Халтуринъёс — ёросысьтымы дышетӥсьёслэн дано династизы

Проектмы улсын газет лыдӟисьёсмес дышетӥсьёслэн династиосынызы тодматыны кутскеммы бере, «кин сярысь гожтыны луэ» шуэм юанлы ответ ӝог шедиз — Кӧргем гуртысь Халтуринъёсты гожтоно шуыса малпамы. Малы ке шуоно дышетӥсьёслэн династиоссы сярысь вераськон потыку, одно ик тодэ лыктэ Халтуринъёслэн дано семьязы.

Фёкла Владимировна, династиез кутскисьлэн одӥгез, туннэ нуналэ но ас вордскем гуртаз, Кӧргемын, Наташа нылыныз улэ. 98 аресъем песянай, аслаз но кузпалэзлэн Григорий Семёновичлэн улон-вылонзы, ужан сюрессы сярысь вераны шумпотыса соглаш луиз. Пумиськонмылы со рос-прос дасяськем: верано кылъёссэ малпам, Кӧргем школа но солэн ужасьёсыз сярысь куке но «Азьлане» газетын потэм заметкаосты, выльысь лыдӟыса (зэм, 98 аресаз со туж яратыса лыдӟиське), ӝӧк вылаз поттыса дасям вал. Мон со доры вуыку но, ас малпанъёсызлы сётскыса, лыдӟиське вал песянай.

Лыдӟиськыса пукемзэ синйылтэмысь, мар вераны паймыса, вӧзаз пукси, Фёкла Владимировна, киысьтыз лупазэ огпала поныса, ачиз вераны кутскиз:

— Пичи дырысеным лыдӟиськыны яратӥ. Анай-атае грамотной колхозникъёс вал — ӧжытак гожъяськыны, лыдӟиськыны быгатӥзы. Со дыре гуртын сыӵе адямиос чиньыен лыдъямон вал. Соин анай-атаймы милемыз но, асьсэлэсь куать нылпиоссэс, дышетыны, тодон-валан сётыны тыршизы…

Вераз но, дорысьтыз вань арбериоссэ палэнэ карыса, туж сак синъёсам учкиз: мынэсьтым юанъёсты вите, шӧдске. Нош юанъёсы мынам трос луизы, со муген вераськонмы но кема кыстӥськиз — угось Фёкла Владимировна мӧйы адями, вераськытозямы кӧня ке пол шутэтскыса но басьтӥз.

«Милесьтым секыт улонмес нокыӵе кылын но вераса уд быдты»

Фёкла Владимировналэн улонэз висъяны луонтэм герӟаськем аслаз гуртоеныз, эшеныз, вуоно кузпалэныз Григорий Семёнович Халтуринэн. Сое Фёкла Владимировна гажаса «Григорий Семёнович» гинэ шуэ, огпол но «Гриша» но, «Григорий» но шуыса ӧз вера.

Кыкназы ик соос вордскемын Кӧргем гуртын кык ар кусыпен — Григорий Семёнович 1922 арын, Фёкла Владимировна 1924 арын. Пичи, егит дыръёссы одӥг вакытлы тупам бере, соос ог-огзэс тодыса, ӵош будӥллям, эшъяськиллям.

— Школаын кыкнамы но умой дышетскимы. Григорий Семёнович, 7 классэ йылпумъямез бере, Арчаысь педагогической колледже дышетскыны кошкиз, нош мон Ципья школаын 10 классэз йылпумъяй. Секыт вал. Ми Кӧргем школаез 14 ӵошен быдтӥмы, нош Ципьяе дышетскыны мон огнам гинэ мыныны быгатӥ — эшъёсылэн луонлыкъёссы ӧй вал. Нош монэ атай дышетскыны косӥз. Одӥг арын, уг тодӥськы кыӵе муген но мар вал со, школаын дышетсконэз азьланьтон понна котькуд дышетскисьлэсь 150 манет уксё куризы. Соку туж трос нылпиос дышетскемысь дугдӥзы, мон но дӥськутъёсме, арбериосме люкаса, гуртам бертӥськем вал ини, нош атае берыктыса дышетскыны лэзиз. «Уксёзэ но кызьы ке шедьто, дышетскы, нылы», — шуиз. Озьы тӥни 10 классэз йылпумъяй, — мадьыны кутскиз Фёкла Владимировна.

18 июне 1941 арын со шоръёзо школаез йылпумъям сярысь аттестат басьтэ, выпускной ӝытаз ветлэ, нош куинь нуналскын ож кутске — сотэк но секыт улон эшшо но секытгес луэ. Дышетӥсьёс луымтэысь, Фёкла Владимировнаез Ӟаны гуртэ ужаны ӧтё, со пумит уг луы (эшез Григорий Семёнович ачиз Фёкла Владимировнаен вераськем, дышетӥсь луыны кенеш сётэм, интыяськыны но юрттэм). Нош 1942 арын куартолэзе со дыре Кӧргем гуртысь покчиёзо школаын ини кык ар ӵоже дышетӥсь луыса ужам Григорий Семёновичез оже басьто. Со интые Фёкла Владимировна ужаны бертэ — таиз но Григорий Семёновичлэн куременыз.

— Кӧргеме ужаны бертӥ ке но, нырысь Дургаын ужаны тупаз, малы ке шуоно сютэм жугиськон аръёсы Дурга гуртлэн удмурт люкетысьтыз нылпиос Кӧргемысь школае ветлэмысь дугдӥзы. Соин та нылпиосты — соос 12 кузя вал — асьсэ гуртазы дышетыны кулэ шуыса решить каризы. Мон ик соосты, Дургае ветлыса, ньыль ар ӵоже, 1946-тӥ арозь, дышетӥ, — азьланьтэ дышетӥсь.

Секыт, сютэм аръёсы дышетӥсь нылпиосыз понна наставник гинэ ӧвӧл, юрттӥсь, визь-кенеш сётӥсь, матысь адямизы но луэ. Школаын ужан сяна, трос мукет ужъёсы но пыриськоно луэ Фёкла Владимировналы: колхозлы агитациен юрттоно, ваньмон дыръя отын ужано…

— Милесьтым секыт улонмес нокыӵе кылын но вераса уд быдты. Верай ке но, уз оске, дыр… Малы ке шуоно оскымон но ӧвӧл со, — лулӟыса вераз песянай. Малпамтэ шорысь шып кариськиз со. Мар сярысь дас минут ӵоже малпаса пукиз, со ачиз гинэ тодэ. Собере вераз гинэ:

— Гуртмылэн пумаз нюк вань. Со нюкез ми жугиськон аръёсы писпуослэсь «бушатӥмы», одӥг пужымез гинэ кельтӥмы. (Туннэ нуналэ отын выль писпуос но будо ини — Н.Ж.). Нуналъёс школаын ортчизы, ӝытъёс но уйёс — нюлэскын но нюкын. Гуртысьтымы гинэ ӧвӧл, мукет гуртъёсысь нюлэсъёсын но ужамы. Коть тон уйбыт со нюлэскын ветлы, коть уй понна дас минутлы но синдэ эн кыньы — ӵуказеяз ӵукна школае дышетыны мыноно. Сыӵе вал улон.

Та эскеронъёс, шуг-секытъёс Фёкла Владимировнаез чигтымтэзы — кужмогес гинэ кариллям. Со аслэсьтыз ымнырзэ ыштымтэ, котьку ӟечезлы но умоезлы оскем. Ож бырем бере ӟеч малпанъёсыз быдэсмиллям.

Азьланьтонэз вань.