95 ар ӵоже сузьем узырлык!

Сӥзьыл куазьлэн кадь ик адямилэн улоназ но пӧртэм буёлъёсын тырмем вакытъёсыз луо. Егит вакытэз сяськаяськись писпуэн ӵошатӥськом ке, пересьмонэз шуныт куазен но ӵужо-гордо писпуэн адӟиськом.

Куазьлэн таӵе шундыё, эркиясь вакытаз ик вордӥське Анна Андреевна но. Бен, улонэз туала нылпиослэн кадь гань-гань уг ортчы. Секыт ужъёслы но куддыр дышоно луэ, ӝожтӥськытэк, вань секытъёсты вылаз басьтыса ик ортчизы аръёс.

(90 аресъем юбилейзэ пумитамез но семьяез сярысь рос-прос газетлэн 2019 арын потэм 38-тӥ номераз лыдӟыны быгатоды — Ю.Щ.). 

Бадӟым Лӧзялэн I-тӥ люкетаз вордӥськем Анна Андреевна, пинал дырысеныз ик Покчи Лӧзя гуртэз матын адӟем.

— Мон нокытчы уг потаськы вал ук, котьку дорам пукылӥ. Пичи дыръя анай-атайлы но юрттоно вал, пӧртэм ужъёсы но пыриськылӥм. Бадӟымъёслэсь адӟыса, ваньмызлы дышиськом вал, кытын ини дышетозы, дырзы ӧй вал.

Соин но, луоз, задор мылкыдо песянай гажамон вакытаз вуыса но ужлэсь шутэтскыны уг дырты, ялан сюлэмез ужаны дыртэ.
Шумот нуналэ юбилярлэн нуналэз копак мукет луиз. Ӵукна ик ӟечкыланъёс вуизы, шуныт мылкыдэн тырмем ӵыжы-выжыосыз шумпотыса вуизы яратоно адямизы доры. Песянаез доры вань нунокъёсыз бертӥзы. Матысьёсыз пӧлын ик юбиляр ёросысь кивалтэтэз но пумитаз. Дано лыдпусэныз ӟечкыланы со доры лыктӥзы Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов, Покчи Лӧзя гурт поселенилэн главаез Айдар Исмагилов, калыклы социальной юрттэт сётонъя «Наз» центрлэн директорез Фания Юсупова. 
Юбиляр песянай доры беромыса вуи ке но, песянай ӧз ӝожомы. Пальышась ымнырын пумитаз. Журнал-газетъёссэ палэнэ карыса, юанъёслы валэктон сётӥз. 

— Сюлэмды ужтэк пукыны уг чида шуо али. 

— Со но та ужен вырыны тыршисько ай. Дорысьёс тышкасько, но тэк пукыны сюлэмы уг чида, зэмзэ но, маин ке выроно. Уж — со ноку но мултэс уг луы ведь. Дугдӥд ке, улон но дугдэ, дыр, кадь потэ. Озьыен, нуналэд но ӝог ортче, мугоред но кыда. Ми пичи дырысен ик ужаса будэмын. Котькытчы пыдын ветлоно луэ вал. Соин кема улӥсько ни, дыр.

— Анна Андреевна, тӥ котьку дорады пукиды шуыса верады. Нош кызьы тӥ вуоно кузпалэныды тодматскиды?

— Школаын дышетскеме бере ик банке ужаны интыяськи. Отын ик карт луонолэн атаез ужа вал. Со мадиз меда мон сярысь, уг тодӥськы. Армиысь бертэм бераз тодматским но кышнояським. Вить арзэ кузпалэлэн анай-атаеныз валче улӥм на. Соос туж умой адямиос вал. Мон ӵукна но ӝыт ву гинэ нуллӥсько вал, мукетсэ анайзые ачиз лэсьтылӥз. Юртамы покчи кен лыктэм бере ини малпаськоно луиз, ма карыны. Ӵапак сӥзьыл куазь вал, ваньзы картофка окто. Мон шуисько картэлы: «Ваньзы тӥни картофка окто, асьмелы но копано, дыр». Озьыен, асьмелы корка ӝутӥм, яна потӥм. Пудо-живот но вордӥм, собере ини нылпиосмы но вордӥськизы. Картэ пенсие потытозяз но, пенсие потэмез бере но, 2-3 ар колхозысь амбарын заведующий луыса ужаз. Соку ю тысь но трос луэ вал али, складъёсын пасьёс луылӥзы. Соосты ӵоксаны но ветлӥ. Сое Балтасе ӧтьыкузы, мон кыли интыяз, ужзэ быдэсъяй. Озьы тӥни быдэс семьяын колхозын ужамы шуыны луэ. Сотэк уг луы. Котькуд семьяын ог-огедлы юрттоно ук. Ваньзэ валче ужамы. 
Анатолий Кузьмич сярысь вераськыку, дорамы Валентина нылэз но вуиз. 

— Атаймы туж сюлмаськись вал. Ожын ветлӥз ке но, сямызъя туж небыт вал. Солэсь троссэ тодӥм. Ужлы но дышетӥз. 2010 арын ветеранъёслы шуыса корка пуктӥзы но, атай, анай но мон татчы улыны выжим. Атайлэн егитъёслы люкетэмез уг поты вал.

 
— Анна Андреевна, ӟуч семьяын будыса, удмурт гуртын улыны секыт йӧтӥз-а?

— Соку али татын тросэз ӟучъёс вал. Берло дыръёсы гинэ удмуртъёс трос луизы. Но удмурт кылын валасько, уг вераськиськы гинэ. Азьло дыре озьы но тазьы пӧртэм адямиосын пумиськоно луылэ вал. Бигер-а, ӟуч-а, удмурт-а — татын пӧртэмлыкез ӧй вал. Адями — вань адями, нош кыӵе кылын вераське — соиз кыкетӥ планэ кыле. 

— Вань улондэс тодэ вайыса, 95 ар улыса, сое шудоен лыдъяны быгатӥськоды-а?

— Одно ик. Улонын шумпотонъёс тросгес вал. Секыт дыре вордӥськыса будӥ ке но, ӝожтӥськон палъёсы ӧвӧл. Адямиос кадь ик улӥм. Шуг-секытъёсмес валче ортчим, шумпотонъёсты огазе пумитамы. Туннэ нуналлы 12 внукъёсыным но 17 правнукъёсыным данъяськыны быгатӥсько. Ваньзэс нимзыя соку ик вераны но уг быгаты кадь потӥсько (серекъяса). Шудо вал улонэ. Туннэ нуналлы ваньзы сӧл-таза, ужало, будо. Мыным мар кулэ на ини. Шуныт валес, ӟеч кыл. Ваньмыз вань, Инмарлы тау.

Сыӵе тӥни асьмелэн арлыдоосмы. Секыт пинал дырез, ужысь секытэз ортчыса но, соос туннэ нуналлы тау карыса, шумпотыса уло. Гумырзы кузь медло, висьытэк, тэльмырытэк пересьмонзэз мед пумиталозы, 100 аресъем юбилейзэс котькуд арлыдомы мед пумиталоз вал. Нош асьмелэн валтӥсь ужпуммы — соосты утён, сюлмысь вераськон, ӟеч кыл веран.