Татарстанда туучылар саны кимеде

Татарстанда узган ел нәтиҗәләре буенча туучылар санының гомуми коэффициенты 1,2% ка кимегән. Шул ук вакытта кимү темплары ил буенча уртача күрсәткечтән түбәнрәк булып чыкты. Бу хакта ТР Дәүләт Советының 22 нче утырышында ТР Хезмәт, халыкны эш белән тәэмин итү һәм социаль яклау министры Эльмира Зарипова хәбәр итте.

Аның сүзләренчә, туучыларның суммар коэффициенты репродуктив яшьтәге бер хатын-кызга туры килгән балаларның уртача санын чагылдыра – 15 яшьтән 49 яшькә кадәр. Бер ел эчендә Татарстанда күрсәткеч бер хатын-кызга 1,451 дән 1,434 балага кадәр кимегән. Чагыштыру өчен, Россия буенча кимү 2,8% тәшкил итте.

Министр сүзләренә караганда, республикада гамәлдәге ярдәм чаралары төрле категориядәге гаиләләргә — күпбалалы, аз керемле, студентларга, шулай ук үсеш үзенчәлекләре булган балалар тәрбияләүче гаиләләргә юнәлдерелгән.

2026 елда балалы гаиләләргә ярдәм итүгә Татарстан бюджетында 30,6 млрд сум каралган. Бу үткән ел белән чагыштырганда 24% ка күбрәк.

Вести Татарстан