Халтуринъёс — ёросысьтымы дышетӥсьёслэн дано династизы (4-тӥ люкет)

Анай-атайзылэсь ужзэс нылпиоссы азьланьто. Халтуринъёслэн ньыль нылпиоссы пӧлысь куинез дышетӥсьлэсь ӧнерзэ быръё. Игорь Григорьевич Ижкарысь педагогикая институтэз йылпумъя, туж усто суредаське, черчениея но трудъя урокъёсты нуэ. 40 ар ӵоже нылпиослы тодон-валан сётэ, туннэ нуналэ со дано шутэтсконын ини, аслаз семьяеныз Альметьевск город дорын улэ. Тамара Григорьевна но Ижкарысь пединститутэз йылпумъя, Ципья школаын химия, биология но домоводство урокъёсты нуэ. Солэн ужан стажез но ньыльдон арлы матэ. Лякыт сямо, нылпиосты яратӥсь, аслэсьтыз предметсэ туж умой валась но сое нылпиослы капчиен валэктыны быгатӥсь — сыӵеен тодазы ваё сое дышетскисьёсыз. Вячеслав Григорьевич, сельхозинститутэз йылпумъяса, ӧнерезъя кӧня ке ужаны вутске ке но (служить каремез бере Ципьяысь МТС-э ужаны интыяське), сюлмыз сое дышетон удысэ кыске. Небыт, каньыл дышетӥсь Ципья шкоалын трактор предметэз нуэ. 1995-тӥ арын Елабугаысь педагогикая институтэз йылпумъя. Кӧргем гуртын 1976-тӥ арын дышетскисьёс луымтэен школаез ворсало, но Вячеслав Григорьевич аслаз кужыменыз сое 1989-тӥ арын выльысь усьтэ. Выль школа пуктэ, лэсьтӥськон ужъёсы ачиз но пыриське. Со школа 2010-тӥ арозь ужа на. Вячеслав Григорьевич ачиз со школаын ворсаськытозяз дышетэ, директорез но луэ. Покчи нылзы Наташа гинэ дышетон удысэз уг бырйы — со кема аръёс ӵоже Ульяновскысь заводын технолог луыса ужа. Пенсие потэмез дырысен вордскем гуртаз анаеныз ӵош улэ.

Нылпиосыз сярысь Фёкла Владимировна туж данъяськыса вераз.

— Огезлы но дышетӥсь луыны ӧм косэ — асьсэ мылкыдэнызы дышетӥсьёс луизы. Конечно, милемлы со туж шумпотымон вал. Нылпиосмы пичи дырысен милесьтым ужаммес адӟыса будӥзы, вань секытъёссэ но валазы, но ӧз кышкалэ дышетон удысэ вамыштыны, — шуиз со.

Вераськонамы вӧзамы пукись Наталья Григорьевна, Халтуринъёслэн покчи нылзы, итӥськиз:

— Куспазы тупаса, керетытэк улӥзы мамаен папа. Милемыз ӟечезлы дышетӥзы, тодон-валан сётӥзы. Соос кыкназы ик асьсэ ужзылэн патриотъёссы. Кӧня нылпиосты дышетӥзы, кӧня уйёсты ӧз изе… Кӧня адямиос соослы тау каризы — вераса уд быдты. Мамае монэ ӧз дышеты, нош папае историен дышетӥз. Аслам папае луэмысь ӧвӧл, ватытэк верасько — туж тунсыко нуэ вал со урокъёсты. Ми со шоры синмес басьтытэк учкимы, туж сак кылзӥськимы. Сыӵе дышетӥсь вал со. Соин агайёсы но апае дышетӥсь луизы, дыр. Мон гинэ со удысэз ӧй бырйы.

Туннэ нуналэ, жаляса верано, Фёкла Владимировналэсь но Григорий Семёновичлэсь ужзэс азьланьтӥсьёс ӧвӧл ини. Внукъёссы но правнукъёссы мукет удысъёсын тыршо, правнукъёссы пӧлын школаын дышетскисьёсыз но вань али. Но кин тодэ, оло, аръёс ортчыса, дышетӥсьёс луозы на? Соку дано династиез азьланьтӥсьёс но луысалзы.

…Фёкла Владимировнаен кема вераськыса пукимы али. Улон-вылон сярысь но, уж ласянь но. Туж каньыл, небыт, ваньзэ рос-прос валэктыны, кылзӥськыны быгатӥсь песянай со. Улон эскеронъёсты ортчыса, вазь кузпалтэк кыльыса, со улонлы йыркуро луымтэ — улонзэ дано ортчытэм но ортчытэ. Али шумпотыса туспуктэме но усиз — монэ фотое уськыты, пе… Эх, ваньзы интервью басьтоно адямиосы сыӵе луысалзы ке…

Пумыз.