«Адямилы кулытозяз но сюлмаськоно ини…»

Вера Семёновна Шадрова монэ пумитаны ураме потэм вал. Солэн мусо но пальпотӥсь ымнырыз шоры учкыса, ачим но пальпотӥ. Тямыстон куать аресэз шоры учкытэк, со али но егитъёс кадь поръяса ветлэ, али но солэн синъёсыз чиляло… Но матэгес лыктэме бере, син шораз эшшо огпол пыр-поч учкеме бере, валай: та синъёс туж трос кайгу-куректон адӟиллям ини…

Вера апай 1935-тӥ арын Пор-Кутеш гуртын вордскем. Пичи но егит дыръёсыз туж секыт, сютэм аръёслы тупало. Семён атайзэ колхоз председательлы дышетыны лэзиллям, но бератаз председательлы Семёнлэсь атайзэ тодмосто. Нош Семён агайлы, Финляндиысь жугиськонысь бертэм воргоронлы, мукет ожмаськонэ кошконо луэ — кутске Быдӟым Атыкай ож.

— Атайлэсь жугиськонэ кошкемзэ али кадь син азям возисько, мыным соку куать арес гинэ вал ке но. Сыӵе суредэз кызьы вунэтод: «Али гинэ жугиськонысь бертыса, нош ик жугиськонэ кошкисько ук» шуыса, атай синвуаськыса бӧрдӥз. Ачиз понна ӧвӧл, ми понна туж сюлмаськиз со. Ньыль кузя нылпиосыз кылизы ведь, соос пӧлысь самой покчиез — кӧкыын. Бертоз шуыса, атай оскымтэ но, дыр, ини, ожын быроз шуыса, сюлмыз шӧдэм, дыр.., — тодаз вае Вера апай.

Со нуналысен сотэк но секыт улонэз адӟем Вералэн эшшо но секытгес улон дыръёсыз кутско: сое витё колхоз ужъёс, сютэм улон…

— Пичиысен быдэ вуыны тупаз — дырез сыӵе вал. Нылпи дырмы шоры учкытэк, трос ужамы. Бакчаосты уримы, пу уг луы вал, гур эстон понна агаен пулы нюлэскы ветлӥмы. Поттурынлэсь, сисьмем картофкалэсь кӧмеч пыжыса сиимы. Троссэ адӟимы ини… Инмар милям поколениысь адямиослы сыӵезэ адӟыны сётэм, луоз… Тани нош мар тодам лыктӥз. Азьло боры туж удалтэ вал. Песяй со борылэсь но шыд пӧзьтӥз. Карнанэн ведраосты кутыса, колхоз бусыысь кылем картофкаосты но люкамы. Туж апара луоз вал бусыын, но ми соизлы но шумпотӥмы, яра али кылем картофкаез ке но бичаммы луэ шуыса. Кӧт сюма бере, сыӵеезлы но пумтэм тау каримы.., — шуэ Вера Семёновна.

Сыӵе секыт условиосын будэ Вера, солэн вынъёсыз-сузэръёсыз, огъёзоосыз. Сыӵе секыт условиосын улэ вань шаер. Тылын тыршемъёслы верантэм секыт луэм. Жугиськонэ кошкем воргоронъёс матысь адямиоссы понна сюлмаськиллям, тылэ кылемъёс — оже кошкемъёс понна. Озьы ик улӥллям. Жугиськонын луэм Вералэн атаез но гожтэтаз дорысьёсыз понна сюлмаськыса гожтэ вылэм: «…шыд пӧзьтыкуды, отчы пызьзэ одӥг пуньы гинэ понэ, кызьы ке но луэм пызез тырмытыны кулэ…». Туннэ но Вера апай атаезлэн со гожтэм чуръёсыз сярысь малпаськыны кутске но, синкылиоссэ ватыны уг быгаты.

— Милемыз жаляса ик кулэм, дыр, атай. Ми понна сюлмаськыса, ми сярысь малпаськыса сопал дуннее кошкем, дыр. 14 августэ 1944-тӥ арын атайлэсь похоронказэ басьтӥмы. Со нуналозь котькудмылэн осконмы вань вал, атай ожысь бертоз но семьяямы ваньмыз умой луоз шуыса. Но со малпанъёсмылы быдэсмыны ӧз кылды. Берлогес тодӥмы, атаймес Латвие ватӥллям шуыса, — шуэ Вера апай, бам кузя васькись синкылиоссэ ӵушылыса.

