Витиськоды-а тӥ Выль ар праздникез?

Малпасько, Выль ар праздникез пичиез но, бадӟымез но вите, дыр — котькинлэн шулдыр мылкыдэн выль аре выжемез потэ ук. Асьме лыдӟисьёсмы но чидатэк витё меда Выль ар праздникез? Кыӵе меда мылкыдъёс кузьма соослы Выль ар? Та сярысь кӧня ке лыдӟисьёсмы ас малпанъёссэс шараязы.

Александра Раимова, Тагашур:

— Выль ар праздник — мон понна зэмос праздник. Малы ке шуоно, со тужгес но семья, шуныт но шулдыр праздник, ваньзылы вае со ӟеч мылкыдъёс. Урамъёс чеберъямын яркыт тылъёсын, шӧдӥськод астэ выжыкылын выллем. Ваньзы дасясько солы, кыз пукто, нылпиосынызы ӵош чеберъяло сое. Омыр но пыӵамын кадь Выль арен. Но азьло, пичи дыръям, Выль ар ортче вал умойгес. Ми тыршыса дасяськиськом вал Выль арлы: лэсьтӥськом вал кагазлэсь снежинкаос, гирляндаос, лякиськом вал вӧлдэтэ дождикъёс, анаймес вурытӥськом вал  костюмъёсты, тросэз нылъёс луо вал снежинка, нош пиос лудкечъёс. Нош али нылпиос дӥсяло магазинысь басьтэм костюмъёсты, уг лякыло укноязы кагазлэсь вандэм снежинкаосты. Тол бабайлэсь куро гаджетъёсты, телефонъёсты, куке ми куриськом вал коньки, мунё, фломастер...

Алексей Павлов, Вуж Кушкет:

— Мынам малпамея, Выль ар — со котькуд адямилэн (пичиезлэн но, бадӟымезлэн но) тужгес яратымон но витёно праздникез. Котькудӥз сое чидатэк, шумпотыса вите, малы ке шуоно со — самой бадӟым но шулдыр праздникъёслэн одӥгез. Ваньмылэн оскеммы потэ ӟечезлы, умоезлы, ӵапак Выль ар праздник та осконлы инъет кылдытэ. Ог-огдэ ӟечкылан, вож кыз котырын маскаръяськон, шулдыръяськон, юмшан — таос ваньмыз но мылкыдэз бурдъяло кадь, соин ик со пӧрме зэмос праздниклы. Но зэмзэ ке верано, ачим егит вакытэ, та праздник шулдыргес ортче вал кадь потэ... 

Мария Гаврилова, Ципья:

— Зэмзэ ке верано, али дыре Выль ар праздникез туж ик уг витиськы ни. Оло вань со, оло ӧвӧл. Мыным матынгес Ымусьтон праздник, сое витисько. Нош пинал дыръя ми, егитъёс, кыӵе витиськомы вал Выль арез но кызьы сое пусйиськомы вал! Гуртысь вань егитъёс люкаськыса, я клубын, я школаын пумитаськомы вал Выль арез. Туала дыре бадӟым компаниосын люкаськыса пусйисьёс чиньыен лыдъямон гинэ ни. Нош ми ас вакытамы шулдыръяськыны быгатӥмы ке, быгатӥмы! Азьло кузьымез но, туала дыре кадь, трос ӧй вал ке но, луэмезлы шумпотыны быгатӥмы...

Зинаида Гришкина, Вылын Ушма:

— Выль арез уг витиськы ни шуи ке, зэм луоз. Со мыным али праздник кадь уг поты ни. Нош егит дырме тодам ваёно ке... Кезьытлэсь но кышкатэк урамын ёлка котырын бал-маскарадын шулдыръяськимы. Гуртысьтымы кирпич заводлэн горд сэрегез вань вал, самой со сэрегын быдэс гурт люкаське вал, яке люкаськиськомы вал кинлэн ке корказ. Мар шуид ке но, ми, егитъёс, шулдыръяськыны быгатӥськомы вал азьло. Нош  аръёс ортчыса, шулдыръяськон мылкыдъёс кысо ик вылэм.

Римма Исьмекова, Турья:

— Тани нош йылпумъяське ини али гинэ мытэм армы. Солы йылпумъянъёс лэсьтон, азьпаллы выль ужъёс пуктон дыр вуиз. Выль ар праздникез мон валаны кутскем дырысеным зэмос праздникез кадь витисько. Соку куноосты пумитаськом, ӝӧк тыр сиён-юон дасяськом. Семья но ваньмыз люкаське. Кӧня ке ар ӵоже ини Выль арез дорын семейной праздник карыса пумитаськом. Начальной школаын дышетскыку пакет-кузьым витиськом вал (пакетсэ асьмеос ик кагазлэсь лэсьтыса нуиськом вал), школаын сяна, Алдыровъёс доразы гуртысь вань кадь пичиослы ёлка ортчыто вал, сое но шумпотыса витьылӥмы... Быдэ вуэмъя гуртысь егитъёс клубе люкаськиськом вал. Котькудӥз сьӧраз кыӵе ке но салам вае, обязательно пельнянь. Кыӵе Выль ар луоз со пельняньтэк! Ӵукнаозь шулдыръяськиськом, эктӥськом вал, мызганчиосмы соку огзылэсь огзы усто шудӥзы. 1979 арын педучилищеез йылпумъяса, гуртысь начальной школае ужаны бертӥ. Со дырысен мон кема аръёс ӵоже Тол бабай луи... (школаын но, клубын но). Берлогес, аслам нылпиосы быдэ вуэм бере, Тол бабайлэн ролез нылпиослы кӧчиз. Ми понна Выль ар со праздник гинэ ӧвӧл, УЖ но луиз. Выль ар мылкыдъёс сярысь ке верано, солы котьку но оскем потэ. Соин ик та праздник ортчем бере, выляз арын выль малпанъёс быдэсмозы, вуоноез ар умойгес, узыргес луоз, трос воштӥськонъёс ваёз шуыса оскисько! Вань кадь «Азьлане» газетэз лыдӟисьёсты ӟечкыласько матэктӥсь Выль арен. Вань кадь висён-сюлмаськонъёс, шугадӟонъёс ортчемаз мед кылёзы. Выль арын тросгес югыт, шудбуро нуналъёс мед луозы, нош адямиос но ог-огзэс гажаса мед улозы!

 P.S. Римма Ивановналэн ӟечкылан кылъёсызлы итӥськыса, ми но, «Азьлане» газетын ужасьёс, вань кадь лыдӟисьёсмес Вуоно 2020-тӥ арен но Ымусьтонэн ӟечкыласькомы. Выль ар котькудмылы шудбур, шумпотонъёс, каньыл улон мед ваёз.

Дасяз Наталья Жукова