Вань-а удмурт кыллэн вуоноез?

Артём Малых, Мускоысь удмурт активист:

— Удмурт кыллэн вуоноез вань, но тросэз туала югдурмы бордысь потоз, туала факторъёсыз бордысь: анай-атайёс пиналъёсты удмурт кыллы дышето-а, уггес-а, верасько-а удмурт пиналъёс куспазы удмурт сямен, кызьы бадӟым общество удмурт кыл шоры учке: гажаса яке гажатэк, кызьы кун удмурт кыллы юрттэ? Малпасько, удмурт кыллэн вуоноез вань, но удмурт кыллэн югдурез туж ӟеч ик ӧвӧл: удмурт кылын вераськисьёслэн лыдзы синэ, удмурт егитъёс удмурт культура но удмурт литература шоры мурт синмын учко, соослы, шуом, Валишин но Красильников туж урод тодмо, кун удмурт кыл пала уггес дурбасьты.

Озьыен, ӵапак али тросэз адямиослэн мылкыдзы бордысь потоз.

Удмуртъёс асьсэсыз гажаны но дунъяны кутскизы ке, кылзылэсь уз но палэнске. Анаедлэн кылызлэсь палэнскыны вӧсь гинэ, ассэ гажась адями анай кылызлэсь уз сеськы, мурт кылэ уз выжы. Озьыен, али валаны кулэ, удмурт кыл мукет кылъёслэсь номырин но уродгес яке начаргес ӧвӧл. Туала улонын удмурт кыл пиналлы ватсаса луонлыкъёс сётэ, тросгес ӧсъёс усьтэ, дуннеез турлыгес возьматэ. Туала улонын пиналъёс ӟуч кылын анай кыл чотын верасько ини, озьыен, ӟуч кыл котьма ке но йыразы пыроз, нош удмуртлы инты ӧм ке сётэ, билингвизмлэсь зол палъёссэ басьтытэк ик улоз. Туала дуннеын адямиос пӧртэмлыкъёслы шумпото но дуннелэсь турлы луэмзэ туж гажало: сое усьтон понна кыдёке ветло, нош асьмелэн, удмуртъёслэн, сыӵе уникальной шансмы вань — асьмелэн удмурт культурамы но удмурт кылмы — макем со аспӧртэмлыко, чебер но йӧно. Сое усьтон понна кыдёке ветлыны кулэ ӧвӧл — гуртысь басьты ваньзэ, эн гинэ возьдаськы. Удмурт культура быдэс дуннелы дуно но данъяськымон.

Лукерья Шихова, Ижкарысь удмурт блогер:

— Малпасько, удмурт кыллэн вуоноез вань, куке асьмеос котькуд нунал пичи ке но удмурт кылын вераськиськом, удмурт кылын лыдӟиськиськом но гожъяськиськом, нылпиосмылы удмурт кылын вазиськом, соку удмурт кыллэн вуоноез луытэк уг быгаты. Мон ачим куинь аресъем пиеным удмурт кылын гинэ вераськисько бере, оскисько, со но аслаз улоназ удмурт кылын трос вераськоз, аслэсьтыз пиналъёссэ но удмурт кыллы дышетоз. Удмурт кылын вераськись нылпиос — со, дыр, удмурт кыллэн вуоноез. Малпасько, нылпиосмылэн улоназы нокин тодаз но уз ни вайы, удмурт кыллэсь вашкала дыръёсы кин ке возьдаськем шуыса, азьланяз калыкъёс кылъёс понна ченгешыса но уз ни улэ. Вань кылъёс улозы. Туала арын сыӵе трос компьютеръёсын но телефонъёсын пукиськом бере, удмурт кыл тросгес вотэсын (интернетын) луоз, дыр. Нош кинэн ке вераськемед потӥз шуак удмурт кылын, телефонысь Алиса яке Сири тыныд озьы ик удмурт кылын вазьыны быгатоз, нош кинлэн ке удмурт кылэз дышетэмез потӥз ке, со дышетӥсь утчаса но уз ни улы, озьы ик вотэсысь дась курсъёсын сое дышетоз. Вотэсын тросгес удмуртэз луиз ке, удмурт кылэз но вунэтӥсь уз луы, малпасько.

