Таузар авылы балалары Эльвира Ибраһимованы онытмый

Талантлы журналист, җәмәгать эшлеклесе, диктор Эльвира Ибраһимованың якты дөньяларны ташлап китүенә тугыз ел булды. Райондашыбызның гомере юл фаҗигасендә өзелде. Әгәр дә исән булса, 5 нче февраль көнне аңа 51 яшь тулган булыр иде.

Таузар авылында туып-үскән кызны авылда онытмыйлар. Шушы көннәрдә Таузар башлангыч мәктәбендә Эльвираны искә алып, аның шигырь укыганын тынлаганнар, тавышын балаларга ишеттергәннәр, музейда аның хакында әңгәмәләр алып барганнар.

— Эльвираның тасмага яздырылган тавышын ишетсәм, әле дә тәннәрем чемердэп куя, — ди Таузар башлангыч мәктәбе директоры Римма Низамова. — Аның тавышы үзенә бер сихри иде бит, һәр кешегә жай таба торган, төшенкелеккә бирелгәннәрнең күңелен күтәрә торган шәхес. Урыны оҗмахта булсын иде.

Искә алуыбыз Эльвира мәрхүмәнең рухын шат кылсын, дога булып барып ирешсен!