Анатолий Шишкин 2019-тӥ арысен «Борнакын» ужа

Анатолий Никодимовичлэн но стажез туж трос ӧвӧл вылэм али — «Борнакын» воргорон 2019-тӥ арысен гинэ ужа. Со дырозь городын улэм вылэм. Но сюлмыз сое гуртэ кыскем. Ачиз Турья гуртысь луэ бере, улыны но татчы интыяськем, ужаны но «Борнак» возёсын кутскем.

2019-тӥ арын Анатолий Шишкин «МТЗ-80» тракторен ужаны кутскем, али нош «МТЗ-1221.3» тракторен тырше.

— Туннэ нуналэ культивация ужъёсын вырисько, усыясько. Техникаез туж яратӥсько, дышетскемея механик луисько бере, тракторме ачим тупатыны но быгатӥсько, кулэ луыкуз. Огъя вераса, ужме яратӥсько. Лумбыт музъемын техникаен ужанлэсь но мон уг жадиськы. Азьло стройкаен выри, но со уж мыным сюлэмъя ӧй вал. Соин вордскем палъёсам бертыса улыны но ужаны интыяськи, — вера Анатолий Никодимович.

Толалтэ механизатор тросгес пудо котырын ужа — трактореныз пудо сиён пыртылэ, кыед поттылэ. Ӵош ужасьёсыныз но куспазы тупаса ужало вылэм.