудо сиён дасянлэн югдуреныз, пудоослы сиёнэз кызьы сюдэменызы тунсыкъяськизы. Фураж изӥсь «Экструдер» дорын, сенаж траншеяын, трос аръем турын бусыын, Чутай, Комзавод фермаосын луизы. Пичи Комзавод гуртын та аръёсы нош кык гид лэсьтыса мес кунянъёслэсь лыдзэс 1000 йырлы вуттыны чакламзэс тодэмзы бере, паймизы. Нуринер фермаын берло одӥг-кык аре луэм азинскон но троссэ паймытӥз. Табере хозяйство нунал потэм кылем арын та нуналлэсь 3 тонналы йӧлэз тросгес вуза. Нуринер фермалэн одӥг-кык ар талэсь азьло гинэ вань поттэм йӧлэз мында ук та! Синмаськод но, дышетскод но татын. Кыӵе хозяйствоын ферма азе сяська мерттэм клумбаос вань?! Кивалтӥсьсы инициатива возьматэм.

Специалистъёс, пудо утисьёс ужам Нуринерын гинэ ӧвӧл, Чутайын но, Комзавод фермаын но чылкытлык, порядок.

Конкурс ортчытон понна но котькыӵе условиос кылдытӥллям. Скал кыскись операторъёслэсь 34-тӥ, пудоосты искусственной амалэн бызьылытонъя технологъёслэсь 10-тӥ районной конкурссылэсь традиционной флагзэ фермалэн чылкыт, чебер сяськаё гидъёс дорысь интыын ӝутӥзы. Та торжественной ужрадэз «Соснаысь» скал кыскись Гульназ Сафинаен «Татарстанысь» технолог Раушан Калимуллин быдэстӥзы. Ӵошатсконъёс 4-5 интыын туж организованно мынӥзы. Нош вормисьёслы кузьымъёсты Нуринерын Сабантуй ортчытон майданын дасям тыр ӝӧкен праздникын, муниципальной районлэн главаез Рамиль Нутфуллин сётъяз. Скал кыскисьёс пӧлын нырысетӥ интые самой трос балл люкам «Кызыл юл» хозяйствоысь Гулюса Галимуллина потӥз. Кыкетӥ-куинетӥ интыосын таӵе конкурсъёсы пыриськыса кӧня ке пол призо интыосты басьтэм Чулпан Габделахатоваен («Яна тормыш») Резеда Хайруллина («Татарстан»).

Берло аръёсы «Бурнак» хозяйствоын кунян басьтон шӧдскымон умояз. Та пудоосты искусственной амалэн бызьылытонъя технолог Ильфак Фаляхетдиновлэн ужезлэн но бервылыз. Со конкурсын самой трос балл люкаса технологъёс пӧлын нырысетӥ интые потӥз. «Кызыл юлысь» Гульнара Низамиева - кыкетӥ, «Камаысь» Гульназ Гараева куинетӥ интыын. Сэрттыса-пертчыса учкид ке, та хозяйствоосын но скалъёслэн сервис дырзы вакчи, муры кылён учыръёс ӧжыт, кунянъёс трос вордско. Районлэн кивалтӥсез «Кызыл юл» хозяйство понна нимысьтыз шумпотон ивор но ваем вал. «Кызыл юллэн» валтӥсь зоотехникез Гульзифа Назипова Татарстан Республикаысь Гурт хозяйствоя но сиён-юонъя министерстволэн Данъян грамотаеныз, нош Нуринер фермалэн заведующиез Василя Мухамметзянова министрлэн Таукарон гожтэтэныз пусъемын.

Сяме пыремъя, праздникын самой егит но самой мӧйы ужасьёсты но сӥё-дано каризы. «Унышысь» Лилия Тухватуллина ужан сюрессэ али кутскем, «Алгаысь» Рамзия Гиматова бадӟым опытэн мӧйы скал кыскись, «Яна тормышысь» Равиль Багаветдинов - мӧйы, Тимирязев нимо хозяйствоысь Булат Габделхаков егит специалист луыса кузьымен пусйиськизы.

Нуринерысь но районысь культурая центрысь самодеятельной коллективъёслэсь выступлениоссэс учкыса, шутэтскыса, ини вуныны кутскем таӵе пумиськонъёс туж кулэ вылэм шуыса кошкизы пудо утисьёс. Озьы ук.