Анае тазьы шуэ вал: «Кык нылы вань, одӥгзэ одно ик кебитчилы дышето!»

Кузь черодъёс быризы

Вузкарон — одӥгез тужгес мур выжыё уж, кудӥз первобытной дауръёсы ик кылдэ но али ке но аслэсьтыз кулэлыксэ уг ышты. Вашкала дырысен вузкарон шаермылэн экономической но политической улоназ бадӟым инты басьтэ. Со гинэ но ӧвӧл, дыр ортчемъя та удыс азинске, валатонэз паськытгес кутӥськыны кутске. 

Вузпӧр (рынок) кусыпъёс азинскемен, вузаськисьлэн профессиез но одӥгез тужгес паськыт вӧлмем ӧнер но востребованной луэ. 

Туала технологической азинскон дауре быризы ни пумтэм-йылтэм кузь черодъёс, табере вузкаронлэн мукет амалъёсыз паськыт азинско ни: электронной вузкарон, маркетинг но мукет. Но гурт интыын улӥсьёслы котьма ке но адямиез адӟыса вераськон кулэ, соин соос гуртысь магазинэ дырто... 

Гурт шорын — куинь магазин 

Сизнер гуртын 20-тӥ даурлэн кутсконаз ик магазин луэм ини. Гурт калык магазинтэк ӧз улы шуымон. Тани туннэ но гуртын кык магазин ужа: одӥгез нимаз ужбергатӥсьлэн, мукетыз Ципьяысь потребительёслэн огазеяськонзылэн магазинзы. Вераны кулэ, туала дыре бадӟым шуд, куке пичи гуртын магазин вань, эшшо ке кык. Малы ке шуоно со туж шер пумиськись суредлы пӧрме ни: гуртъёсын магазинъёс ворсасько, покчиёзо школаослэн капкаосазы замок ошо, клубъёсын ужаны мылкыд карисьёс ӧвӧл... Сизнеръёс магазинлы ке но шумпотыны быгато али.

Туннэ нуналэ Сизнер гурт шорын ик туж тунсыко суред: сюреслэн одӥг палаз сылэ бадӟым ужасьтэм магазин, соин артэ гинэ — пичи вагончик — али дыре ужась магазин, нош соослы ваче пумит — выль лэсьтӥськись магазин, кудӥз матысь дыре ӧсъёссэ усьтыны кулэ. Та суредэз адӟыса, адямиослэн пӧртэм малпанъёссы кылдо, луоз. Кылсярысь, малы куинь магазин? Кулэ вал-а выль магазин? Малы вужзэ гинэ выльысь усьтонтэм вал?.. Но малпасько, соослы валэктонъёс вань, дыр. Нош одӥгез зэмзэ но шумпоттэ: выль магазинын ужано вузаськисьлы Вятчина Таисия Юрьевналы гадь тыр шокчыны инты луоз ини табере, таиз тыныд вагончик ӧвӧл ни...

Таисия Юрьевна: «Мон аслам интыям»

Гуртын вузаськисьлэн ужез капчи ӧвӧл, но со туж кулэ. Гурт магазинъёс котьку аспӧртэмлыко атмосфераен висъясько. Со вузкарон точка гинэ ӧвӧл, со эшшо ог-огеныд пумиськон, ог-огеныд вераськон инты. Одӥгез аслэсьтыз сюлмаськонзэ, сюлэм вӧсьсэ вера, мукетыз — шумпотонзэ, куинетӥез — выль иворъёсын тодматэ...

Вятчина Таисия Юрьевна вордске Сизнер гуртын 4-тӥ южтолэзе 1974-тӥ арын. Гуртысь покчиёзо школаез пырпотыса, 1991-тӥ арын Ципья шоръёзо школаез йылпумъя, пыре Арчае вузкарисьлы дышетскыны, одӥг ар отын тодон-валан люка но ужаны кутске.

— Ужан сюресме 1992-тӥ арын июль толэзе кутски, Кисаль гуртын кебитьын. Ужаны инты луымтэен, гуртлы быдэ ужаса ветлыны тупаз, кин отпуске кошке, соосыз вошъяса ужай. Кисальын, Кушкетын, Бурнакын, Смаильын, Турья гуртын ужаны тупаз, — кутскиз веранзэ Таисия Юрьевна. — 2003-2006-тӥ аръёсы «Смаиль» гурт возёс кооперативын складэн кивалтӥсь луыса ужай. 2006-тӥ арын колхозысь кошки но кутски Сизнер гуртысь кебитьын ужаны. 2012-тӥ арын РайПО понна секыт дыр кутскиз. Кебитез борӟазы. 1 ар но 3 толэзь биржаын пукимы. 2013-тӥ арын Ципьяысь потребительёслэн огазеяськонзы Сизнер гуртэ вагон-кебить усьтӥз, декабрь толэзьысен мон отын ужаны кутски. Со дырысен ужасько аслам гуртам.

— Таисия Юрьевна, ужды кельше шуыса вераны быгатӥськоды-а?

— Одно ик, туж кельше. Мыным пичи дырья ик кебитчилэн ужез туж кельше вал. Анае тазьы шуэ вал: «Кык нылы вань, одӥгзэ одно ик кебитчилы дышето!»

— Озьыен, анайдылэн но, тӥляд но малпанды улонэ пыӵам?

— Озьы. Огпол но жаляме ӧвӧл кебитчилы дышетски шуыса, мон аслам интыям кадь потэ.

— Таисия Юрьевна, кызьы тӥ малпаськоды, кыӵе сямъёс тужгес но юртто адямилы вузкарон ужын? Кыӵе луыны кулэ вузкарисьлы?

— Адямиен ужаны туж секыт, котькудӥзлэсь сямзэ тодоно, кинлы кызьыгес вазёно, котькудӥзлы подход шедьтоно. Соин малпасько, вузкарисьлы психолог но луоно, дыр, куддыр небытгес, мукетъёсыныз чурытгес луоно, дыр. 

— Туннэ нуналэ ёросамы РайПО магазинъёс Ципья палан гинэ вань шуыса тодӥсько, уг янгышаськы-а? Кӧня РайПО магазинъёс вань ёросын?

— Ёросын вань одӥг гинэ сельпо — Ципьяысь потребительёслэн огазеяськонзы. Со тямыс гурт кебитьёсты огазея. Арнялы одӥг пол котькудӥз со кебить графикъя мукет гуртъёсы, кытын кебитьсы ӧвӧл, выездэ потэ.

— Тӥ кыӵе гуртъёсын ӵемысь ужаськоды?

— Ӵемысь Вуж Ципья, Турья, Кисаль, Починка гуртъёсын луыны тупа.

— Уж сяна, шутэтскон но вань ук. Тани толон гинэ ӧнер праздникты вал. Пусйиды-а тӥ сое?

— Котькуд аре пусйыны тыршиськом, пӧртэм чебер интыосы ветлӥськомы. Кылсярысь, Свияжске, Йошкар Олае, Казане ветлӥмы ини. Учырен пайдаяськыса, аслэсьтым коллегаосме праздникен ӟечкыласько, ваньмылы тазалык, шудбур но ваньзэ умойзэ сӥзисько.

— Ми но удыс праздникеныды ӟечкыласьком, вузкаронды пайда мед ваёз но басьяськисьёстылэсь таукарон кылъёс гинэ кылыны мед кылдоз! 

Туэ Таисия Юрьевна 50 аресъем юбилейзэ пусйиз. Трос аръёс ӵоже тыршыса ужамез понна но Татарстанысь потребительёслэн кооперациязы нимаз люкет пыртэмез понна юбилеезлы бадӟым кузьым выллем луиз Россия Федерациысь Центросоюзлэн Советэзлэн Президиумезлэн Данъян грамотаез. Февраль толэзе Казаньын данъян ужрад луэм, отчы но ветлэм Таисия Юрьевна. Со сяна, адӟем карымон вузкарисьлэсь ужзэ возьмато Татпотребсоюзлэн Данъян грамотаосыз, Ципьяысь потребительёслэн огазеяськонзылэн грамотаосыз но мукет.

Адӟем карымон адями котькуд ласянь ушъямон 

Семья улонын но туж усто кузё кышно луэ Таисия Юрьевна. 1998-тӥ арын Киров улосвылысь Порез гуртэ Вятчин Евгенийлы картлы кошке со. Гужем 17 июле сюан шудо. 1999-тӥ арын Валерий пизы вордске, 2001-тӥ арын — Лена нылзы. Школазэс йылпумъяса, кыкназы но нылпиоссы Йошкар Олаын дышетско, собере отчы ик ужаны кылё. Пизы ужа ас профессиезъя военной заводын, нош нылзы, фельдшерлы дышетскемез бере, фармацевт луыса тырше. Кузпалэз ужа Малмыжысь ремзаводын. Уло Таисия Юрьевналэн анаеныз Мария апаен ӵош. Сандык кадь корказы, дынгыр-дынгыр юртъерзы. Туж тыршись семья. Син медаз усьы. 

Сизнер гуртлэн историысьтыз (Анфиса Анатольевна Ермохиналэн люкам информацииезъя гожтэмын)

Сизнер гуртын 20-тӥ даурлэн кутсконаз ик ини горд кирпичлэсь лэсьтэм магазин луэм. Кузёез солэн гуртысь тужгес узыр адями луэм — Самаров Алексей Филимонович. 1928-30-тӥ аръёсы Самар выжыосты кулаке потто. Улыса-вылыса соослэсь вань юртъерзэс сэртто, магазин юртэз гинэ кыле. Солэсь нимзэ вошто но гурт калык понна магазин усьто. Со 1969-тӥ арозь ужа. Нырысетӥ вузкарись луыса Шамсинур нимо бигер нылкышно ужа, собере Ермолаева (Матвеева) Мария. 1969-тӥ арын магазинлы шуыса нимаз юрт лэсьто — щитовой корка, кудӥз ужа 1989-тӥ арозь. 1960-тӥ арысен 1980-тӥ арозь магазинын вузкарись луыса Сергеева Ольга Егоровна ужа. 1981-тӥ арысен 1995-тӥ арозь — Антонова Валентина Александровна. 1990-1991аръёсы — Матвеева Антонида Николаевна. 1989-тӥ арын лэсьто бадӟым но югыт магазин. 1996-тӥ арысен 2006-тӥ арозь ужа Васильева Антонида Гурьяновна. 2006-тӥ арысен туннэ нуналозь гурт магазинын тырше Вятчина Таисия Юрьевна.