Мон туж позитивной адями, удмурт кыл бырон сярысь уг малпаськы, со мынам улонам тани 28 ар вань ни бере, быдэс улонме, мон уг валаськы, кызьы со шуак ышоз. Ма, валам но уг поты. Удмурт кыл котьку луоз. Ми со понна трос мар лэсьтӥськом но лэсьтом али. Улонмы кузь али.

Леонид Сапожников, Сырья гурт клублэн кивалтӥсез, Балтась удмуртъёслэн «Кенеш» НКА-зылэн азьвыл тӧроез:

— Удмурт кыллэн вуоноез вань шуыса малпасько, гуртъёсамы пичи экеос ӟученгес лабыртыло ке но. Вылаз ик песянайёссы но соослы юрттыло ке но... Анай кылмылэн азьланезлы осконме юнматэ егитъёслэн удмурт культура борды кыстӥськемзы, удмурт калыклэн историеныз тунсыкъяськемзы. Гуртысь клубъёсын но шӧдӥське со —дискотекаосын, чебер но задор удмурт крезьгур кисьтӥськыку, егитъёслэн юмшан мылкыдзы эшшо но кужмогес пуроме. Мунчо гуре пӧсь кисьтэм выллем, юмшанзы кужмояса кошке. Котьма шуид ке но, егитъёслы  но асьмелэнэз матынгес луэ шуыса адӟиське. Мызганчизы луыку, удмурт сямен такмакъёс вераса шудо, экто. Таиз гуртысь егитъёс сярысь вал. Ижкарысь но мукет городъёсысь но егитъёс асьме удмурт культураез азинтонэ мылысь-кыдысь пырисько. Соослэн ужъёссы интернетын трос. Сыӵе ужъёсын тодматскиды ке, асьтэлэн но сюлмады оскон пыӵалоз — Анай кылмы дунне вылын кема улоз на! Вераськыкуд аслыд ачид ӧжыт ке но саклык висъясалыд ке кыл куспад ӟуч кылъёс пыртонтэм — отысен ук кутске ӟучомон!

Ольга Шамшиярова-Нуретдинова, Екатеринбургысь «Ошмес» удмурт ансамбльлэн лулчеберетъя кивалтӥсез, Свердловск улосвылысь городъёсын но гуртъёсын удмурт ужрадъёсты ортчытъясь адями:

 — Удмурт кылмылэн вуоноез вань шуыса малпасько. Малы ке шуоно тросэз ас кылыныз верасько ини городын урамын но, магазинын но. Удмуртъёс но уг кепырало вераськыны ини табере общественной интыосын — таиз нырысетӥез. Кыкетӥез, песянайёс, кудъёсыз милям шаерамы удмурт культураез улӟытон борды басьтӥськизы, асьсэ нунокъёсынызы удмурт сямен вераськыны кутскизы. Нылпиосынызы вераськизы ӟучен, нош внукъёсынызы табере бӧтьырто удмуртэн.

Азьло ас анай кылзылэсь возьдасько вал. Нош табере ас кылдэ, сям-йылолъёстэ, традициостэ тодон модае но пыриз шуид ке луэ, дыр. Та туж шумпотымон. Котьку но мед улоз асьме удмурт кылмы!

Ираида Чернова, Ципья шоръёзо школаысь удмурт кылъя но литературая дышетӥсь:

— Кӧня ке ар талэсь азьло таӵе юан уг паймыты вал. Удмурт нылпиос верасько вал удмурт кылын ик. Али дыре югдур кышкатэ монэ: Кызьы дышетоно ӟучомем удмурт нылпиосты, малы ӟуч кыл вӧлме удмуртъёс пӧлын?

