Утиське лемтэйлэсь

Лемтэй куртчем бере адями 7-15 нунал ортчыса, нош шергес 1-2 яке 16-45 нунал бере висьыны кутске. Висьыны усем мурт нырысь €ырда, температураез 39-40 градусозь ӝутске, йырыз висьяса улэ но берга, ӧскемез потэ, суйёсыз, чыртыысьтыз, тыбырысьтыз быгытъёсыз вӧсь луо, паралич шуккон учыръёс но вань. Собере мугорлэн паралич шуккем люкетысьтыз быгытъёс атрофироваться карыны кутско. Солэн бервылыз луыса, адями йырзэ возьыны но киоссэ ӝутыны быгатонтэм луыса кыле. Температура туж зол ӝутске но 5-8 нунал ӵоже уг усьы. Висись туж зол йырыз висемлы ӝожтӥське, нош йырез, мугорез выртон висёнэз эшшо но кужмоятэ. Ӵем дыръя мылкыд сураське, ӧскытэ. Йыр вим воспаляться каре, озьы кутске менингит. Со ик дыре висись йырзэ туж шуген мыкыртэ, пыдъёссэ мырдэм купыртэ, ымнырысь ку гордэктэ.

Тӥни озьы тудыс но гужем клещевой энцефалитэн висён куддыр сӧсыр кельтыны но быгатэ. Сыӵеос вань улытозязылы нырысетӥ яке кыкетӥ группаысь инвалидность басьто. Соин ик лемтэй куртчем бере луэмезъя ӝоггес врачлы вазиськыны кулэ. Созэ эн вунэтэ: висёнэз алонъя ужрадъёс кутон капчигес луэ соин висьыса ыштэм тазалыкез берыктонлы утьыса.

Али дыре клещевой энцефалитлы пумит нюръяськонъя пӧртэм ужрадъёс кутӥсько. Со ужрадъёс ӧръямын прививка лэсьтыса, адямиослэсь та пӧртэм висёнлы пумит сылонзэс (иммунитетсэс) кужмоятонэ, озьы ик энцефалитлэсь вируссэ вӧлмытӥсь лемтэйёсты быдтонэ.

Нюлэскын ужаку, походъёс дыръя яке кема шутэтскыку лемтэйёсты кышкатон понна пӧртэм препаратъёс кутӥсько. Соосыз мугорлэн гольык интыосаз зырало яке дӥсь борды пыӵато. Созэ эн вунэтэ, лемтэй ӵем дыръя шутэтскыку куртчиське. Адями физической уж ужаку, солэн сӥльвиръёсыз ялан выро но лемтэйлэн куртчиськыны люкето. Клещевой энцефалитэн висёнтэм вылысь выл дӥсьёсты, мугорез ялан эскерыса улыны кулэ. Эскероно нуналлы кык пол — нуназелы шутэтскон дыръя но ӝыт ужъёс йылпумъяськем бере. Лемтэез уинлы мугоре кельтыны уг яра, сое басьтыны тыршыны кулэ. Йырыз чигыса медаз кыльы шуыса, лемтэез туж чакласькыса гинэ басьтоно.