Сырья гуртын «Чемпионат мира» ортчиз (фоторепортаж)

40x50 квадрат метръем стадион — со ӵыж-выль (малы ке но вань кадь юбоос гожмаськемын) вож буям кенерен котыртэтын мини-футболэн, волейболэн шудон интыос. Сӥльвиръёсыз кыдатон-юнматон турникъёс, брусъёс, нылпиослы ӟечыранъёс, корт гурезьёс, кенер кузя котыр бызьылон инты, пуксьыса-шутэтскыса пукыны ӟусъёс вань. Одӥг кылын вераса — нылпиос понна гинэ ӧвӧл, быдэс гурт калык понна туж кулэ маке! Толэн-гужемен шудон-шутэтскон интыё луимы! Таӵе шудмылэсь быдӟалазэ шӧдон-валан понна, ортчем улонмес учконо. Сырья нылпиослы гуртын шудон инты ӧй вал шуи ке но, уг янгыша, дыр. Футбол шудӥсь нылпиосыз уллямы школа-сад азбарысь, гуртлэсь палэнэ — Сук нюке - мыныса шудыкузы, юри возьзэ гыризы, озьыгес ик уллязы Вукогурт пал гурт пумысь бусыын шудыкузы но, мултэс луизы нылпиос-егитъёс «Горд гурезьын»...

Бен, та быдӟа кузьым инмысь ик ӧз усьы... Гурт калыклэн ас кисыысьтыз коньдон чотын лэсьтэмын, но... одӥгньыльмос люкетэз гинэ! Куинь ньыльмос люкетэз лэсьтэмын Республика чотын! Тау со понна Президентмылы Рустам Нургалиевич Миннихановлы! (мукет улосъёсын таӵеез ӧвӧл). Стадионэз лэсьтонэ кутӥськем 570 сюрс манет — кылем арын но туэ люкам вытэз 4-лы унояса потэм уксё со.

Самообложение выт сярысь турлы кылъёс кылыны тупа сое люкасьёслы: «Городын улӥсьёс сое уг тӧляло ук, озьы ке но отын стадионъёс но вань, нылпиослы шудон интыос — кыӵеез гинэ но ӧвӧл, сюресъёссы но корказы вуытозь — шальыен, тӧдьы сюен но мыжык быдӟа изэн ӧвӧл, тэгыз-вольыт асфальт вӧлдэмын. Маин кулэс гурт калык городын улӥсьлэсь» Выт люканлы таӵе малпанъёсын пумитъяськисьёслы пумит мон кыл вераны уг шедьтӥськы. Туж жаль, туннэ нуналэ Россия — со Эмират ӧвӧл. Та пумысен лыдӟисьлы аслыз визьзэ сынаны-кушаны кельтӥсько сётэм юанлы валэктон шедьтон пумысен: «Улонмы Эмиратын кадь майбыр мед луоз шуыса МАР КАРОНО?»

Эмират улонэн ум улӥське бере, таизлы но (самообложение чотын лэсьтӥськем стадионлы. Самообложение налог ӧй ке луысал, гурт калыклэн вӧтаз но ӧй пырысал ук со.) вань кадь нылпиослэн, егитъёслэн, гурт калыклэн нимыныз тау карисько:

— Ципья гурт поселенилэн Главаезлы Азат Газизуллович Нотфуллинлы но соин валче ужасьёслы — лэсьтӥськон ужъёсты кулэезъя радъямез понна!

— Ципья МПП «Заря» ЖКХ-лэн директорезлы Марат Тагирович Кадимовлы но стадионэз лэсьтонэ пыриськем ужасьёсызлы!

— «Труд» колхоз-эштослэн директорезлы Рашид Хафизович Хадиевлы, футбол шудӥсьёслэсь, учкисьёслэсь сюлэмзэс шунтӥсь нянез-сылалэз, чаез понна!

— Азьвыл нуналаз субботнике пыриськемъёслы но футболъя «Чемпионатэ» люкаськем калыкез но салкым куазез пӧсь чаен шунтӥсь вань эшъёслы!

— Ӟаны гуртысь Терентьев Юрий Васильевичлы нимысьтыз тау кылъёс асьсэос курисько стадионлы нэгыз лэсьтэмез понна! Сокем сюлме кельшымон лэсьтыны быгатӥз. Молодец!

Инстаграме арня азьвыл сётэм ялонмы калыкез паймытӥз-абдратӥз ик. Сырья гуртын футбол шудонъя «Чемпионат мира» сярысь ивор ӝог вӧлмиз. Жаль, коронавирус чер алямен сэрен, киысь кие кӧчымаськылӥсь зарни кубок понна нюръяськонэ пыриськиз 4 команда гинэ. «Сырья-2» (14-17 аресъем пиос) «Чемпионатэ» пыриськемзы сярысь грамотаен пусйиськизы.

«Сырья-1» (18-30 аресъем пиос), 4 очко люкаса, бронза медален пусйиськизы.

«Ципья» (18-30 аресъем пиос), 6 очко люкаса, азвесь медальёс басьтӥзы.

Зарни медальёс но киысь кие кӧчымаськись зарни кубокез басьтӥзы «Улисьял» командаысь 18-30 аресъем пиос.

Шудонлэн йылпумъянъёсызъя «Тужгес устоез нападающей» дано ним сётэмын Кирилл Фёдоровлы (Улисьял).

«Тужгес устоез защитник» луиз Ципьяысь Вадим Абрамов. «Тужгес устоез вратарь» нимен пусйиськиз Роман Максютов (Улисьял). 

Шудонэ пыриськем вань кадь футболистъёслы сюлмысь тау кылме верасько стадион усьтонэз зэмос праздниклы пӧрмытэмзы понна! Оскисько, азьланяз стадион котырысь калыкез ас бордаз кыскоз, егитъёсты но калыкез но ЗОЖ-тазалыко улонэн эшъяськытоз!

Субботникын но, шудонъёс мыныку но омыр ачиз шыпыртылӥз: тэгыз-вольыт йӧ вылтӥ конькиен ветлӥсьёс сярысь, хоккей клюшкаослэн ваче чупаськылэмзы-шуккиськылэмзы кылӥськылӥз, пеймыт куазен котыраз юбоосын югыт тылъёс ворекъязы... Ваньмыз асьме киын! Валче тупаса уломе, эшъёс!

Сырья завклуб но староста Леонид Сапожников