Анайлэн нуналэзлы сӥзисько...

Пичи дыръямы анай туж кулэ, нош быдэ вуэмъя анайёсмылы шуныт кыл шергес вераськом, жингыртыны но вунэтӥськом. Аслам анае улонысь вазь кошкиз, нунокъёсызлэсь будэмзэс адӟытэк но кылиз.

Кыдёке кошкыса дорам шер бертылӥ,

Верано кылъёсме вератэк но кыли.

Тани нош уйвӧтам адӟисько тусбуйдэ,

Витисько, анае, шунытак ваземдэ.

Мон анае сярысь уг гожты таяз учыре, сое тодӥсез но табере ӧжыт ини.

Веранэ Ципья черкогуртын улӥсь Рита апаймы сярысь. Та гуртын со будэм, дышетскем, собере ӧнер басьтыны Ижкаре кошкем. Отын медициная дышетсконниез йылпумъяса, ас дораз ик бертоно карем. Егит но чебер нылаш ужаны кутске Ципья участокъя больницаын медсестра луыса. Улонысь эшсэ но дорпалысьтыз ик шедьтэм. Игорь агаен семья кылдытыса корка лэсьтӥзы, сад-бакча но мерттӥзы, куинь нылпи будэтӥзы. Соослы тодон-валан сётыса, улонын шонер сюрес бырйыны юрттӥзы. Табере ини Романовъёслэн ньыль нунокъёссы будо, вань сюлэмзэс но яратонзэс соослы сёто.

Трос нылпиё анай, Романова Маргарита Григорьевна. Сое тодӥсьтэмез ӧвӧл, дыр. Ужан сюресэз Рита апаймылэн Ципья больницалы сӥземын, пенсие но отысен сое келязы. Жадёнэз валасьтэм Рита апаймы толалтэ куасэн ветлэ, конькиен йӧ вылын но нискыла, гужем велосипедэн узы-боры бичаны ветлэ. «Ужаськод ке — ужа, вераськод ке — вера» — шуэ удмурт калык. Та кылъёс ӵапак Рита апаймылы тупало: ма борды кутскиз, котьмаиз ик пӧрме, кылын юрттыны но, эмъяны но, дурбасьтыны но быгатэ. Огпол но лушкем кей сямен сьӧрад вераса уз ветлы, синмад учкыса шонерак вералоз верано кылъёссэ, соин ик ми сое гажаськом, яратӥськом. Рита апаймы туж оскымон нылкышно, анай, песянай но ӵужанай: сиён-юон дасяны, юртъер котырын вырыны, нунокъёссэ утьыны, пересь анайзэ но эскерыны со вуэ. Арлы быдэ Семык дыръя, анаймы доры кадь со доры бертылӥськом. Казаньысь, Арчаысь, Ижкарысь, Владимирысь, Москваысь, Кировысь, Челныысь бертэм ӵыжы-выжыосмы бадӟым но узыр ӝӧк сьӧры люкасько, та коркан луэ пумиськон, вераськон, шумпотон. Тау тыныд со понна, Рита апаймы!

Ђоген Анайлэн нуналыз вуэ. Та праздник кемалась ке но ӧвӧл, туж кулэ но гажамон нунал! Вань кадь анайёсты ӟечкыласько та нуналэн: егит анайёслы — тазалык сӥзисько пичи нылпиоссэс утьыны, быдэ вуэм анайёслы — чидан но выль кужым пиналъёссэс улыны дышетыны, мӧйымем анайёслы — будэтэм нылпиоссылэсь ӟечсэ гинэ адӟыны мылкыд карисько!

Нина Андреева

Киров улос