Хезмәт

"Та фермаын кема ужасько ини, куамын арлы матэ", — Елена Петрова

«Сурнайысь» Елена Львовна Петрова но адӟем карымон ужасьёслэн одӥгез луэ. Нялтас вераса, туэ Азьмынӥсьёслэн слётазы но пыриськиз со, тужгес умой скал кыскисьёслэн одӥгез луиз. Скалъёсын ужам опытэз солэн бадӟым.

Ми лыктыку, Елена Львовналэн кысык ужан дырыз вал. Скалъёслы «Журналистъёс лыктӥзы» шуыса вераны, ужез кельтыны уг луы ведь. Соин скалъёс дорын вераськыны тупаз. «Тани таиз скал мусояськыны туж яратэ, ку гинэ со доры эн султы, весь йырзэ мычыса яратэмез вите, со вӧзтӥ ортчыны но уг луы — син шорад учкыса, дораз лыктэмез, яратэмез вите», — шуэ серекъяса скал кыскись, ми дорын сылӥсь одӥг скал шоры возьматыса. «Тӥледыз яратэ бере, тӥ но сое яратӥськоды, дыр», — шуисько. «Кызьы уд яраты? Соос ваньзы но мынам скалъёсы ук. Ветыл дырысенызы мон соосын ужасько ини, соин аслам шуыса учкисько котькудӥз шоры», — ответ сётэ Елена Львовна. Куспамы таӵе диалог кылдэм бере, соку ик валамон луиз ни: таиз скал кыскись но аслэсьтыз ужзэ туж яратэ.

Елена Львовна но Ярак-Чурма гуртын вордскемын. Егит дырысеныз ужаны яратэм, соин 1990-тӥ аръёсы, школазэ йылпумъямез бере ик, со «Алга» колхозэ кӧня ке толэзь ӵоже парсьёсты сюдыны интыяськем. Со арын ик Гондыргуртэ картлы кошкем. Туннэ нуналэ ужа Улын Ушмаысь фермаын, нош уло соос семьяенызы Бадӟым Лӧзя 1-тӥ люкет гуртын. 

— Егит дыръя Ярак-Чурма гуртын но парсь сюдыны вутски, отысен ини Покчи Лӧзяысь лесничествое ужаны кошкимы кузпалэнымы ӵош. Кузпалэ, Николай Александрович, тракторен ужаз, нош мон ящикъёс лэсьтӥ. Отын 1992-тӥ арозь ужамы. 1994-тӥ арысен ини татын скал кыскись луыса ужасько, — ужан сюресэз сярысь вера Елена Львовна.

Кузпалэнызы кыкназы соос кема аръёс ӵоже ини «Сурнай» обществолэн радъёсазы тыршо. Елена Львовна скалъёсты кыске, кузпалыз дуриськись луыса ужам (табере дано шутэтсконэ потэм ини).

— Та фермаын кема ужасько ини, куамын арлы матэ. Уже аслым туж кельше. Кельшымтэ ужын адямилы ужаны секыт ведь, нош куке уждэ яратыса быдэстӥськод, дыр но туж ӝог ортче кадь. Пудоез мон котьку матын кари. Соин но школаез йылпумъяме бере ик фермаын ужаны кутски. Дорамы но пудо вордӥськомы, колхозын ужаса кызьы пудо уд ворды ни, — шуэ нылкышно.

Ужан интыез сярысь Елена Львовна ушъяса гинэ вераз. Кивалтэтэз йӧно, кулэ луыку юрттэт кизэс мычыны дась вылэм. Коллектив но, пе, умой, ог-огзылы юрттыса ужало. Елена Львовналэн верамезъя, солы ужаны пыремез бере нырысь ужлы дышыны гинэ секыт луэм, собере каллен-каллен ваньмыз ас интыяз султэм. «Капчиез — ӝӧк вылын шуо ук, озьы ик вань. Мыным но нырысь секыт вал. Ваньмыз ужамъя лыктэ. Али но туж капчи шуэме уг луы, но дышем бере, нокыӵе уг поты. Скалъёсме но туж яратӥсько. Ветыл дырысенызы дышетэм бере, мон соос понна кыл кутэмме шӧдӥсько, матын карыса учкисько.  Соос но монэ ярато, тодмало. Шумпотӥсько, яратоно ужын тыршыны быгатӥсько шуыса. Ужын ке каньыл, семьяын но ваньмыз ӟеч луэ», — шуэ Елена Львовна.

Петровъёслэн кык пизы но одӥг нылзы вань. Юрий пизы, анай-атаез кадь ик, гурт удысын тырше, со «Дуслык» обществоын машина нуллӥсь луыса ужа. Ас семьяеныз Кисальын улэ. Андрей пизы вӧзазы, Наталья нылзы Уржумын дышетске. Елена Львовна но Николай Александрович ужзы ласянь но ушъямон, семьязы но соослэн умой. Нылпиоссылы, кык внукъёссылы шумпотыса уло соос. Та соос понна тужгес бадӟым шуд.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: