«Татавтодор» 1 млрд сумга ягулык белән тәэмин итүчене эзли

«Татавтодор» җәмгыяте ягулык карталары буенча АЗСларга бензин һәм дизель китерүгә конкурс игълан итте. Контракт суммасы – 999,87 млн сум. Бу компаниянең рекордлы сатып алуы, дип аңлашыла дәүләт сатып алулары сайты мәгълүматларыннан.

Җиңүче бөтен республика буенча юл предприятиесен ягулык белән тәэмин итү хокукына ия булачак. Шартлар: Казанда кимендә 10 ягулык салу станциясе һәм һәр районда кимендә 3, 1 500 ягулык картасы, срок — 2028 ел ахырына кадәр. Күләме литрларда теркәлмәгән, ул факт буенча билгеләнәчәк. Катнашучылар литры өчен бәя белән түгел, ә тәэмин итүче прайсыннан ташлама белән сату итәләр.

Мартта «Татавтодор» охшаш тендер үткәрде инде — 868 млн сумга. Ул вакытта гаризаны бер катнашучы биргән, аның белән 6,5% ташлама белән килешү төзегәннәр. Бу контракт үтәләме һәм аның яңа конкурс белән ничек ярашуы ачык мәгълүматлардан аңлашылмый. Алдагы шундый ук сатып алулар 2022 һәм 2024 елларда узган иде.

НТР-24