— Анай-атайёссы нылпизы ӟуч сямен акценттэк мед вераськозы шуыса тыршо;

— ӟуч сямен вераське ке, озьыен ОГЭ но ЕГЭ усто сётоз кадь пото, лэся;

— анай-атай ас ужзэс капчиятон вылысь, пичи нылпи телевизор азьын будэ, кияз телефон кутыса (уг бӧрды, уг керӟегъяськы, ма кулэ на).

Удмурт кыллэн вуоноез герӟаськемын анай-атайлэн асваланэнызы: пичиысен ас вордскем кылыныз ӧз ке вераськы нылпи, со азьланяз кулэ уг ни кары сое (вала, но уг вераськы). Асьсэды гажась анай-атайёс, гажало ас вордскем кылзэс но, сыӵе ик мылкыд пыӵатыны быгатозы нылпизылы но.

Римма Петрова, Шор Кушкет шоръёзо школаысь удмурт кылъя дышетӥсь:

— Адями тодэ ке вордскем кылзэ, ас калыкезлэсь сям-йылолъёссэ, сыӵе калыклэн азьпалыз одно ик луоз.

Удмурт калык — со туж вашкала калык. Озьыен, вераськон кылыз но кемалась кылдэмын ни. Асьме дырозь вуэм вераськон кыл, мон сямен, каллен «ышыны» кутске. Маин со герӟаськемын?

Пинал вордскем бераз кылэ ас котырысьтыз куараосты, кыӵе кылын вазисько солы анай-атаез. Озьы со ас кылыныз вераськыны дыше. Жаляса верано луэ, берло дыре удмурт семьяосын но нылпиосынызы ӟуч сямен верасько. Азьло Удмуртиын, городъёслы матысь гуртъёсын гинэ сыӵе югдур ке вал, асьме доры но со вуиз. Школае лыктэм пиналъёс куспазы ӟуч сямен верасько ни. Тросэз анай-атайёс но, нылпиос но ӝожтӥсько учебникъёсысь литературной кылъёсты ум валаське шуыса. Ма кызьы валалод? Нылпиос удмурт книгаосты, газет-журналъёсты уг лыдӟо (куд-ог анай-атайёс «Азьлане» газетлы но уг гожтӥсько...)

Вакчияк вераса, мон сямен, удмурт кылмылэн азьпалан улонэз анай-атайёс «киын». Нылпиосынызы удмурт сямен вераськизы ке, кырӟанъёсты, сям-йылолъёсты дышетӥзы ке, удмурт кыл улоз на. Нош кыл ке вань — калык но вань.

Мария Николаева, Шор Кушкет шоръёзо школаын удмурт кылъя но литературая тодон-валан сётэм пенсиысь дышетӥсь:

— Куд-ог егитъёслэн «марлы кулэ ини со удмурт кыл» шуэмзылы туж зол воже потэ. Удмуртъёслэсь палэнын улыса но, удмурт сямен вераськисьёсты юн гажасько. Аслам Казаньын улӥсь ньыль аресъем нуноке удмурт сямен вераськыкуз шумпотӥсько. Анай-атаеныз но удмурт сяменгес вераське. Садикын бигер но англи кылъёсты дышетэ на. Малпасько, удмурт кыл уз быры. Тау шуэме потэ асьме бигер правительствомылы. Котькытын вордскем кыллы таӵе луонлык уг сёто ук. Киров улосысь удмуртъёс гинэ но кыӵе вожъясько, милям удмурт пиналъёс ас вордскем кылзэс дышето шуыса. Озьы ик шумпотӥсько удмурт обществоослэн туж тыршыса ужамзылы. «Мудорвай», «Бигерд», «Азвесь» но мукет — ваньмыз та ужрадъёс удмурт кылмылэсь азьпалзэ возьмато. Иванова Марина Анатольевналы, Герасимов Андрей Сергеевичлы но соосын ӵош тыршисьёслы сӥзисько шуд но тазалык, ужазы  пумтэм азинсконъёс.

