«Анаймы — коркалэн шулдырез но шунытэз»

Екатерина Александровна Тагашурын 1932-тӥ арын, ноябрь толэзьын вордске. Али одӥг арня талэсь азьло гинэ Катьырнапайлы (матын но дуно карыса солы озьы вазиськисько) 86 арес тырмиз. Но аресэз шоры учкытэк, со дорысьтыз ужъёссэ но ачиз быдэсъя: сиёнзэ но ачиз пӧзьтэ, внукъёссэ но уте.

— Улэм потэ ук али, соин но выриськод ни, — шуэ Катяпай.

Улонын троссэ адӟем, ож пыр потэм нылкышнолэн сыӵе верам кылъёсызлы паймонэз но ӧвӧл, дыр: туала дыре улонын вань каньыллыкъёс кылдытэмын — улы но шумпоты гинэ.

Но со котьку озьы луымтэ ук. Кылсярысь, ож дыре но ож бере будэм нылпиослы пичи дырысенызы ик трос шуг-секытъёсты адӟыны-чиданы тупам. Ӵапак Катяпайлы но. 11 аресысен ик, война дыре, солы трос ужано луэм. Али но солэн син азяз кадь ньыль пыдын бакчаын жуг-жаг урыса ветлэмез. Соку нылпиосты ужтэк возьымтэзы, ужатӥллям но ужатӥллям шол.

1954-тӥ арын егит Екатерина ас гуртысьтыз ик пилы, Николайлы, картлы кошке. Николай но гуртаз ик колхозын шофёр луыса тыршем. Соос трос аръёс ӵоже ог-огзэс яратыса, валаса, гажаса уло. Но, жаляса верано, Катьырнапайлэн кузпалыз кӧня ке ар талэсь азьло та дуннеысь кошкиз. Кузь но шулдыр семья улонзы ӵоже соос 7 нылпи будэтӥзы: Татьянаез (1954-тӥ ар), Любовез (1957-тӥ ар), Борисэз (1960-тӥ ар), Анатолиез (1962-тӥ ар), Алевтинаез (1966-тӥ ар), Сергеез (1971-тӥ ар), Ларисаез (1975-тӥ ар). Туннэ нуналэ ини Екатерина Александровналэн 11 внукез но 7 правнукез вань.

— Нылпиосмы дӥськутлы но, сиёнлы но ёрмыса ӧз улэ. Ваньзэсты но умой будэтыны тыршимы. Ужамы, сюдӥмы, вордӥмы, дышетӥмы. Яра али Лидапай юрттӥз (Катьырнапайлэн бадӟым апаез, Лидия Александрова, 1924-тӥ арын вордскемын, туннэ нуналэ Ципьяын улэ — Н.Ж.), дӥсьёсты со сётэ вал, — шуэ песянай.

Сыӵе ик шуныт мылкыдъёс Лидапайзы но атайзы сярысь бадӟым нылзылэн, Татьяналэн но кылиллям. Солэн верамезъя, атайзы котьку ческыт макеос, дӥськутъёс басьтылэм. Пичи дырысь тодэ ваёнъёс уг вуно вылэм...

— Анаймы — коркалэн шулдырез но шунытэз. Сотэк улонмы бездыт луысал. Тазалык но кузь гумыр солы. Мукетыз ваньмыз луоз, соиз понна ми, солэн нылпиосыз, сюлмаськомы, — шуэ Катяпайлэн нылыз Татьяна.

Катьырнапайлэн нылпиосыз куспазы туж тупаса улӥллям, ог-огзылы юрттыса будӥллям. Ма, валамон но: мукет сямен ке луысал, анайзы сярысь но, ог-огзы сярысь но али но сыӵе сюлмаськыса ӧй улысалзы.

«Нылпиосмес ми ноку но наказать ӧм карылэ, котьку небыт кылын гинэ вераськимы», — шуэ Екатерина Александровна. — Табере соос асьсэос но монэным асьсэды озьы возё — ноку урод кыл уг верало, возьмало, утё».

Пенсие потытозяз но нылкышно гурт удысын тыршем — колхозын ыжъёсты, валъёсты, ветылъёсты сюдэм. Киын кӧжы, вика но турнано, нюлэс но кораса ветлоно луэм — огъя вераса, созэ но, тазэ но киын ужаны но тупам. Бамъёсаз кылдэм кисыриосыз аресэз сярысь гинэ уг верало, секыт улонэз адӟемез сярысь но мадё. 

Но озьы ке но, ортчем улонэз сярысь малпаськыса, ортчем аръёсыз шоры учкыса, Екатерина Александровна шумпотыса гинэ вера:

— Аслам улонэлы одӥг но уг ӝожтӥськиськы. Пӧртэмез вань вал — умоез но, уродэз но. Но озьы ке но, мон шудо адями. Сомында нылпиосме пыд йылазы султытыны быгатӥмы. Туала улонын улоно но улоно кадь — сиыны сиён вань, басьяськыны уксё вань. Ваньзы нылпиосы ӵош люкаськыса куное бертыло, монэ уг вунэто. Ма, бен, анаез кызьы вунэтод... Нылпиосы но, внукъёсы но огез но курласа, озьы карид но тазьы карид шуыса монэ ӧз вералэ, — шуэ шумпотыса вера песянай.

— Туннэ нуналэ мон шудо анай, вань нылпиосы син азям, внукъёсы но котырам, правнукъёсы но будо ни... Нош мар кулэ на мыным шумпотон понна.

Катяпайлэн кенэз, Галяпай, Сергей пиезлэн кышноез, сое уте, возьма, котьма ласянь юрттэ. Вераськыкумы но дораз вал, соин но кыкетӥ анаез сярысь солэсь но юай: «Туж йӧно песяймы милям, нылпиосмес но учке, милесьтым бадӟым семьямес огазеяса возе. 20 арлэсь тросгес ӵош улӥськомы ни, огпол но куара ӧм поттэ, ӧм даллаше».

Яратоно адямиос сыӵе матын карыса улӥзы ке, нокыӵе висёнъёслы но сётскыны уг яра. Али трос аръёс ӵоже шудо улыны, таза луыны, внукъёстэс но правнукъёстэс возьманы, соослэн улонзылы шумпотыса улыны мед кылдоз тӥледлы, Екатерина Александровна. Вуоно праздникен — Анайёслэн нуналэнызы!