Вормисьёс пӧлын асьмелэнъёс но вань

Вордскем кылъёсты утён, азинтон но паськыт вӧлмытон — туннэ нуналэ туж секыт но лэчыт ужпум. Школаосын куронъёс будо, нылпиос дырзэс интернет вотэсъёсын ортчыто, озьыен, анай кыллы саклык висъямысь дугдо.

26-27 южтолэзе Казаньысь Вахитов ёросысь К. Насыри нимо 80 номеро бигеро-ӟучо шоръёзо школаын дышетонъя огазеяськонъёсысь но воскресной школаосысь анай кылъя дышетӥсьёс понна Огъяросси вожвылъяськонлэн йылпумъян люкетэз ортчиз.

Вожвылъяськонлэн ужпумез — Россия Федерациысь но Татарстан Республикаысь калыкъёслэсь кыл но лулчеберет пӧртэмлыксэс утьыны но азинтыны юрттон, анай кылъёсъя дышетӥсьёслэсь статуссэс будэтон, дышетон опытэз но ӧнер устолыкез вӧлмытон.

Вожвылъяськонлэн заочной этапаз Татарстан Республикалэн муниципал ёросъёсысьтыз 69 дышетӥсьёс но Россия Федерацилэн субъектъёсысьтыз 12 дышетӥсьёс пыриськизы, нош йылпумъян люкетаз анай кылъёсъя но литературая 50 дышетӥсьёс кужымзэс мертазы.

Дышетӥсьёс 2 нунал ӵоже мастер-классъёс ортчытӥзы, патриотической воспитание темалы сӥзем проектъёссэс возьматӥзы но котырес ӝӧке пыриськизы. 

Вормисьёсты но призо инты басьтэмъёсты ӟечкылан ужрад 27 южтолэзе Казаньысь «Хоррият» кафеын ортчиз. Татчы ТР-ысь дышетонъя но тодосъя министр Ильсур Хадиуллин но пыриськиз. 

Шумпотымон, вормисьёс пӧлын аспалъёсмылэн нимъёссы но пусъемын. Ципья шоръёзо школаысь удмурт кылъя но литературая дышетӥсь Чернова Ираида Анатольевна анай кылъя дышетӥсьёслэн Огъяросси вожвылъяськонзылэн лауреатэз луиз. Ираида Анатольевнаез ӧнер конкурсын вормеменыз ӟечкыласьком но азьланяз выль вормонъёс, ас кужымезлы оскон но котькуд кутсконаз удалтон сӥзиськом!

Удмурт кылмес данъяса, быдэс шаерамы вӧлмытыны мед кылдоз!

Туспуктэм: https://vk.com/public212501025