Зәңгәр ягулык - дусмы, дошманмы?

Без зәңгәр ягулык куллануга, аның белән һәркем файдалана алуына, куллану уңайлыгына шулкадәр ияләнгән. Күнеккән ки, хәтта анын мәкерле, явыз яклары да күп булуын, үзенә аерым игътибар таләп ителгәнен онытып җибәрәбез. 

Хәвеф-хәтәрләр, ис тиеп агуланулар безнең районда булмаса да, республика күләмендә, кызганычка каршы булгалап тора. Һәм боларнын төп сәбәпләре булып вентканалларның төзек булмавы, хуҗа кешенең законсыз рәвештә газ җайланмаларына үзгәреш кертүе, шулай ук приборларның куллану вакытлары узу, искерүе тора.

Нәрсә генә әйтсәк тә газ котелы, газ плитәсе, колонка — алар барысы да югары дәрәҗәдә куркыныч тудыручы җайланмалар. Кайсы гына төзек булмасын, безнең тормыш һәм сәламәтлек өчен җитди, куркыныч нәтиҗәләр килеп чыгуы мөмкин. Ә боларны булдырмаска ел да үткәрелә торган техник хезмәт күрсәтү булыша. 

Техник хезмәт күрсәтү тәртипләре: Балтач районында зәңгәр ягулык кулланган унөч меңгә якын шәхси хуҗалык һәм күпкатлы йортлар исәпләнә. Закон буенча җаваплылык һәм куркынычсызлык кагыйдәләрен төгәл үтәү йорт хуҗасының турыдан туры бурычы. Ләкин бу, йорттагы кешеләр үзләре газ жиһазларын тикшерергә тиеш дигән сүз тугел. Йорт яки квартира хуҗасы техник хезмәт күрсәтү буенча махсус оешма белән килешү (договор) төзергә тиеш. 

Балтач район газ оешмасы хезмәткәрләре график нигезендә елга бер тапкыр һәр хуҗалыкта һәм күпкатлы йортларга кереп газ приборларына техник хезмәт күрсәтәләр. Аларның эшләре жиһазларның төзеклеген тикшерү һәм мөмкин булган җитешсезлекләрне бетерүдән гыйбарәт. Шулай ук аларның эшенә: газ чыгарган җирләр юкмы диеп карау, вентканалларның һәм төтен юлларының тарту көче булуын тикшерү, көнкүреш газ техникасының газ ягу системасын төрле режимда төзеклеген карау, горелкаларны чистарту, кулланучыларга куркынычсызлык кагыйдәләрен төгәл үтәү буенча күрсәтмәләр (инструктаж) бирү каралган.

Әгәр дә йортта кеше яшәми һәм приборлар кулланылмый икән, бу йортны гариза язып газдан өзеп кую һәр ике як өчен дә отышлырак булачак.

Шулай ук график буенча техник хезмәт күрсәтүче хезмәткәрне өйгә кертмәгән очрак була икән, бу вакытта административ хокук бозулар турындагы Россия Федерациясе кодексының 9.23 маддәсе нигезендә биш меңнән ун меңгә кадәр штраф һәм газны өзеп кую каралган. Штрафлар, үз белдеген белән жиһазларны алыштырсагыз да, техник хезмәт өчен килешү булмаган очракта да салына.

Инде күпләр ишеткәндер, 2025 нче елдан приборларнын куллану срогы чыккан очракта да саллы күләмдә штрафлар кертелде.  Беренче вакытта штраф суммасы биш меңнән ун меңгә кадәр булса, янадан алыштырылмаса штраф күләме егерме биш меңгә кадәр җитә. Һәр газ приборының паспорты бар, куллану вакыты шунда язылган, күпчелек очракта бу 10-15-20 ел. Әгәр прибор хәсият белән кулланылган, чиста-пөхтә, ел саен вакытында техник хезмәт үткән икән, озаграк вакыт та кулланышта була ала, ләкин моның өчен махсус оешмаларга мөрәжәгать итеп приборга диагностика уздырырга кирәк.

Үзебезнең сәламәтлегебез, күршебезнең иминлеге, йортларыбыздагы куркынычсызлык — үзебезнең кулларда. Шуңа да вакытында газ приборларына техник хезмәт үткәртеп, аның өчен вакытында түләсәк, барыбыз да тынычлап яшәр идек.

Ә килеп туган сорауларыгыз булса, эш көнендә иртәнге сигездән кичке бишкә кадәр 2-55-06 номерына шалтыратып белешә аласыз.