Наталия Антонова, Покчи Лӧзя шоръёзо школаысь удмурт кылъя но литературая дышетӥсь, Балтась ёросысь удмурт кылъя но литературая дышетӥсьёслэн методической огазеяськонзылэн кивалтӥсьсы:

— Удмурт кыллэн вуоноез сярысь ке верано, берло дыре оскон пыӵатыны кутскизы Татарстан Элькунысь удмуртъёслэн НКА-зы, отысь егитъёслэн мылысь-кыдысь удмуртлыкез ӝутэмзы, пичи пиналъёслы нимысьтыз лулчеберетмес ӝутон вылысь «Мудорвай» вожвылъяськон ортчытэмзы. Лыдӟиськон мылкыдзэс пуромытон вылысь, мынам анай-атайёслы дэмламе потэ Удмурт Элькунын пиналъёслы потӥсь «Ӟечбур!» газетлы но «Кизили» журналлы гожтӥськыны. Кӧня вожвылъяськонъёс отын пиналъёслы печатласько?! Телефон сьӧрын юнме дырзэс быдтытозязы, эсьмаса пайдаё ужен вырысалзы, грамотаос но кузьымъёс басьтысалзы.

Удмурт кыллэн кулэлыкез сярысь вераку одно ик йырам лыкто дано удмурт тодосчилэн, протодиаконлэн М. Атамановлэн кылъёсыз: «Со ошмес ву кадь дун-чылкыт, быдӟым крезь кадь небыт но жингрес, чечы  кадь ческыт, Кам шур кадь паськыт но мур». Школа, анай-атай, удмурт общество ӵошен огкылысь ужамы ке, удмурт кылмы уз быры. Нош кыл ке вань — калык но вань!!!

Марина Иванова, Татарстанысь удмуртъёслэн НКА-зылэн исполнительной директорез:

— Мар луиз ке но, мон малпасько, удмурт кыллэн вуоноез вань шуыса. Мукет юан — кыӵе формаен со кылёз. Таиз юан малпаськытэ. Оло, адямиос уз но вераське удмурт кылын... Кылем арын мон Америкае ветлӥськем вал, отын одӥг калыклэн кылэз быремын вал, нош культуразы соослэн возиськем. Адямиос калык кырӟанъёссэс кырӟало, но валатэк кырӟало соос сое. Оло, асьмелэн но сыӵе формаен кылёз удмурт кылмы. Куд-ог адями, оло, вераськоз но. Вань сыӵе калык — юкагиръёс. Соослы 120 ар талэсь азьло одӥг учёной верам, кылзы быроз шуыса. Но соослэн кылзы али но вань, али но соос верасько асьсэ кылынызы. Соин мон уг тодӥськы, удмурт кылэн ситуация кыӵе луоз, нош одӥгзэ вераны быгатӥсько: та ваньмыз асьме бордын. Семьяямы кылэз утимы ке, со анай-атайлэсь нылпилы выжоз. Ваньзы удмуртъёс вордскем кылынызы вераськозы шуыса уг оскиськы, нош ваньмыз асьме бордын. Вордскем кылмес яратӥмы ке, гажамы ке, сое утьыны быгатомы.

