1870 арысен кутскыса туннэ нуналозь

Покчи Лӧзя гуртын школа кылдытэмын 1870-тӥ арын 9-тӥ коньывуонэ Святитель Гурийлэн Братствоеныз. Со I-тӥ тубатъем земской начальной училище луыса кылдэм. Школаын луэм одӥг Инмар осконлы дышетӥсь, одӥг дышетӥсь, куамын кык дышетскись (кызь пиос но дас кык нылъёс). Школа кык этажъем юртэ интыяськем. 1-тӥ этажын Медведев Андрей Фёдоровичлэн семьяез улэм, нош 2-тӥ этажез школа басьтэм. 

Школа туж кулэ кун функциосты быдэсъям. Кунлы интывылъёсты (территориосты) уже кутон но азинтон понна дышетскем адямиос кулэ вал. Школалэн бадӟым ужпумез озьы ик луиз Казаньысь нырысетӥ архиепископ Гурий дыръя интыысь калыкез христиан осконэ пыртон политикаез нуон. 

Нырысетӥ дышетӥсьёс пӧлысь одӥгез луэ Емельян поплэн нылыз Мария Емельяновна Филиппова. Со школаын 50 ар тырше. Вань улонзэ Мария Емельяновна сӥзе школалы, нылпиослы, туж бадӟым ватсэт пыртэ ёросысь дышетон удысэз азинтонэ. 1920-тӥ арын Дышетонъя министерстволы со педагогика уж сярысь Анкета гожтэ. Пиналъёсты дышетонын но визьноданын бадӟым азинсконъёсыз понна Мария Емельяновна 1949-тӥ арын Ленин орденэн пусйиське. Солы сётэмын Татарской АССР-ысь Дано дышетӥсь ним. 

Вылӥ наградаос басьтэ покчи классъёсты дышетӥсь Кириллова Татьяна Кирилловна но. Со пусйиське Ужысь Горд Знамя орденэн но Ленин орденэн.

1930-тӥ арын нырысетӥ тубатъем школаез выжто азьвыл волостной управленилэн юртаз. 1931-тӥ арын со покчиёзо школа луэ, нош 1933-тӥ −1935-тӥ аръёсы — крестьян егитъёслэн школазы. Школа сизьым классъем луэ. Али та школа интыын нылпи садлэн юртэз сылэ.

1933-тӥ арын сизьым классъем школалы директоре юнмато Алексей Степанович Кушаевез. Со школаын история предметэз дышетэ. Соин ӵош соку ужало Каменских Вера Павловна, Кузьмин Павел Кузьмич, Гринёв Афанасий Павлович, Александров Иван Александрович, Филиппов Александр Филиппович, Медведев Василий Степанович, Барышникова Мария Петровна, Лаврентьев Яким Лаврентьевич, Медведева Елизавета Андреевна, Пчельников Пётр Иванович, Петрова Нина Ивановна, Медведева Мария Никитична, Костина Зинаида Николаевна.

Сизьым классъем школалэн нырысетӥ выпускез луэ 1935-тӥ арын. Школаез йылпумъям сярысь свидетельство 44 выпускникъёс басьто. Соос пӧлысь 10 выпускникъёс наукая но производствоя пӧртэм удысъёсын кивалтӥсьёс, нош 15-ез дышетӥсьёс луо. 

Школалэн авторитетэз будэ. 1939-тӥ арын школалы директоре пукто Василий Семёнович Медведевез, немец кылъя но физкультурая дышетӥсез. Войналэсь азьвыл школа 223 дышетскисез бадӟым улон сюресэ келя. Дышетӥсьёс луо: Букишева Анна Васильевна, Ишмурзина Анна Кузьминична, Григорьевна Марфа Григорьевна, Михайлова Елизавета Александровна, Игнатьева Клавдия Игнатьевна, Иванов Александр Иванович, Макарова Евдокия Александровна.

