Бик тәмле «эремчек тәкәсе» рецепты

Мәрьям Миңнегуловадан «эремчек тәкәсе» рецепты

Камыр өчен кирәк булачак: (гаиләгез ишле булса, күбрәк пешерәсез)

- Ярты чокыр кайнаган салкын су
- 1 йомырка
- 1 аш калагы үсемлек мае
- Тоз чеметеп кенә
- Он

Эчлек өчен кирәк булачак:

- Вак эремчек 1,5 стакан
- 2 йомырка
- Тоз.

Савытка су, тоз, йомырка, маебызны салып болгатабыз да он салып камыр басабыз. Бер 15 минут ял иттерәбез, камыр үзләнсен өчен эшләнелә.
Эчлекне ясый торабыз шул арада. Эремчегебезне ваклыйбыз, тоз, йомырка салып болгатабыз.

Камырны җәеп, түгәрәкләп кисеп, эченә эремчек массасын салабыз да, бөрәбез. Тәкәләребезне тозлы кайнаган суда пешереп алабыз. Суыбызга 1 аш калагы көнбагыш мае салырга онытмыйбыз.

10 минуттан тәкәләребезне сөзеп алып, өстенә ак май сибеп табынга куябыз.

Ашларыгыз тәмле булсын!!!