Татьяна Константинова, Штиглиц нимо академиысь студент:

— Удмурт кыллэн вуоноез луоз, асьмеос сое азинтыны быгатӥмы ке. Гуртъёсын удмурт кыл быроз кадь уг поты мыным, малы ке шуоно гуртысь семьяосын улӥсьёс понна вордскем кылдэ тодон — со база. Но кызьы луиз ке но, ваньмыз асьмелэн киямы. Асьмеос ӧм ке вераське асьме кылынымы, кин соин вераськоз но кин сое азинтоз? Озьы со бырыны но быгатэ. Гуртын югдур умойгес, дыр, малы ке шуоно семьяын удмурт кылын вераськыны тыршо. Но туала дыре городын но, район центръёсын но егитъёс удмурт кылэз азинто ини. Егитъёслы, пиналъёслы удмурт кылэз дышетскон понна пӧртэм условиос кылдыто. Казаньын но удмурт кылэз дышето ини, та мыным туж кельше но шумпоттэ монэ. Нимысьтыз воскресной школаос но вань нылпиос понна. Соин оскисько, асьмеос кулэ каримы ке, ваньмыз умой луоз шуыса.

Екатерина Салтыкова, филолог, кылысь кылэ берыктӥсь:

— Мон сямен, кыл — улэп. Соин кыллы мукет лулоослэн катъёссы но тупало.

Малпасько, кылэз азинтон но соин вераськон понна, нырысь ик сое яратыны кулэ (анай кыл-а со, яке огшоры кельшем мурт кыл-а). Кытысь со яратон мылкыдэз басьтоно — соиз ини мукет юан... Валамон одӥгез, кужмысь карыса, яратон пыӵатыны уг луы... Мед луысалзы сыӵе дышетон программаос, кудъёсыз тунсыко карыса адямиез (нырысь ик, нылпиез) кыл дуннее кыскысалзы, огшоры но чебер вераськыны дышетысалзы.

Нош кыкетӥез: кызьы адями уг быгаты огназ улыны, озьы ик кыл но мукет кылъёсын кусып возьытэк улыны уг быгаты. Кыл азинске, куке со улонэн валче вамышъя, мукет кылъёсын кусып возе. Соин, мон сямен, ӧвӧл кышкано асэстэмъёслэсь но выль кылъёслэсь (валамон, та юанын зарни шор вадесэз шедьтыны быгатоно).

Василий Трофимов, Ципья школалэн азьвыл директорез:

— Мон та юанъёслы таӵе ответ сётысал: асьмелэн вуономы понна пиналъёс, егитъёс кылкуто. Соин удмурт кыллэн вуоноез но соослэн киосазы. Вань оскон — соослы. Ми, мӧйы поколение, та юан бордын ас дыраз тыршимы ини. Ачим сярысь гинэ верано ке, мон, гумырам школаын ужай бере, Ципьяын выль школа лэсьтэм бере, макем тырши, нылпиос вордскем кылзэс дышетскыны мед быгатозы шуыса, соослэн со понна школаын умой условиоссы мед луозы шуыса. Удмурт нылпиос понна гинэ но ӧвӧл. Туннэ нуналэ но та юан ласянь школаын ваньмыз умой, дыр, шуыса малпасько. Бен, туала дыре урамтӥ школьникъёс ортчыку ӵем кылыны луэ: соос, удмурт нылпиос ке но, куспазы ӟуч кылын верасько. Та малпаськытэ: малы со озьы? Возьдасько-а мар-а соос анай кылзылэсь? Нылпиос мед тодысалзы ӟучсэ но, удмуртсэ но, бигерзэ но кылъёсты. Татарстанын ведь улӥськомы.

Ольга Игнатьева, Германиын улӥсь удмурт нылкышно, эрготерапевт:

— Удмурт кыллэн азьланьтӥськемез но улэмез понна кыл кутон — со асьмелэн, удмуртъёслэн ужзы. Луиз ке улэп кыл, кудзэ анай кылы шуисьёс луозы; луизы ке удмурт кыллы дышетӥсьёс, луиз ке вылӥ дышетсконниосын но огшоры школаосын удмурт кыл но удмурт литература, соку мыным удмуртлык понна кышкыт уз лу.