Котькытын сямен, секытэсь луо Быдӟым тылож аръёс. Адямиослэн тупаса улонзы куспетӥ луиз. Малпанъёс, яратон, шуд — ваньзэ ӵушказ лек, вир кисьтӥсь ожлэн тылыз. Школаысь 314 выпускникъёс фронтэ кошко, со пӧлысь 160-эз гинэ берытске. 

Быдӟым Атыкай ож школалэн коллективез понна но туж секыт шуккет луэ. 12 воргорон дышетӥсь пӧлысь 11-ез фронтэ кошке. Соос пӧлысь куатез ожлудын йырзэс поно. Со Кушаев Алексей Степанович, Кузьмин Павел Кузьмич, Гринёв Афанасий Павлович, Медведев Василий Степанович, Лаврентьев Яким Лаврентьевич но Бегеев Николай. Ожысь бертыны шуд усе Ишмурзин Иван Гурьевичлы, Макаров Иван Егоровичлы, Дмитриев Георгий Михайловичлы, Кушаев Иван Семёновичлы, Филиппов Александр Филипповичлы. Дышетӥсь нылкышноос пӧлысь фронтэ кошке Арыкова Мария Петровна. 

Секыт ож аръёсы школалэн директорез луэ Фадеев Флор Фадеевич, географиен усто дышетӥсь, кудӥз аслэсьтыз улонзэ сӥзе егит поколениез визьноданлы. Дышетон но кадръёсты дасянэ бадӟым люкет пыртэмез понна Флор Фадеевич Татарской АССР-ысь Дано дышетӥсь ним басьтэ но вылӥ кун наградаосын — Ленин но Трудовой Горд Знамя орденъёсын пусйиське. 

Бӧрысьгес, егитъёсты визьноданын дано сям-йылолъёсты утьыса, директорлэсь удыссэ азинтэ Чакмин Василий Сергеевич. Нимысьтыз гажамон луэ Кушаев Иван Семёнович, кудӥз фронтын секыт сӧсырмемез бере вордскем палъёсаз бертэ но, директор луыса, школалэн улон-вылонэз понна кыл кутонэз ас вылаз басьтэ. 

Та секыт аръёсы ужало таӵе дышетӥсьёс: Михайлова Любовь, Алексеева Мария, Каменских Вера Павловна, Хмылко Лидия, Костина Зинаида Николаевна, Филиппова Мария Емельяновна, Никифорова Евдокия Максимовна, Медведева Елизавета Андреевна, Медведева Ольга Андреевна, Плотникова Любовь Ивановна. 

Война аръёсы школаын ужало мукет городъёсысь эвакуировать карем дышетӥсьёс но. Соос школаын выль дышетон амалъёсты улонэ пыӵато. Таин валче школа ёросысь тужгес устоен лыдъяське. Соин ик мукет гуртъёсысь тросэз анай-атайёс пиналъёссэс Покчи Лӧзя школае дышетскыны келяло. Ож аръёсы школаез 111 дышетскись йылпумъя. 

Выпускникъёс но дышетӥсьёс пӧлын вань сыӵеосыз но, кудъёсыз асьсэды зэмос боевой офицеръёсын возьмато, вылӥ воинской званиосты басьто. Подполковник Мухин Пётр Владимирович, лейтенант Ишмурзин Иван Гурьевич, старшой лейтенантъёс Макаров Иван Егорович но Плотников Алексей Тихонович сыӵеос пӧлысь. Тросэз выпускникъёс кышкатэк ожмасько фронтъёсын, кун наградаос басьто. Горд Кизили орденэн, Ожгар слава орденэн пусйисько: Петров Александр Павлович, Романов Михаил Сергеевич, Наумов Николай Александрович. Горд Кизили орденлэн кавалеръёсыз луо Афанасьев Николай, Ишмурзин Иван Гурьевич, Красильников Пётр Павлович, Медведев Александр Гаврилович, Мухин Пётр Владимирович.

