Татарстан буйлап бу мәктәп укучылары 2000-2001 нче елгы малайлар һәм кызлар командасы «Күн туп» Бөтенрәсәй ярышларына кушылып, Сабада узган зона ярышларында I урынны яулап, финал ярышларына юллама алганнар иде.
Малайлар Бөгелмәдә узган финал ярышларында VII урынны яуласалар, кызлар исә Әлмәттә узган финал ярышларында пьедесталның икенче баскычына ук күтәрелделәр. Шушы ук мәктәпнең 1996-1998нче елларда туган кызлар командасы Татарстан беренчелеге кысаларында Мамадышта узган зона ярышларында - II, Казанда үткәрелгән финалда V урыннарда калдылар. Шунысы күңелле, мәктәп кызлары үзләрен Татарстанда гына күрсәтеп калмыйча, Рәсәй күләмендә дә танытырга өлгерде. «Кызларыбыздан Ләйлә Гасанова, Зөлфия Латыйпова, Зәлидә Хөсәе-нова, Илзия Габдрахманова 1999-2000нче елгы кызлар арасында Ульян шәһәрендә узган Рәсәй чемпионатында Татарстан данын якладылар. Казан, Яр Чаллы кызлары белән безнең кызлар уйнавы үзе нинди горурлык. Чемпионатның үз югарылыгында уздырылуы, кызларыбызның медальләр, дипломнар, бүләкләр алуы күңелләребездә бик матур тәэсирләр генә калдырды», дип үз фикерләре белән уртаклашты команда тренеры Рамил Әминов. Әле дә тик ятмыйлар туп тибүчеләр. Күптән түгел генә 1994-1995нче елгы кызлар арасында Сабада узган Татарстан чемпионатының финал ярышларында бишенче урында калсалар, бүгенге көндә мини-футбол буенча республика чемпионатына зур әзерлек эшләре алып баралар. Тагын да зур җиңүләр насыйп булсын сезгә, кадерле кызларыбыз!
Рәсемдә: яраталар да соң туп тибәргә Салавыч мәктәбендә. Ул кызлары дисеңме, малайларымы , быел да җәй буе ял итмәделәр - туп типтеләр.
