Лаос делегациясе «Татарстанда эшләнгән» казанышлар күргәзмәсендә булды

Лаос делегациясе Казанның уникаль осталык үзәгендә оештырылган Татарстан казанышлары күргәзмәсендә булды. Делегацияне Лаос Премьер-министры Сонексай Сипхандон җитәкләде. Кунаклар өчен экскурсияне ТР Яшьләр эшләре буенча министры Азат Кадыйров үткәрде.

Кунаклар истәлекле фотолар ясадылар. Лаос Премьер-министры теләкләр китабында язу калдырды.

Күргәзмә экспозициясендә Татарстанның 90нан артык компаниясе һәм оешмасы катнаша. Килүчеләр өчен гомуми мәйданы 4 мең квадрат метрдан артык булган урам һәм эчке күргәзмә зоналары оештырылган.

Урам экспозициясендә 30 берәмлек техника бар, экспонатлар арасында: Ансат-м вертолеты, КАМАЗ, СОЛЛЕРС автомобильләре линейкасы, АТОМ электромобиле, автобуслар, авыл хуҗалыгы техникасы, мобиль медицина комплекслары һәм Татарстан җитештерүчеләренең башка эшләнмәләре.

17-19 июнь көннәрендә Казан Россия – Көньяк-Көнчыгыш Азия дәүләтләре ассоциациясе (АСЕАН) саммитын кабул итә. АСЕАН әгъзалары булган дәүләт башлыклары форум барышында сәүдә һәм инвестицияләр, энергетика, авыл хуҗалыгы, цифрлаштыру, фән, технологияләр һәм инновацияләр, мәгариф, туризм һәм башка өлкәләрдә киләчәк хезмәттәшлек юнәлешләрен билгелиләр.

Татар-информ