Мынам нылъёсы Германиын улыса куинь кылын верасько, анайкылзы - удмурт, атайкылзы - венгер но вань на улон интымылэн кылыз - немец. Нылъёсы ог-огенызы венгер кылын верасько, угось картэным венгерен вераськисько. Нылпиослы со шудон кадь, соос туж чаляк дышо но валало кылъёсты, малпаськытэк ик одӥг кылысь мукетаз выжыны быгато. Бадӟымез нылылэн сузэрез вордскем бере юамез вань, нош сузэреныз кыӵе кылын вераськоно, анай но атай кылъёс вань, нош сузэр кыл кыӵе со!?

Ми котькуд аре Удмуртие вуылӥськом, нылъёсылэн гуртын улонысь тодэ-ваёнъёссы быдэс арлы собере тырмо.

Удмурт кылмес медам вунэтэ шуыса, ми котькуд нунал сямен апаеным вераськиськом, ӝытъёсы удмурт кылын маке лыдӟыны тыршиськом, одӥг ӝытаз венгер кылын, мукетаз - удмуртэн. 

Удмурт кылмы мон понна со туж матысь, монэ пиналъёсыным адӟиськымтэ сӥньысэн юн герӟась тэчет. Мон тонэ туж яратӥсько! Тон мынам пичи зарни комоке! Пичи нылы! Ӟеч баб! Вай мон тонэ пичи гинэ вешало! Кыӵе мусо кылӥсько та кылъёс, соглаш луоды, дыр, тӥ но.

 Инстаграмын мынам 2 баме вань, одӥгзэ удмуртэн гинэ гожъясько, отын вань видеоос, кудаз нылъёс удмурт кылын кырӟало, кылбур верало.

Василий Никитин, пенсиысь дышетӥсь, «Кенеш» НКА-лэн ёзчиез:

— Берло аръёсы ӟуч луымтэ калыкъёслэн кылъёссылы ялан могӟетъёс пуктыло. В. В. Путин Йошкар-Олаын вордскем кыл луымтэ кылъёсты кужмысь дышетонлы пумит луыса вераськем бере, тросаз школаосын республикаосысь кыкетӥ кун кыл луись кылъёсты дышетэмысь дугдӥзы. Кылсярысь, асьме республикаямы бигер луымтэ пиналъёсты бигер кыллы дышетэмысь дугдытӥзы. Таин валче анай-атайёс нылпиоссэс ас вордскем кылзылы пумит султытыны кутскизы. Вераны кулэ, Удмуртиын удмурт кыл ноку одно ик дышетоно кыл ӧз луы. 1958 арын дышетон реформая вань предметъёсты дышетонэз ӟуч кылэ выжтэмзы бере, удмуртъёслэн кылиз удмурт кыл но литература предмет гинэ. Та дырысен кутскыса, укыргес ик тросэз удмурт интеллигенция, асьсэ пиналъёссэс удмурт кылэз ӧз ни дышетытэ. Вань вал сыӵе удмурт кылъя но литературая дышетӥсьёс, кудъёсыз ас пиналъёссэс ӟуч классэ интыяллязы. Малпазы, ӟуч сямен дышетскыса, нылпиоссы улонын вылэ тубыны быгатозы шуыса. Озьы Удмуртиын удмуртъёс пӧлын зол ӟучомон кутскиз. Тани учке калыкез берло аръёсы лыдъян-чотанлы йылпумъянъёсты:

2002 арын — 636906 адями

2010 арын — 552299 адями, таос пӧлысь удмурт кылэз тодэ 324338 мурт, яке 59~%.

Нош РСФСР-ын 1989 арын улэм 714833 удмурт, СССР-ын — 748 сюрс.

Дышетскизы, но удмуртъёс Россиын туж дышетскемен адско-а? Трос-а удмуртъёс пӧлын вылӥ тодон-валанэн муртъёсмы? Удмуртъёс пӧлын со 9,9% адями ке, быдэс Россиын шорлыдын 24 адями усе (2002 аръя). Бигеръёс нош асьсэ кылын дышетскыса но, 15,5%.

