Удмуртъёс – ваньмы одӥг семья (+фоторепортаж)

Татчы ӧтемын вал огазеяськонлэн азьветлӥсьёсыз, Удмурт шаерысь вылӥ кивалтӥсьёс, ёрос тӧроос. Ваньмыз ог 500 мурт. Ӧтем куноос пӧлын палэнысь удмуртъёс но вал. Озьы ужрадэ мыло-кыдо пыриськизы Коми но Марий Эл Элькунъёсысь, Пермь но Киров улосвылъёсысь, Башкортостанысь но асьме Татарстанысь делегатъёс. Мазэ веранэз, Санкт-Петербургысь гинэ но делегат вал. Балтась ёросысен та ужрадэ пыриськыны шуд усиз куинь муртлы: Л.Д.Сапожниковлы (Балтась удмуртъёслэн «Кенеш» НКА-зылэн тӧроез), Н.Л.Антоновалы (ёросысь удмурт кылъя дышетӥсьёслэн огазеяськонзылэн кивалтӥсез) но О.Ю.Плотниковалы (район газетлэн валтӥсь редакторезлэн воштӥсез). Вераны кулэ, ужрад туж быгатыса радъямын вал. Таин валче тау шуыны кулэ «Удмурт Кенеш» огазеяськонлэн тӧроезлы Татьяна Витальевна Ишматовалы. Ужрадлэсь вылӥ уровеньын ортчемзэ юнматӥз Удмурт Элькунлэн Тӧроезлэн Александр Соловьёвлэн пыриськемез но. Люкаськон шуныт, чебер кылъёслы, ӟечкыланъёслы но сӥзёнъёслы туж узыр вал. Огазеяськонлэн кылдон вакытаз сылэм дано адямиосты, азьветлӥсьёсты тодэ вайизы, Данъян грамотаосын, гадьпусъёсын но синпель кузьымъёсын пусйизы.. Юбилей ужрад азьын «Удмурт Кенеш» огазеяськон удмуртлыкез ӝутӥсьёс пӧлын «25 муртъёс - удмуртлыкез азинтӥсьёс» акция ялэм вал. Ӵапак сыӵе адямиос ванен удмурт калыклэн сям-йылолъёсыз, лулчеберетэз, удмуртлыкмы утиське шуыны кулэ. Тӥни озьы удмурт театрын ужрад дыръя сцена вылын сӥлы каризы удмуртлык понна сюлмаськись 25 адямиез. Шумпотымон, соос пӧлын асьме ёросысь удмуртъёслэн азьветлӥсьсы Леонид Сапожников но вал шуыса. Со «Удмурт Кенеш»-лэн Таукарон гожтэтэныз пусйиськиз.