Хезмәт

Улонысь эскеронъёс

Витетӥ классын дышетскисько вал. Толалтэ милям семьяямы бадӟым событие луиз. Школаез йылпумъяса, нырысь бригадирлэн юрттӥсез, собере кунян сюдӥсь, скал кыскись луыса ужась апаймы картлы бызиз. Кырсимылэн колхоз валэз кыткыса, агаен кыкнамесыз, анаез сюанэ нуэмез туннэ кадь тодын.

Апаен улыны кутскемзылэн нырысетӥ нуналъёсаз ик кырсимылэсь, солэн анаезлэсь но ӵыжы-выжыосызлэсь ӟечлыксэс, шуныт учкемзэс шӧдӥмы. Туклячи амбарын охранник вал, нош кырсимы гурт коркаосы, хозяйственной юртъёсы тыл сётӥсь электростанциын ужаз. Милесьтым юрттэтлы кулэяськыса улэммес лыдэ басьтыса (атаймы егитысен шудтэм учыре шедьыса кулэ), апаен кырси лэсьтыса вуттымтэ коркамес вуттон, картофка мерттон, октон, нюлэс коран выллем секыт ужъёсын котьку юрттыса улӥзы. Ачиз пичи дырзэ атайтэк, бадӟым эскеронъёс пыр потыса, тэльмыронъёс адӟыса ортчытэм Радиф кырсимы кальмес валам, дыр, ини...
Атайзы жугиськонэ кошкыку, апаезлы - 4, кырсимылы 2 арес гинэ луэ. Кема но уг ортчы, анайзылы, Махизямал апайлы, секыт ивор вуэ: «Картты Нафик Садыков странамы понна мынэм ожъёсын батырлыко быриз...»
Анай мурт вань кужымзэ люкаса, нылпиоссэ сӧл-таза будэтон, Вормон нуналэз матэктытон понна уй-нунал ужа. Но анай муртлэн, нылпиосызлэн курадӟон-тэльмыронъёссы соин гинэ бырымтэ вылэм ай. 1947-тӥ арын одӥг пеймыт уйе со итымысь ужаса бертэ. Кунулаз кышетэ бинялтыса ватэм 2 сузь жаген суро кӧжы. Витьымтэ шорысь пумитаз пиосмурт - колхозлэн председателез - потэ. Амбаре берыктыса, кӧжыез мертало. 900 грамм кыске. Жалясьтэм кузё мискинь палкышно вылэ судэ сётэ. Тӥни со «жаг» понна сое, преступник карыса, 5 арлы пытсэт сьӧры пукто. Асьсэ понна кылем нылпиосты утьыны нимаз юртын улӥсь песяйзы Фархизямал лыктэ. Сюлмаськыса, сютэм улыса песяйзылэн но тазалыкез лябӟе: одӥг арскын валес вылэ выдэ. Пичи Радифез но витетӥ классын дышетскись Газзаез Янгулысь нылпи юртэ келяло. Пичиослы отын ӧжытак капчи луэ. Татын соосыз сюдо, дӥсято. Со дырысь нылпи юртлэсь директорзэ Фарзи Гимадиевез, солэсь кузпалзэ Хумайра апаез но мукетъёсты мур гажаса али но тодаз вае кырси. 1951-тӥ арын тулыс Махизямал апаез, сроксэ кулэстыса, вордскем гуртаз, нылпиосыз доры лэзё.
1956-тӥ арын Урнякысь профессиональной училищеез йылпумъяса, кияз паськыт профильем механизаторлэсь дипломзэ басьтэм ӧнерчиез - Радифез - Казахстанэ выльвыл музъемъёсты ужаны лэзё. Собере армиын служить карон, вордскем гуртын электростанция лэсьтон, Ильичлэсь лампочказэ ӝуатон, дас ар мында бригадир луыса ужан...
Соку со ӝыт шор ёзо школаын тодон-валан басьтэ. Заочно дышетскыса, Мензелинскысь совхоз-техникумез йылпумъя. 1978-тӥ арын, производстволы дышетонъя мастер карыса, сое гурт школае уже басьто. Солэн кивалтэмез улсын дышетскыса паськыт профильем механизаторлэсь ӧнерзэ басьтэм пиос хозяйстволэсь, районлэсь данзэ ӝутонэ асьсэлэсь бадӟым люкетсэс пырто.
Радиф Нафикович «Дышетӥсь-методист» нимез нуллэ, трос Данъян грамотаосын пусъемын.
Туклячи кемалась кулӥз ини. Сюлмам со сярысь туж шуныт тодэ ваёнъёс гинэ утисько. Соин ик та статьяе солэн лулызлы вӧсь мед луоз. Дания апаймы кырсиен 5 нылпи будэтӥзы. Со 40 ар мында пудо сюдонын ужаса дано шутэтсконэ потӥз. Улон сюресаз кайгу-куректонъёс (кык пиоссы туж вазь кулӥзы) адӟизы ке но, чигтӥськытэк, ог-огзылы пыкет луыса улӥзы. Яра али улонын ялан кайгу-куректонъёс гинэ уг луо. Туэ Дания апаен кырсимылэн семья кылдытыса улыны кутскемзылы но ӝыны даур тырмем. Трос шуг-секытъёсты адӟыса, табере каньыл улонэн уло.

Реклама
Теги: 250
Нравится
Поделиться:
Реклама
Комментарии (0)
Осталось символов: