«Али но со лыдӟисьёс пӧлын улэ»

Выль потэм книгаен тодматсконэ пыриськизы писательлэн кузпалэз Екатерина Алексеевна, Балтась ёросысь удмурт азьветлӥсьёс, библиотекаосын ужасьёс, удмурт дышетӥсьёс но дышетскись пиналъёс, огъя вераса, писательлэсь творчествозэ гажасьёс. Пумиськонэ озьы ик Ижкарысь дуно куно но вуиз — кылосбур тодосъёсъя кандидат, Удмурт Элькунысь Йӧскалык библиотекаысь литературно-выставочной центрен кивалтӥсь Лариса Дмитриева.

Лариса Дмитриева, кылосбур тодосъёсъя кандидат, Удмурт Элькунысь Йӧскалык библиотекаысь литературно-выставочной центрен кивалтӥсь:

– Организаторъёслы тау! Соос быгатӥзы возьматыны Николай Никифоровлэсь творчествозэ пьесаос пуктыса. «Гондыр эктон» книгаысь веросъёс та ужрадын возьматэмын сценкаос пыр. Вакчи веросъёссэ туж капчи вылэм сцена вылын пуктыны. Туж кельшиз, кызьы ужрад кутскиз: нылпиос, «Гондыр эктон» верослэсь одӥг люкетсэ инсценировать карыса, пересь пиосмуртлэсь эктэмзэ возьматӥзы.

Конечно, мон лыктӥ национальной библиотекаысь малпаса, кызьы утьыны Николай Никифоровлэсь личной архивзэ, со медаз ышы, медаз быры шуыса. Соин ваньмызлы, мар солэн вань, кулэ опись лэсьтыны: кыӵе солэн рукописез вань, кызьы тетрадез нимаське, кӧня страница отын. Пуш гожъямъёссэ озьы ик кулэ эскерыны. Ми малпаськомы, рукопись медаз ышы шуыса, кызьы сое лэсьтыны. Мед со улоз. Никифоровлэн публиковать карымтэ ужъёсыз мед соос одно ик печатласькозы. Со милям азьлапалан бадӟым ужпуммы луыны кулэ.

Никифоровлы сӥзем лыдӟонъёс но мед паськыталозы, мед пыриськозы отчы учёнойёс но, кудъёсыз Никифоровлэсь творчествозэ но рукописьёссэ анализировать карысалзы. Семьяез медаз ышты, медаз быдты солэсь кагазъёссэ. Милемлы, Удмуртиысь йӧскалык библиотекалы, сётысалзы ке, архивез но быдэсэн утиськыса возиськысал.

Пусйыны кулэ, Николай Никифоровлэсь «Гондыр эктон» книгазэ «Удмуртия» издательство поттӥз. Бичетэ 21 нылпи веросъёсыз пыртэмын. Книгалэн тиражез — 300 экземпляр. 

Котькуд веросын тунсыко учыр, аспӧртэм геройёс, сямъёс возьматэмын. Николай Никифоровлэн пичи геройёсыз — со гуртын улӥсь пиналъёс. Соос анай-атайёссылэсь, песянай-песятайёссылэсь пӧртэм ужъёслы, инкуазез шӧдыны дышетско, ӟеч сямъёс асьсэлы пыӵато. 

Ӟаны шоръёзо школа ужрадлы рос-прос дасяськем, ваньзэ пыр-поч малпам. Тае валаны луиз нырысетӥ минутъёсысен ик. Школаысь нылпиослэн фольклоръя «Инвожо» ансамбльзы (кивалтӥсьсы Виктор Камаев), шошма удмуртъёслэн юмшаназы «Гондыр эктон» веросысь героез — Лади песятаез — пыртыса, книгаен тодматскон ужрадлы пуштросо кутскон сётӥз. Собере, вань люкаськем калыкен, куноосын ӟечъяськыса, кыл вераз Ӟаны школалэн директорез Грахов Константин Викторович. Со шумпотыса пусйиз, «Гондыр эктон» книгаез поттонын Ӟаны школалэн но люкетэз шӧдскымон шуыса, мылкыд кариз азьланяз книгалы бадӟым тиражен потыны.

Книгаен тодматскон кырӟан-эктонъёсын пӧлэстӥськыса мынӥз. Ужрадлы мур пуштрос ватсазы Николай Михайловичлэн «Син пӧртмась» но «Эбек» веросъёсызъя покчи пиналъёсын туж усто пуктэм сценкаос но Лиза нунокезлэн песятаезлэсь кылбурзэ лыдӟемез. 

Тодэ ваёнъёсын но таукарон кылъёсын узыр луиз та ужрад. Видео пыр вазиськыса, Николай Никифоровез шуныт кылъёсын буре вайиз Ульфат Бадретдинов — удмурт гожъяськись, Россиысь гожъяськисьёслэн огазеяськонзылэн ёзчиез, Россиысь журналистъёслэн огазеяськонзылэн ёзчиез. Вераны кулэ, ӵапак Ульфат Шайхутдинович бордысен ик кутске «Гондыр эктон» книгалэн улонэ выжон сюресэз. Тани ма вера со ачиз та сярысь:

— 2022-тӥ арын гожтэтэн вазиськи Кушкет школае (Ӟаны шоръёзо школа — ред.), Николай Михайловичлэн кыӵе ке рукописьёсыз кылемын ӧвӧл-а шуыса. Собере мыным дышетӥсь Олеся Яковлева вераз, рукописез вань шуыса, набирать каремын, пе. Мон сое кури ыстыны. Малпай вал, со бадӟымъёслы веросъёсыз шуыса, но со ӵапак вылэм пиналъёслы гожтэм веросъёсыз, кудъёссэ мон троссэ тодӥсько вал «Кизили» журналэ потэмзыя. «...» Собере мон со рукописез сётоно кариськи «Удмуртия» книгапоттонние, Сергей Матвеевлы. Сергей Матвеев, кивалтӥсеныз Юрий Васильевич Кузнецовен огъя кыл шедьтыса, та рукописез планаз пыртӥз. Туэ «Гондыр эктон» чебер книга потӥз. «...» Книга сярысь вералозы лыдӟисьёс. Малпасько, со пичиослы но кельшоз, бадӟымъёслы но, куд-огъёссэ сценка карыса но возьматыны луоз, дыр, школаын. 

— Никифоров со одӥгез сыӵе туж трос гожъясь писатель вал, — азьланьтэ веранзэ Ульфат Бадретдинов. — Со кадь трос гожъясь писательёс асьмелэн ӧвӧл, шуыны луэ. Конечно, солы ӧз удалты троссэ гожъямъёссэ нимаз книгаен поттыны, луонлык ӧй вал. Удмуртилэн палэназ улӥсь удмурт гожъясьёслы тужгес но секыт со ласянь: аслэсьтыд книгаостэ поттон уж туж секытэн сётӥське. «...» Николай Михайлович ӟеч кусып возе вал редакциосын. 1990-1992-тӥ аръёсы мон ужай «Инвожо» журналын. Мон тодӥсько на солэсь «Куартолэзе кисьмам узы» повестьсэ басьтэмме. Ми сое дасямы соку ик, со потӥз но солы трос гожтэтъёс вуизы. Кельшиз со лыдӟисьёслы. Собере кема аръёс ӵоже мон ужай «Кизили» журналын. Соку но Николай Никифоров ужъёссэ лэзьылэ вал журналамы. Со пиналъёслы но быгатэ вал гожъяны, бадӟымъёслы но, пересьёслы но. Кылбурен но гожтыны быгатэ вал, верос карыса но, повесть карыса но. «...» 

Зэм, Николай Михайловичез туж умой тодо асьме палъёсын но, элькунмылэн палэназ но. Кӧня книгаосы, журналъёсы но газетъёсы пыремын солэн кылбуръёсыз, веросъёсыз но повестьёсыз. Нош кӧняез рукописьёсыз асьсэлэсь черодзэс витё на лыдӟисьёс доры вуон понна. «Гондыр эктон» книгаен тодматскон ужрадын сыӵе рукописьёсызлэсь, дневникъёсызлэсь, книгаосызлэсь адӟытон сэрег радъямын вал. Соос пӧлын вань Никифоровлэн дневникез, кытчы со котькуд ортчем нуналзэ, сюлэмшугъяськонъёссэ гожъям. Ӟаны шоръёзо школаысь удмурт кылъя но литературая дышетӥсь Олеся Яковлева, та дневникезлэсь кулэлыксэ пусйыса, сое зарниен ӵошатэ. Отын ик «Сьӧд кашо зундэс» повестезлэн рукописез но ас киыныз лэсьтэм книгаез. Огъя вераса, туж узыр материал.

— Олеся Васильевнаен кылмы кельшиз, куке но поттыны луоз шуыса, татчы вайыса лыктӥ мон со рукописьёсты (Ижкарысь книгапоттонниысь ваем рукописьёс сярысь вераськон мынэ — ред.). Со рукописьёсын тодматскем бере, Турьяе мыныса вайи мон Николай Михайловичлэсь тетрадьзэ, кытын со котькуд ар пумын литературной отчёт лэсьтылэм. Мон понна со ӝутыны вормонтэм гурезь. Та тетрадьлы туж пайми вал ини соку ик. Табере выльысь паймисько: таӵе тетрадьёсыз солэн пумтэм-йылтэм вылэм татын. Эскерыса быдтонтэм вылэм со, — шуиз Леонид Сапожников.

— Кык пол бадӟым таукарон кылме вераме потэ Олеся Яковлевалы, — шуиз Леонид Дмитриевич. — Нырысетӥез — та книгаез пумаз-йылаз вуттӥды шуыса, тау тӥледлы вуоно лыдӟисьёслэн нимынызы. Эшшо таукарон кылме вераме потэ, ВКонтакте шуэм вотэсын группа кылдытыса, отчы Николай Михайловичлэсь гожъямъёссэ пыртылэмды понна. Со отын зэмос улэп книга кадь, суредъёсын, туспуктэмъёсын, туж умой лэсьтэмын, тау туж бадӟым.
Тани рукописьёсын одӥгез папкаез потӥз ини, табере мукетыз черодзэ вите. 

— Татчы пыртэмын 20 повестьёс но веросъёс. 20-лэсь ог 14-15-сэ печатать кари, дыр, ини. Соос дась, редактировать каронэз, конечно, азьлапалан. Сое печатать карыку, кытӥ-отӥ синкылиос шар-шар вияло, кытӥ-отӥ корка пачыл серекъяны но тупа. Мылкыдэз шудыто соос. Туж быгатыса гожъямын, — шуиз Сырья гуртысь азьветлӥсьмы.

Леонид Сапожников таукарон кылъёссэ ёросысь редакциын ужасьёслы но вераз:

— Ас дыраз соос ог 2000-тӥ аръёсы потылӥзы вал ини. Газетлы быдэ сямен «Сьӧд кашо зундэсэз» потӥз. Пиналгес дыръям Николай Михайловичлэн гожъямъёсыз мынам дулкымам ӧйгес вал. Нош тазэ лыдӟыны кутски но — люкиськыны ӧй быгаты ни, мукетъёсаз но пырыса кошки. Тау туж бадӟым, кыкетӥ ползэ нош поттӥды. Сое газет басьтӥсь семьяос туж но туж куспазы обсуждать карылӥзы, мугорзы юзыр-кезьыр луымон лыдӟылӥзы. Нош кыӵе усто фильм уськытыны луысал Никифоровлэн «Сьӧд кашо зундэсэзъя»! Та ужпумез мон удмурт пиналъёсын пумиськылыкум ялан ӝутылӥсько.

Карек-Серма гуртысь удмурт азьветлӥсьмы, Василий Никитин, дано писательмылэсь школаын дышетскем аръёссэ тодаз вайиз, выль книга сярысь малпанъёссэ но вераз.

— Книга нылпиослы сӥземын. Соин та книгаен ужаны кулэ удмурт кылэз, литератураез дышетӥсьёс. «...» . Инсценировкаос туж юртто удмурт кылэз азинтыны, волятыны. Нылпиос али удмурт кылын туж уг верасько ни. Соин ӧжыт уже кутоно та книгаез асьмелы. Библиотекаын ужасьёслы но пайдаё луоз, — шуиз Василий Петрович. 

Удмуртиысь вуэм куномы, Лариса Дмитриева, организаторъёслы таукылзэ вераз, бадӟым ужпумъёссы сярысь мадиз, аслэсьтыз книгазэ школалы кузьмаз.

— Писательёслэн архивъёссы возисько йӧскалык музейын яке кун архивын. Нимысьтыз литературной музей, кудӥз люка вань домашней библиотекаосыз но архивъёсыз, ортчытэ соослы ужрадъёс, сыӵеез ӧвӧл. Со ужез сётӥзы йӧскалык библиотекалы. Кылем арысен мыным оскизы кивалтыны та ёзэтэн. Мынам валтӥсь уже — удмурт писательёслэсь домашней библиотекаоссэс, отысь книгаоссэс но рукописьёссэс люканы, соосты вӧлмытон, калыкен тодматон вылысь. Малпасько, Николай Михайлович Никифоровлэн но гожъяськемез, улэмез сярысь кулэ гожтыны книга, солэн рукописьёсыз но мед луозы одӥг интыын.

Гожтэмме йылпумъяме потэ Ульфат Бадретдиновлэн верам кылъёсыныз: 

«Николай Никифоров аслэсьтыз лыдӟисьёссэ шедьтӥз. Сое ярато вал бадӟымъёс но, егитъёс но, пиналъёс но. Тани солэн, шуом, „Удмурт дуннеын“ потэм веросъёсыз, повестьёсыз туж кельшымонэсь вал. Лыдӟисьёс сое чидатэк возьмало вал, гожтэтъёс но гожъяло вал, азьланьтыны курыса куд-ог веросъёссэ. Соин ик Николай Никифоровлэн нимыз удмурт литератураысь уз ышы, со зэмос писатель вал, али но со лыдӟисьёс пӧлын улэ».

Зэм, Николай Никифоровлэн гожъямъёсыз котькуд лыдӟисьлы дуно луо сюлмысь луэменызы, калык кыллы матын луэменызы но нылпи дунне шоры нимысьтыз шуныт учкеменызы.

Туспуктэмъёс: baltaci.ru