Куныр авылының югары оч балалары өчен зур бәйрәм оештырылды

Айгөл һәм Айрис Муллагалиевлар, Ландыш һәм Зөлфәт Нәҗиповлар балалар өчен бик күңелле һәм җанлы бәйрәм үткәрделәр. Хәтерләсәгез, узган ел алар тәүге тапкыр мондый чара оештырган иде. Быел да бу бәйрәм бик оешкан һәм матур рәвештә узды.

Бәйрәмдә балалар өчен концерт номерлары тәкъдим ителде, әти-әниләр табын корды һәм лотерея oyнаштырылды. Барлык катнашучылар зур рәхмәтле булып, бәйрәмнең уңышлы узуына өлеш керткән һәркемгә рәхмәт әйтәләр.

 – Бик күңелле бәйрәм оештырганнары өчен Айгөл-Айрис, Ландыш-Зөлфәт, Рәмзия-Фәнил гаиләсенә Аллаһы Тәгаләнең рәхмәте яусын. Шулай ук хезмәте кертүчеләргә һәм акчалата ярдәм иткән барлык кешеләргә зур рәхмәт. Олысы да, кечесе дә рәхәтләнеп ял итте, уеннарда актив катнашты, лотереяда бүләкләр отты, — дип хәбәр итте Кунырдан актив хәбәрчебез Илзия Нәҗипова.