Акашка мӧйыослэн синмынызы...

Елизавета Егоровна Абрамова, Ципья черкогурт:

- Коркаоссэс утялтэмзы бере, газетлэсь чильтэр карыса тыро вал (азьло туала дыре кадь чильтэръёс луымтэзы ук). Нош оброс азе сяськаен чеберъяса лыс поно вал, шуккыса. Сыӵе чебер луылӥз, котырак лыс зын... Праздник нуналэ ваньзы одно ик коркалы быдэ ветло вал. Акашкалы туж трос курегпуз дасяло вал, шумотэ, соосты буяло. Азьло трос дыръя веник куаръёсын пӧзьтыса буяллязы, яке, горд карыса буямзы потэ ке вал, буяськон краскаен буяло вал ни. Али нош веник куарен буясез ӧвӧл лэся ни, сугон кӧмен ческыт луэ... Туж ческыт луэ соку курегпузлэн шӧмыз. Праздник азьын пӧраськизы но. Ыльнянь дасяськом вал, солэсь шешери но лэсьтӥськом вал. Сушки но лэсьтыса пыжиськом вал. Акашка ӝок вылын со нянь одно ик луыны кулэ вал. Вӧсям беразы гинэ со нянез шорманы лэзизы. Сӥзьыл ӟазегъёсты вандыку, одӥг ӟазегез кельто вал Акашкалы шуыса. Солэсь бурпалзэ ӵогыса Акашкалы пӧзьтӥзы, паллянпалзэ — Кисьтонлы.

Юмшанъёс сярысь верано ке, кин дорысен кутско юмшаны, со ик ӧтча вал. Ӝытъёсы мызганэн ик ветлылӥм азьло коркалы быдэ. Ми дыръя черк луымтэысь коркалы быдэ вӧсяськыса ветлӥзы. Пиналъёс понна азьло ӟечыран радъяло вал, гурт пуме. Котькуд гуртын луэ вал аслаз ӟечыранэз. Пиналъёс юмшало вал, пичиос ӟечырало вал — ваньзы отын. Великий Четверг нуналэ лэсьто вал сое. Семыкозь улэ вал ни со отын. Асьме дорын (Ципьяын — ред.) Семык ӟучарняе сӧриллям ини сое, нош тани Бибатлаын, кылсярысь, покчиарняе (четверге) Семыксы, со нуналлы тупа. Четверг нуналэ сӧрыса, ӟечыранзэс тӥялтыса басьто вал но нюлэске мыно вал юмшаны, весяк сюрессэ бызьыса. Вань кадь удмурт гуртъёсын луэм сыӵе ӟечыран. Озьы ик котькуд гуртын улӥсьёс курегпузэс тыгылятыса шудӥллям, ӟечыранзы дорын ик. Тупез тыгылято но со курегпузъёсты ёмыратэ, ёмырам курегпузъёс тыныд луо вал ни. Кылемез отчы кыле вал. Собере ӵукна вазь ик пиналъёс курегпуз люканы пото вал. Али дыре но уно ветло но, соос пӧлын удмуртэз трос ӧвӧл ни. Али нылпиослы курегпуз гинэ кулэ ӧвӧл, кампет куро ук соос (серекъя).

Екатерина Александровна Конькина, Тагашур гурт:

— Акашка нуналэ вӧсяськиллям, одӥг коркасен мукет коркае ветлыса. Нош берен нуналаз ини ог-огзэсты куное ӧтчаллям. Милям гуртын, Тагашурын, нырысь Уллапал урам Шурсопал урамез ӧтьылэм «ӟазег сиёнэ». Нош мукет нуналаз — Шурсопал урам Уллапал урамез ӧтьылэм ини. Туж трос дасяськыло вал, тыр ӝӧкъёс радъяса. Пыжисько вал, сур но пӧзьтылӥзы. Аракы юыны уг яра вал. Тодам лыктэ на таӵе кырӟан:

Акашка вортон шулдыр шуэм понна,

Валэд ке мотор, шулдыр со.

Акашка дюон шулдыр шуэм понна,

Улонэд ке тэгыз, шулдыр со.

Та кырӟанэз кырӟало вал Акашка бере мукет нуналаз, куно ӧтчан дыръя.

Соосты ӵем дыръя пичиос, нылпиос ӧтчаллязы. Пиналъёс, пичиос но бадӟымъёс, люкаськыло вал ӟечыран доры. Ӟечыранэз лэсьтылӥзы юбоос тырыса ик, сокем со бадӟым ӟечыран луэ вал. Семыкозь со ӟечыран сылӥз, нош Семык нуналэ сое чигыса нюлэске шулдыръяськонэ мыно вал. Нюлэскын юмшаса, мукет ӵукнаяз гинэ доразы бертыло вал ай.