Адями улон сюрессэ ачиз быръе

Арлыдоос ке вань гуртын, солэн историез но узыр луэ. Зэмзэ ик, макем тросгес вераськиськод арлыдоосын, сокем мургес луо тынад тодон-валанъёсыд. Соос улонын троссэ адӟемын: кыӵе гинэ учыръёсын пумиськемын ӧвӧл, пӧртэм шуг-секытъёсты ортчемын, озьы ке но улон шоры пальпотӥсь ымнырын учко, ужтэк пукыны уг быгато, котьку азьлань дырто.

Паймымон, тазалыксы вань кужымзэс поныса ужаны уг ке но сёты, ас быгатэмзыя ветло, юрттыны тыршо, шутэтсконэз уг валало. Туж данъяськымон, куке арлыдоос пӧлын вань на кема улӥсьёс, кудъёсыз шумпотыса визьнодзэс сётыны дась, йыг-йыг пыд йылазы сыло. Соослы луыса гуртлэн зэмос историез ыштэмын ӧвӧл.

Бадӟым, 90 аресъем юбилейзэ Пантилемон Сергеевич пумитаз 25-тӥ инвожое ас матысь адямиосыз пӧлын. Мур гажаса но сӥлы карыса, юбиляр доры куное лыктӥзы Балтась ёрослэн главаез Рамиль Нутфуллин, социальной дурбасьтонъя ёзэтлэн кивалтӥсез Алсу Гатиятуллина, ёросысь ЗАГС-лэн кивалтӥсез Зухра Ахметханова, «Яна тормыш» возёслэн кивалтӥсез Магсумзян Сайфутдинов но Янгул гурт поселенилэн главаез Раниль Габдрахманов. Соослэн шуныт ӟечкыланъёссы, ваем кузьымъёссы Пантилемон агаез туж шумпоттӥзы, куноосты со ӟеч мылкыдын пумитаз.

Пантилемон Сергеевич туж зӥбыт воргорон, кудӥз котьку котырысь дунне, инкуазь понна сюлмаськыса улӥз. Вераськыны но со шумпотыса соглаш луиз: «Таӵе бадӟым кариськоды. Мон быдэс районлы тодмо луисько ни-а табере?» Сыӵе ӝутӥськем мылкыдын вераськыны тунсыко вал соин, эшшо ке дораз кышноез, Мария Кузьминична, пальпотыса, верамъёссэ ватсаз-тупатъяз.

Вордӥське Пантилемон агай 1933-тӥ арын Вуж Кушкет гуртын Сергей но Агафья Карабаевъёслэн семьяязы. Семьязы бадӟым луэ: Пантилемон агай сяна, Мария нылзы, Елизар, Николай, Валентин пиоссы вал на. (Туннэ нуналлы Пантилемон но Елизар ас гумырзэс ортчыто Вуж Кушкет гуртын ик. Мария апайзы югыт дуннеысь кошкемын ни, аслэсьтыз улон гумырзэ вордӥськем Вуж Кушкет гуртаз ик ортчытӥз, Елизар вынызлэн семьяяз. Николай вынзы кулӥз, нош Валентин ивортэк ышемын). Шимес дыръёс вуизы Карабаевъёслэн семьяязы, куке кутскиз Быдӟым Атыкай ож: фронтэ басьтӥзы семьялэсь пыкетсэ — Сергей Васильевичез. Вань гурт понна та секыт дыр луиз: котькуд семья фронтэ келяз матысь адямиоссэ, соин сэрен быдэс пиосмурт ужъёс нылкышноослэн но егитъёслэн, пересьёслэн но пиналъёслэн пельпумъёсазы усизы. Пантилемон Сергеевич, семьяяз бадӟымез пи луэм бере, туж егит ке но вал, ӧз кышка ас вылаз секыт воргорон ужъёсты басьтыны. Секыт но кышкыт аръёс дышетӥзы нылпиосты ӵошен луыны, ужъёсты дэмен быдэсъяны, огазе шуг-секытъёсты ортчыны, анайзылэсь тыршемзэс гажаны но солы юрттыны, улонын асьсэ кужымзылы гинэ оскыны. Вань кужымзэ сётыса пияш тыршиз юртъер котыраз ужъёсты быдэсъяны: Елизар выныныз кут кутаны, сапег лэсьтыны но вутскиллям, уробоен, салазкиен возьёсысь кылем турынэз но нуллӥллям. Гуртын туж трос ужъёс луиллям, али дыръёсын ӵошатыса, трослы секытгес, озьы ке но нокыӵе ужлэсь палэнэ кыльымтэзы. 7 классэ йылпумъяса, Пантилемон ужаны кутске колхозын: уйин валъёсты возьма, октон-калтон дыръёсы комбайнын юрттыса ветлӥсь луэ.