Асьме калык котьку дась кунмылэсь тунсыкъёссэ утьыны. Покчи Лӧзя школалэн выпускникъёсыз но дышетӥсьёсыз ожгар долглы оскымон луэмзэс возьмато кунмылэн историысьтыз тужгес секыт вакытъёсы, пӧсь интыосын ожмаськонэ пырисько тросэз выпускникъёс, Соос Афганистан но Чечен Республика палъёсын утизы тупаса улонэз. Туннэ школалэн выпускникъёсыз нимысьтыз ожгар операциын возьмато Атыкай музъеммылэсь тунсыкъёссэ утьыны дась луэмзэс.

Быдӟым тылож бере кутске тупаса улон, школа трос воштӥськонъёс пыр потэ. Со аръёсы школаез азинтон понна кыл кутыса ужало пӧртэм директоръёс, котькудӥз соос пӧлысь трос кужымзэ понэ патриотъёсты но ас удысысьтыз профессионалъёсты, выль поколение будэтон понна. Война бере сизьым классъем школалэн директоръёсыз луо Плотников Фёдор Алексеевич, Ишмурзин Иван Гурьевич, Бурлакова Екатерина Аркадьевна, Ложкин Иван Григорьевич, Бабинцев Леонид Васильевич. Соослэн тыршеменызы, школа дышетон но визьнодан ласянь вылӥ стандартъёсты уте, вордскем шаерлэсь историзэ но культуразэ гажан сямъёсты пыӵатыны юрттэ.

Школалэн историез тырмемын пусйымон нуналъёсын но шӧдскымон учыръёсын, котькудӥз солэн улоназ мур пытьы кельтэ. Одӥгез туж кулэ этап луэ 1963-тӥ арын кирпичлэсь лэсьтэм школалэсь нырысетӥ люкетсэ лэсьтыны кутскон. Соку школаен кивалтэ географиен дышетӥсь Иванов Николай Иванович. Дышетон удысынужало: Медведева Ольга Андреевна, Медведева Валентина Ивановна, Медведев Анатолий Кузьмич, Филиппов Вениамин Дмитриевич, Савельева Зинаида Андреевна, Степанов Анатолий Васильевич, Шафигуллина Ляля Галиевна, Кушаева Людмила Ивановна, Иванов Александр Николаевич, Плотникова Любовь Ивановна, Миронова Галина Васильевна, Антонова Наталья Николаевна, Бегеева Любовь Михайловна но трос мукетъёсыз. 

История азьланьтӥське, 1974-тӥ арын эшшо одӥг бадӟым уж радъяське — школалэсь кыкетӥ люкетсэ лэсьтонэз йылпумъяло. Та уж нуиське выль директорлэн Байтуганов Пётр Васильевичлэн, химияя дышетӥсьлэн, сак кивалтэмез улсын. Пётр Васильевичлэн тыршеменыз, школа туала тус басьтэ, пиналъёсты ӟеч дышетыны но будэтыны умой луонлыкъёс кылдытэ. 

Байтуганов Пётр Васильевич дышетон удысэ туж бадӟым ватсэт пыртэ но калыкез дышетон удысысь методист но отличник ним басьтэ. Ӵапак со кивалтон дыръя школа шоръёзо тодон-валан сётон юрт луэ но аслаз историяз выль бам усьтэ.

Озьы 1990-тӥ арын тямыс классъем школалэн базаяз шоръёзо школа усьтӥське. Нырысетӥез выпуск 1992-тӥ арын луэ — 31 дышетскись басьтэ шоръёзо школаез йылпумъямез сярысь аттестат. Школалэн директорез соку историяя дышетӥсь Степанов Анатолий Васильевич луэ. Со туж бадӟым ватсэт пыртэ школаез но исторической дышетонэз азинтонэ. Солэн кичӧлтэмезъя школаын историко-краеведческой музей усьто, со туннэ нуналозь но ужа. 