Кузпалтэк ньыль нылпиеныз огназ кылемез шоры учкытэк, Вералэн анаез, карттэк кылем мукет кышноос кадь ик, пиналъёсыз понна улонзэ азьланьтэ. Вера солы ваньмыз ласянь юрттыны тырше. Колхозэ но анаеныз ӵош ужаны ветлэ. Валзы луымтэысь, колхоз бусыын соос скалэн ужаллям. Нялтас вераса, пудо вордыны но туж секыт луэм, берлогес скалзы но кулэм.

— Шуг-секытъёс шоры учкытэк, школаын дышетскыны быгатӥ. Кутэшын покчиёзо школа вань вал, отын ньыль ар ӵоже тодон-валан басьтӥ но, Ӟаныысь школае выжи, отын сизьым классэз йылпумъяй. Тӥни со сизьым классъем тодон-валанэн кыли. Атайтэк кылем бере, дышетскон сярысь малпаськыны ӧз луы ни. Ваньмы пӧлысь бадӟым агае гинэ Чистополе механиклы дышетскыны мыныны быгатӥз, ваньместы дышетыны анаймылэн кужымез ӧй вал, — маде Вера апай.

Школазэ йылпумъямез бере, егит ныл Кутэшысь канцелярие ужаны интыяське. Шӧдскымон трос аръёс ӵоже отын тыршемез бере, гуртысьтызы скал фермаязы пудо сюдыны выже.

— Шонерак верано ке, война бере аръёсы пудо но трос ӧй вал. Фермаын котькуд скал кыскись вылын ог дас скал гинэ луиз, соин кӧня ке ужаса, Лаише нюлэс кораса ветлыны кутски. Но собере Надя сузэры интые нош ик фермае скал сюдыны пыри. Пенсие ини Ӟаны гуртысь парсь фермаысен 1990-тӥ арын потӥ, отын мон парсьёсты сюдӥ, — валэктэ Вера Семёновна.

1959-тӥ арын Вера апай Ӟаные картлы кошке. Кузпалыз, Пантилеймон Дмитриевич, 1936-тӥ арын крестьян семьяын вордскем. Гумырыз ӵоже Пантилеймон агай колхозын тыршем — комбайнёрлэн юрттӥсез луэм, собере кема аръёс ӵоже, пенсие потытозяз, тракторен ужам.

— Панти монэ лушкаса вайиз. Мон солы кельшиськем но со, кема малпаськытэк, монэ кышно пыртыны малпам. Узыр ӧм улэ ке но, улонмы начар ӧз луы. Тани та юртмылы но кызь тямыс ар луэ ини. Кузпалэным асьмеос тыршыса-тыршыса сое лэсьтӥмы, со дырозь мукет юртын улӥмы.

Шадровъёслэн ньыль пиоссы вордско: Анатолий (анай-атаеныз ӵош улэ), Юрий (аслаз семьяеныз Ижевске интыяськем), Александр (Покчи Лӧзяын улэ), Николай (анай-атаезлы матын, бускельын гинэ улэ). — Адямилы кулытозяз но сюлмаськоно ини… Нылпиосыз понна, внукъёсыз понна. Котькуд анай-атай озьы улэ, дыр. Нылпиос, внукъёс понна котьма карыны дась, — шуэ Вера Семёновна, син шорам учкыса. — Туж умой дыре, капчи улонын улӥськомы. Тани толон гинэ кыӵе бадӟым праздникез пусйимы (Вера Шадроваен Вормон нунал праздник бере пумиськимы — Н.Ж.). Тӥ, егитъёс, со праздникез ми кадь валаны уд быгатӥське, дыр. Инмар мед утёз тӥледыз сыӵе улонлэсь. Со вакытэ улэм, со жугиськон дыръя шуг-секытъёсты адӟем ожысь но тылысь ветеранъёс понна со зэмзэ но туж-туж бадӟым праздник. Мон аслам нылпиосылы но котьку верасько, та праздниклэсь шӧмзэ соос уз валалэ шуыса… Жугиськон бырем бере, шумпотэменымы горд кышетъёсты ошылӥмы. Куд-огъёслэн атайёссы бертыны кутскизы, нош милям атаймы ӧй вал ини.., — нош ик атаез сярысь малпаськыса, пушкыз тыре Вера апайлэн.

Зэм, жугиськон дыръя луэмзэ вераса но, гожтыса но быдтыны уз луы. Нокыӵе кылъёсын, нокыӵе кузьымъёсын ожысь но тылысь ветеранъёслы пунэмзэ берыктыны уз луы. Асьмелэсь ветеранъёсты гажан, утён, та праздникез сӥлы карон гинэ куриське. Вера апаен вераськыса, сыӵе йылпумъянэ вуимы.