Али ӟуч луымтэ калыкъёслэн кылзылы пумит кужмо ужа Дышетонын национальной ужпумъёсъя Москваысь центрлэн директорез Ольга Артёменко. Москваын Россиысь анай кылъёсты дышетӥсьёслэн бадӟым конкурсазы но лыктэм дышетӥсьёс азьын трос умойтэм кылъёсын урдскылэм, ӟуч луымтэ калыкъёслэсь кылзэс дышетонэз воксё кулэтэмен лыдъя но предмет карыса дышетонтэм вылысь вераське. Ас малпанзэ улонэ пыӵатыны быгатӥз ке, пичи кылъёслы пум шуыны луэ. Но мон малпасько, пичи калыкъёслэсь куаразэс кылозы, кылмы, кылдэм ке, 22-тӥ дауре но улоз шуыса. Бен со ваньмыз асьме бордысь но потэ. Нылпиосын семьяын удмурт кылын вераськоно, школаын удмурт кылэз дышетоно. Куд-ог анай-атайёс малпало, пиналзы ӟучен вераське ке, усто дышетскоз шуыса. Озьы ӧвӧл ай со. Пиналлы йырвизь кулэ. Йырвизьыз ке ӧвӧл, коть япон, коть англи кылын дышеты, пайдаез уз лу. Тани сое верало на. Гуртысь палэнэ улыны кошкемъёслэн пиналъёссы копак ӟучомо, но малы ке но вылӥ дышетскемъёссы тросэзлэн ӧвӧл. Нош асьмелэн удмуртсэ но, ӟучсэ но тодо, вылаз ик ӝыныезлэсь тросэз вузъёсты но йылпумъяло. Озьы бере, вордскем кылмы уг люкеты дышетскыны, гажано анай-атайёс. Мон ачим 1963-тӥ арын дышетскыны пыри, ӧй ветлы нылпи садэ но, шонерак урамысен ӟуч кылэз кылытэк — школае.

Реформа соку гинэ кутскем вал, соин учебникъёс но удмуртэн вал на, кылсярысь, арифметика (математика), удмурт лыдӟон книга пушкын ик удмурт кылын история, природоведение вал. Гуртысен Ӟаны, Ципья школае, татын ваньмыз ӟучен ни вал. Дышетӥсьёс тыршыса ужазы, монэ дышетӥсь карымон дышетӥзы. Тау соослы! Дышетӥзы удмурт кылэз но, ӟуч кылэз гажаны. Ас улонам дуно но сюлэмелы матын вордскем удмурт кылы мында нокыӵе кыл но ӧз юртты, дыр. Тау Инмарлы — сое Кылдытӥселы. Ӵукна ке сайкасько, Инмарлы удмурт кылын вазиськисько: «Инмаре, ӟеч кары! Ӟеч кӧлытэмед понна тау, Вылысь Инмаре! Туннэ улыны няньдэ, кужымдэ, тазалыктэ сёты вал! Оскисько тыныд гинэ, Инмаре-Кылчинэ!». Шумпотӥсько, ас гурт калыкеным жильыр гинэ удмурт сямен вераськисько. Вань малпанъёсы но удмуртэн. Удмуртэн гожъяськисько, кырӟасько но лыдӟисько. Узыр удмурт кылынымы быдэс ВЫЛЬ СӤЗЁН, кӧня мында зӧкесь но векчиесь книгаос гожтэмын. Пумиськылӥсько артэ улӥсь калыкъёсын. Соослэн но вераськемзы мыным матын но валамон.  Мед вераськозы, соослэн со мусо анай кылзы ук. Нош мынамез вордскем УДМУРТ кылы ӵукнаысен ӝытозь кыштыр гинэ монэн ӵош ужаса ветлэ. Ӝыт изьыны выдыкум но удмурт кылыным ик Быдӟым Инмарлы тау карыса выдӥсько. Мед улоз дауръёсын Инмарен сётэм визьмо УДМУРТ КЫЛМЫ!