Соку ик тыршизы синмаськымон дышетӥсьёс: Савельева Зинаида Андреевна, Васильева Лидия Михайловна, Гайсина (Борисова) Светлана Николаевна, Медведева Нина Петровна, Хасанов Ильдар Габдулхаевич, Гарапшин Ринат Мубаракшинович, Гирфанов Фаргат Рафкатович, Медведева Инна Ивановна, Пчельникова Ольга Мироновна, Моисеева Нина Михайловна, Плотникова Тамара Валентиновна, Волкова Надежда Александровна, Ибрагимов Рамиль Галимуллович, Васильев Василий Петрович, Хайруллина Лидия Тимофеевна, Петрова Галина Денисовна, Мухина Валентина Леонидовна, Иванова Екатерина Денисовна, Бускина Любовь Пантилеймоновна, Галимова Роза Рафаэловна, Зарипова Рамзия Рамиловна, Галимзянова Наиля Салиховна но мукетъёс. 

Школа туж утьыса возе пионеръёслэн огазеяськоназы пыӵам нылпиослэсь ӟеч сямъёссэс. Татын куке но чузъяськизы задор лозунгъёс, ортчылӥзы торжественной собраниос но эшлыко ужрадъёс. Горд галстукъёс, туризмъя шулдыр слётъёс вордскем шаерез яратон но юн эшъяськон атмосфераын будӥсь котькуд нылпилэн сюлэмаз вунонтэм пытьы кельтӥзы. Но Совето кун куашкам бере пионерия пумен улэмысь дугдэ. Озьы ке но егитъёслэн огазеяськыны мылкыдзы возиське, дышетон учреждениослэн борддоръёсазы егитъёслэн выль огазеяськонъёссы кылдыны кутско. Та вакытэ Галина Денисовна Петрова нылпиослэсь ваньмон дырзэс кема аръёс ӵоже радъясь но нылпи огазеяськонъёслэн азьветлӥсьсы луэ. Ӵапак солэн тыршеменыз но мыло-кыдо луэменыз нылпи общественность выльысь улӟе. Галина Денисовна ньыльдон арлэсь кема школаын вожатой луыса ужа, пиналъёсын творческой ужен выре. 

Туннэ эстафетаез куто школьникъёслэн туала огазеяськонъёссы. Нылпиослэн но егитъёслэн клубъёссы, волонтёръёслэн кичӧлтонъёссы, спортъя секциос но творчествоя студиос пиналъёслы быгатонлыкъёссэс азинтыны, пайдаё сямъёс кылдытыны но мерлыко улонэ мыло-кыдо пыриськыны луонлык сёто.

2008-тӥ арын Покчи Лӧзя гурт поселенилэн со дырысь главаезлэн Петров Николай Александровичлэн кичӧлтонэзлы луыса, выль школа пуктон сярысь вазиськон гожтэменыз, вордске малпан туала дышетон юртэз кылдытон сярысь. Соку туж бадӟым инты басьтэ интыысь кенешлэн депутатэз Султанов Ильдар Мухаметханович, солэн мыло-кыдо юрттэменыз Николай Александровичлэн кичӧлтонэз ас емышсэ сётэ, ӝоген бадӟым лэсьтӥськон ужъёс кутско но 2010-тӥ арын улыно-вылыно школа усьтӥське. Школаен со вакытэ кивалтэ Хакимов Рафис Хабибулхакович. 

Рафис Хабибулхакович педагогической карьеразэ кутске 1981-тӥ арын ӵапак Покчи Лӧзя тямыс классъем школаын физкультурая дышетӥсь луыса. Солэсь дышетонын тыршемзэ кунмы вылӥ дунъя: со «За заслуги в образовании» пусэн но «Лучший работник физической культуры ТАССР» нимен, Татарстанысь но Россиысь Дышетонъя но наукая министерстволэн данъян грамотаосыныз пусъемын. 

2013-тӥ арын Рафис Хабибулхаковичез воштэ Исмагилов Марат Фаритович. Нош 2018-тӥ арын эстафетаез кутэ выль азьветлӥсь — Гарипов Эмиль Наилевич, спортъя школалэн опытной кивалтӥсез. Нош али школалэн директорез луэ Хакимов Нияз Филсурович, англи кылъя дышетӥсь. Вераны кулэ, котькудӥз та кивалтӥсь школалэн историяз, солэн азинскон сюресаз аслэсьтыз бадӟым люкетсэ пыртэ.

