Ципья школаын мастер-класс ортчиз

Ципья шоръёзо школаын, Удмурт кыллэн нуналэзлы сӥзьыса, удмурт кылъя но литературая дышетӥсь Ираида Анатольевна Чернова 7В классын дышетскись пиналъёсын дэмдор (оберег) лэсьтонъя мастер-класс ортчытэм.

«Та классын ваньмыз шуымон удмуртъёс, 17 ӵошен соос, кӧняез ке суро семьяысь, — шуэ Ираида Анатольевна. — Мастер-классын азьло удмурт пужыос сярысь вераськимы. Пиналъёс тодӥзы, удмурт пужыослэн котькудӥзлэн аслаз нимыз вань но со инкуазен, котырысь улонэн герӟаськемын шуыса. Син азязы пуктон понна, доска вылэ суредъёсты, удмурт символикаез юнматӥ. Ӵапак со удмурт символикаысь ми уже кутӥмы «толэзь» шуыса нимаськись пужыез, солэн мукет нимыз — кизили. Соин лэсьтэм арберимес но «Шудо кизили» шуыса нимамы. Дэмдор-талисманэз лэсьтон понна пӧртэм материал кутӥмы: буёло кагаз, картон, фетр. Мастер-классмы Анайлэн нуналэз азьын ортчиз бере, та арберимы анайёсты шумпоттыны умой кузьым луиз шуыса йылпумъян лэсьтӥмы».

Ираида Анатольевналэн верамезъя, пӧртэм мугъёсын сэрен Удмурт кыллэн нуналэзлы туэ бадӟым ужрад ортчытыны пӧрмымтэ. Но, кылдэм ке, туэ толсур толэзе Ципья школаын ортчыны кулэ этнофестиваль. Соин табере та этнофестивалез бадӟымгес ужрад карыса ортчытыны малпало. Вераны кулэ, та Ципья школаын ортчоно нырысетӥез сыӵе фестиваль. Со этнокласслэн грант утэмезлы йылпумъян лэсьтон выллем луоз.