1945-тӥ арын вань калык понна шумпотон ивор вуиз: ож быриз, кема возьмам вормон вуиз. Котькуд семья аслэсьтыз матысь адямизэ гуртаз возьмаз. Жаляса верано, Сергей Васильевич ивортэк ышиз… Котькуд пиналэз понна атайзы зэмос воргорон, герой луыса кылиз. Соос тодо: вормонэз матэктытон ужын атайзылэн но кужымзы пыртэмын. Соин ик секыт улон дыръёсазы, соосыз шунтылӥзы атайзы сярысь сайкыт тодэ ваёнъёссы, куке соос, одӥг бадӟым яратӥсь семья луыса, вал ваньзы ӵош…

1952-тӥ арын 19 аресъем Пантилемон — зӥбыт но секыт ужъёслы дышем пияш — кошке армие, Горький (али Нижний Новгород) каре. Службаез кыстӥське 3,5 ар. Служба дыръёссэ тодаз вайыкуз, мылкыдыз воштӥськиз, секыт вал, гурт пиос шоры мукет синъёсын учкизы, шуиз. Карысь егитъёс трослы бадӟымгес но ӝужытгес вал, но гуртысь пияшъёслэн вал плюссы: секыт ужъёсты быдэстыса кужымзы тросгес, котькуд шуг-секытэз соос вормыны дышемын. Армия бере кутске мукет улон: гурт понна, калык понна ужан, семья кылдытон, ужан ӧраз инты шедьтон. Улон но ужан сюрессэ утчан вуттэ Пантилемон Сергеевичез гуртысьтыз ик Ворошилов нимо колхозэ. Со дыръёсы Вуж Кушкет гурт туж бадӟым вылэм на, одӥг гурт понна гинэ но кык колхоз кылдытэмын луэм: «Ворошилов» но «Коммунар». Пантилемон агай колхозын амбарын кладовщик луыса ужа. Таӵе ужын сак но ваньзэ дыраз лэсьтыны быгатӥсь адями луыны кулэ. Аслэсьтыз сыӵе умой сямо ужась луэмзэ воргорон ужанъяз юнматӥз гинэ. 1958-тӥ арын Вуж Кушкет но Янгул гуртъёс кылдыто выль колхоз «Яна тормыш». Ассэ умой паласен возьматэм Пантилемон Сергеевич аслаз ужан интыяз ик кыле. Пенсие потон дырозяз, вань сюлэмзэ сётыса, уйёсты изьытэк та ужын ик ужа со. Пенсие потэм бераз но, ужтэк пукыны ӧз быгаты: гуртысь фермаын уйин эскериськись луыса тыршиз. Пиосмурт сюлэм котьку тыршиз семьяезлэсь улонзэ каньыл, умой карыны. Шоро-куспо улэмзы чик но ӧз сюлмаськыты, валтӥсез — семья куспын, бускельёсын тупаса улон.

Котькуд егит адями понна яратон бадӟым инты басьтэ. Матысь адямиен вераськыса, сюлэм но буйга. Яратӥсь адями быдэс улон сюресын оскымон юрттэт луэ. Сюлэмезлы матысь адямизэ Пантилемон Сергеевич шедьтэ Вуж Кушкет гуртысь ик — Мария Кузьминичнаез. 1960-тӥ арын соос кузпалъясько но юн семья кылдыто. Семьяязы вордӥсько Александр (1961) пизы но ньыль кузя нылъёссы: Галина (1962), Татьяна (1965), Любовь (1967) но Елена (1977). Ачиз Мария Кузьминична егит дыръёссэ пальпотыса тодаз вае. Кызьы тодматскиды шуыса юам бере, со серектӥз но шуиз: «Со (Пантилемон Сергеевич — ред.) туж вераськись ӧй вал, котьку серьёзной ымнырын. Егитъёсын огазе ветлӥм, ог-огмес адӟылӥм, озьы ик вераськылӥм, нош одӥг нуналэ кышно карыса пыртӥзы». 5 ар кузя егит семья улӥз анай-атайзылэн юртазы, собере ас улон интызэс лэсьтыны кутскизы: асьсэ кужыменызы корка пуктӥзы, лэсьтӥськон арбериоссэс отысь но татысь шедьтыса. Дыр ортчиз: егитъёс ужазы, пиналъёссы будӥзы, вордӥзы скал, ыжъёс, пӧртэм пудо-живот. 64 ар ӵоже ини Пантилемон Сергеевич но Мария Кузьминична яратыса, ог-огзэс гажаса, валаса уло, ӵошен котькуд шуг-секытъёс но шумпотонъёс пыр ортчо, адӟем карымон кузпалъёс луо.

Туннэ нуналлы Пантилемон Сергеевич зэмзэ ик шудо воргорон луэ: вӧзаз пальпотӥсь но яратӥсь кышноез, юртсэс юнмато Елена нылзы (Янгул гуртысь ветеринарной больницаын лаборант луыса тырше), Александр эмеспизы (ёросысь сюрес лэсьтонъя управлениын ужа. Со сяна, валъёсты вордэ, ёросысь ӵошатсконъёсы пыриське) но соослэн нылпиоссы: Ульяна но Яков. Арлыдо воргоронлы трос кулэ ӧвӧл: каньыл улон, шундыё куазь, яратӥсь семья, валась бускельёс. Ваньзэ адӟем пиосмурт улонлы уг ӝожтӥськы, шумпотэ туала улонлэн трос поллы азьлане вамыштэмезлы. Юртазы вордо пӧртэм пудо-животъёсты, ужъёслэсь куштӥськыны сюлэмез уг дырты на. Ӵужанаен-ӵужатайзы понна Ульяна внучказы (10-тӥ классэз йылпумъяз) дышетскон но общественной ужъёсын зэмос данъяськымон луэ, Яков внуксы (7-тӥ классэз йылпумъяз) озьы ик туж тыршись но юрттӥсь луыса будэ. Нылпиоссы пӧртэм улосъёсын уло ке но, яратоно анай-атайзы доры ӵем бертыло, асьсэлэсь юн гажан мылкыдзэс верало. Соослэн ӵошен люкаськемзылы шумпото арлыдо кузпалъёс, котьку доразы возьмало. Вань нылпиосыз визьнод сётэмез понна тау каро но сюлмысь бадӟым юбилееныз атайзэс ӟечкылало, юн тазалык, каньыл улон сӥзё.

Юлия Щербакова