55 ар ӵоже школаын кӧня событиос ортчо. Мар ке но вунэ, но тросэз тодэ ваёнъёсы кыле но историлы пӧрме. Тодэ кылё та историез кылдытӥсь адямиос но, отын тодон-валан басьтэм дано муртъёс но. 

Покчи Лӧзя школаысь дышетӥсьёс пӧлын вань дано педагогической династиосты, семьяосты азинтӥсьёс, кудъёсаз профессия выжыысен выжые кӧче. Соос дышетскисьёслы гинэ ӧвӧл, асьсэлэн нылпиоссылы, нунокъёссылы ӧнер опытсэс но быгатонлыксэс сётӥзы, нылпиосты визьноданъя семья йылолъёсты кылдытӥзы. 

Тужгес паймытэ Медведевъёслэн педагогической династизы. Выжыысь выжые соос асьсэлэсь кибашлы луэмзэс но нылпиосты яратэмзэс возьмато. Паймымон, ӵошен соос туж бадӟым педагогической стаж люказы — 668 ар. Отчы пыро 36 пала педагогика удысын ужасьёс: директоръёс, завучъёс, классэн кивалтӥсьёс, дышетӥсьёс-предметникъёс но сюлмаськись воспитательёс. 

Егоровъёслэн выжыысьтызы педагогической династия но дышетон ужлы бадӟым пайда сётэ, вылӥ профессионализм но ас призванизылы оскымон луэмзэ возьматэ. Та выжыысь 32 представительлэн дышетон но визьнодан стажзы огъя 616 ар лыдъяське. 

Степановъёслэн выжыысьтызы дышетӥсьёслэсь династизэс но пусйымон. Соослэн огъя стажзы 214 ар луэ.

Дышетӥсьёс сяна, школаын быдэс команда профессионалъёс вань: технической ужасьёс, сиён пӧзьтӥсьёс, нылпиосты нуналлы быдэ автобусэн нуллӥсь водительёс, порядокез утись но дышетскисьёслэсь но персоналлэсь каньыллыксэс утись охраная служба, библиотекарь, делопроизводитель. Соос туж бадӟым уж лэсьто, школалы каньыл но кышкыттэм улон кылдыто.

Котькуд школаын сямен Покчи Лӧзя школалэн но аслаз данъяськымон дышетскисьёсыз вань. Соос школалэн историезлэн оглюкетэз луо, вуоно поколениослэн улоназы яркыт пытьы кельто. 

Школаысь дано выпускникъёс пӧлын нимысьтыз инты басьтэ Григорий Сергеевич Медведев — удмурт литератураысь дано писатель (ӵапак солэсь нимзэ нуллэ школа но). Та школаез йылпумъям эшшо одӥгез тодмо адями — Иван Васильевич Яковлев — дано тодосчи но педагог, удмурт калыклэн правоосыз понна кужмо нюръяськись. Партийной ужез быдэсъясь Медведев Александр Семёнович (Удмурт АССР-ысь калыкез дышетонъя отделлэн кивалтӥсез, облисполкомлэн тӧроез луыса ужам, Чечено-Ингушской АССР-лэн Верховной Советэзлэн президиумаз тыршем, Ужысь Горд Знамя Орденэн пусйиськем адями) но Покчи Лӧзя школаын дышетскыса тодон-валан басьтэм.
Покчи Лӧзя шоръёзо школа 441 выпускникез поттӥз. Туннэ нуналлы дышетсконзэс медален йылпумъязы 20 выпускникъёс. Выпускникъёс пӧлын вань пӧртэм удысъёсысь дано специалистъёс: тодосчиос, лэсьтӥськисьёс, ожгарчиос, ужбергатӥсьёс, лулчеберет но гурт удысын ужасьёс, эмтодос удысын ужасьёс, инженеръёс, дышетӥсьёс но мукет. Котькудӥз соос пӧлысь аслэсьтыз призванизэ шедьтӥз но быръем профессияз азинсконъёс басьтӥз.

Дасяз Ольга Плотникова

(Материал гожтэмын Покчи Лӧзя школалэн юбилеезлы сӥзем ужрадлэсь сценарийзэ уже кутыса).