Вормисьёсты пусйимы

Кык конкурсын ик кык инты тодмостэмын вал. «Нырысетӥ сентябрьлэн ӵукнаез» шуэм конкурсэ 24 туспуктэм вуиз. Соос пӧлысь 19 номеро туспуктэмын Нурма шоръёзо школаысь 9а классын дышетскисьёс вал. Кузьымез басьтыны классэн кивалтӥсеныз Роза Галиеваен Адиля Гатауллина дышетскисез лыктӥзы.

Кыкетӥ вормись луыса 1 номер улсын тодмостэм Рамиль Назипов луиз. Кугунур школаысь дышетӥсез сайтэз лыдӟисьёс ӟеч тодо ини. Конкурсъёсы пыриськыса, со кузьымъёсын пусйиськылэ. Кык вормисьёсмы но, нимаз ужбергатӥсь Гульсум Миннебаевалэн спонсор юрттэменыз, картинаосын пусйиськизы.

«Сӥзьыл урожай» шуэм конкурсын, 567 куара люкаса, Вуж Салаусь гуртысь Нурлан Сайфелганиев вормись луиз. Син медаз усьы та пичи пилы. Редакцие лыктонзэ туж витем, нош ини кивалтӥсь солы шоколад но шар сётэмез бере, эшшо но шумпотӥз пияш. Та ик конкурсын 470 куара люкаса Ципьяысь Софья Эшкеева но вормись луиз. Та конкурс сярысь Софьялэн анай-атаез инстаграммысь адӟыса тодӥллям. «Куара сётон мыныку, воксё телефонэн ӧм люкиське», — шуизы соос. Ку нош ик выль конкурс ялоды шуыса но тунсыкъяськизы. Вормисьёсты «Мебельный Дом София» магазинысь валес котыр арбериен пусйимы.

Тау тӥледлы, гажано сайт лыдӟисьёсмы, куара сётон ужрадэ мылысь-кыдысь пыриськемды понна! Вуоноез конкурс «Тужгес оригинальной кормушка» шуыса нимаське. Толалтэлы дасяса кормушкаос лэсьтӥды ке, конкурсэ пыриськыны дыртэ. Та понна BaltasiRed@2005yandex.ru адресэ 30 ноябрёзь туспуктэмъёсты лэзёно. Куара сётон дыр — 1-14 декабрь.