Акашка — калыкъёсты огазеясь югыт праздник

Акашка — христиан праздникъёс пӧлысь одӥгез тужгес валтӥсез, кудӥз арлы быдэ тулыс дуннеысь тросаз кунъёсын пусйиське, озьы ик Россиын но. Та нунал огазея шаерысьтымы пӧртэм выжы калыкъёсысь но религиозной конфессиосысь адямиосты, кузьма шумпотон, оскон но огъя луон мылкыд. 

Россиысь православной осконэн улӥсьёс понна Акашка Иисус Христослэсь кортӵоган бере улӟемзэ тодэ вайытэ, улонлэсь кулонэз но ӟечлыклэсь уродэз вормемзэ возьматэ. Озьы ке но та праздниклэн религиозной пуштросэныз валче мукет аспӧртэмлыкез но вань: Россиын тросэз улӥсьёс, осконзы шоры учкытэк, Акашкаез пӧртэм йӧскалыкысь адямиос куспын тупаса улон, семья огазеяськон но эшъяськон вакыт шуыса лыдъяло.

Азьло дырысен асьме шаерамы Акашкаез пусъён аспӧртэм сямъёс кылдӥзы. Тросаз семьяосын традиционной сиёнъёс пӧрало: куличъёс, кузятэмлэсь пасха но, конечно, курегпуз. 

Вашкала традициосъя курегпузъёсты яркыт буёлъёсын буяло но пужыосын чеберъяло. Туннэ нуналэ курегпузъёсты чеберъян пӧртэм амалъёс вань: кылсярысь, киын суредам курегпузъёс (писанкаос) туж аспӧртэмлыко адско, декупаж амалэн орнаментъёсын, сӥньысъёсын но бисерен суредъёс синмаськыто. 

Аспӧртэмлыко пуштрос басьтэ эшъёс но бускельёс куспын буям курегпузэн вошъяськон сям. Та но эшъяськонэз, ог-огдэ валанэз но ӟеч мылкыдэз возьматэ, угось кузьымен вошъяськыса, адями мукет адямилы аслэсьтыз гажамзэ но матысь каремзэ возьматэ. Ӵапак та чебер сям пӧртэм йӧскалыкысь адямиослэсь кусыпъёссэс юнматыны юрттэ но трос йӧслыко Россиын улӥсьёс пӧлын ог-огдэ гажан но валан мылкыд кылдытэ. 

Но, котьма ке но, тужгес валтӥсез, мар огазея шаерысьтымы вань улӥсьёсты та нуналэ — Иисус Христослэсь улӟыса султэмзэ данъяса шумпотон. Со шумпотонэз котькудмы, йӧскалыкмы но осконмы шоры учкытэк, матысь адямиосын сюлмысь люкыны тыршиськом уга. 

Балтась но — трос йӧслыко ёрос, кытын ог-огенызы тупаса уло пӧртэм йӧскалыкысь пӧртэм осконъёсын улӥсь адямиос: бигеръёс, удмуртъёс, поръёс, ӟучъёс но мукет калыкъёс. Пӧламы вань суро семьяос но, кытын огкадь гажало христиан осконэз но, исламез но, сӥлы каро калык сям-йылолъёсты. 

— Паськыт масштабен ум пусйиське ке но, кузпалылэсь сям-йылолъёссэ гажаса, Акашка нуналэ ӝӧк выламы 6-7 курегпуз буяськом, куддыр кулич басьтӥськомы. Коркаос кузя ветлӥсь нылпиослы ческыт сиёнъёс арлы быдэ азьвыл ик басьяськомы. Пичи дыръяз пимы но бускель песянайёс доры пыралляз, — шуэ, вылӥын веранме юнматыса, Ципья черкогуртысь Миляуша Хрисанова. (Нылкышно ачиз мусульманка, кузпалэз православной семьяысь). 

Озьыен, Акашка — со огъя шумпотон, кудӥз семьяосты юнматэ, быдэс поколениосты огазея но ӟечезлы оскон кузьма. Зэмос семьялэн узырлыкез но кужымез солэн сям-йылолъёсаз но дунлыкъёсаз, кызьы соос утисько но выжыысь выжые выжо. 

Озьы ик Акашка калыкъёслэн огазеяськонзылэн символэз но луэ, сям-йылолъёслэсь кужымзэс, ог-огдэ гажан мылкыдэз, тупаса но огкылысь улыны мылкыдэз возьматэ. Туннэ, куке адями глобализацилэн трос шуг-секытъёсыныз, калыкъёс куспын конфликтъёсын пумиське, Акашка праздникез пусъёнлэн кулэлыкез трос поллы будэ. Со асьмелы тодамы вайытэ, вань адямиосты гажанлэн но чиданлэн, тупаса улонлэн дунлыкез сярысь. Со сяна, та нунал пӧртэм калыкысь адямиос куспын вачевераськонэз юнматыны, мукет культураосты ӟечгес тодыны юрттэ, оскон но валче ужан мылкыд кылдытэ.