Улосчимы сярысь

Габдельфарт агайлэн но Нурия апайлэн семьяязы вордскыса, 7-тӥ классысен врач луыны малпам пи аслэсьтыз малпанзэ улонэ пыӵатэ. Салаусьысь шор ёзо школаез медален йылпумъяса, Казаньысь медициная вылӥ дышетскон юртын тодон-валан басьтэ. Сизьым ар дышетскыса, врачлэсь дипломзэ басьтэмез бере, Высокая Гораысь центральной районной больницае врач-хирург луыса ужаны интыяське. Районын ужакуз висисьёс но калык пӧлын гажамон муртлы пӧрме. Небыт киосыныз кӧня висисьёслы операциос лэсьтыса, соослы выльысь улон сётэ.

2000-тӥ арын тодон-валанзэ ӝутон понна ординатурае дышетскыны пыре. 2002-тӥ арын йылпумъяса республикаысь лек пыктос висёнъёсъя больницае ужаны кыле но туннэ нуналэ ӝуш но ньылон висёнъёсъя отделениын врач-хирург луыса ужа.

Азат Габдельфартович ас ужезлэн устоез. Нуналлэн котькыӵе вакытаз вазиськид ке но, со тонэ кылзэ, кенешъёссэ сётэ, котьку юрттыны дась.

Мынам аслам но ӵыжы-выжые та отделениын кылльыса, эмъяськыса потӥз. Туннэ нуналэ таӵе юрттӥсь, зарни киё врачлы тау каронэ пумтэм бадӟым.

Азат Латыповлэн наука удысын но азинсконъёсыз бадӟымесь. 2007-тӥ арын кандидатлы диссертацизэ утьыса, медицина наукаосъя кандидат луэ. Москва, Санкт-Петербург городъёсын тодон-валанзэ ӝутэ. Та нуналъёсы республикаын нырысетӥ луыса, лек пыктосэн висисьёслэсь ӝушсэс но ньылонзэс воштыса поныны выль амал малпаса шедьтӥллям.