Аръёс ортчыса но анае мӧзмытэ

Асьмелэн анаймы
Ачиз сютэм улыку, 
Кин асьмелы нянь сëтэ? 
Мурт курласа вераку, 
Асьме понна Кин бӧрдэ? 
Уйëссэ но изьытэк, 
Висьыкумы кин уте? 
Номыр шоры учкытэк, 
Вань сюлмыныз яратэ? 
Чебер ке но ум луиське, 
Мусо карса, эркия. 
Кур луонзэ вунэтыса, 
Лулзэ сëтэ, дуноя. 
Чик вератэк но тодмо ук
Талэн анай луэмез. 
М. Прокопьев

Анай! Кинэн бен тонэ сураны луоз? Тынад киосыд самой небытэсь! Тынад сюлмад яратонэд пыдэстэм! Тон гинэ шедьтӥськод мусоесь, дуноесь либатӥсь кылъëс аслад яратоно нылпиосыдлы но нуныкаосыдлы. Мар вань анайлэсь дуноез?! Маин нош ӵошатомы на Анаез? Котьмаин ӵошаты — ӧжыт луоз. 

Анай асьмелы улон сëтэ, сюлмаське, сюдэ-вордэ, утялтэ... Вераса быдтонтэм анайлэн ас нылпиосыз сярысь сюлмаськонъëсыз. Нош соос семьяын трос кузя ке? Валаны луэ анайлэсь сабырлыксэ, чиданлыксэ но котькуд нылпизэ яратыны быгатэмзэ. Мынам анае но огпол тазьы вераз: «Тӥ мынам сизьым кузя. Ӵукна султӥ ке, ваньды понна Инмарлэсь куриськисько — тазалык но шуд мед луоз ваньдылы шуыса». Та аресам вуыса но, анаелэн верам кылъëсыз пель сьӧрам кадь ик кылӥсько. 

Милемыз будэтыны секыт ке но луиз, анайлэсь ӝожтӥськемзэ ӧм кылэ ноку. Ачиз со куинь аресэн анаезлэсь кылем. Милям ӵужанаймы кулэм. Соин ми солэсь тусбуйзэ но ум тодӥське. Атаез анаймес куштыса кошкем. Сюранаен будэм со. Сюранайзэ но огпол но курласа ӧз вера анаймы. Паймоно кадь, кытысь тырмытэм со кужым, яратон? Одӥг нылпизэ но анаймы ӧз люкы. Ваньместы огкадь яратӥз. Гурт калык но вералляз анаймы ваньместы чылкыт дӥсятэ вал шуыса. Али но жаль потэ соиз: аслыз чебер дӥсь дӥсяны ӧз кылды. Быдэс улонзэ ми понна тыршиз. Колхозын кунян сюдӥз со пенсие потытозяз. Уждураз но сое ушъяло вал. Ушъян кагаз понна ӧз ужалэ соку. Вань кужымзэс, тодэмзэс поныса ужазы. Анайлэн тазьы верамез вань: «Милемлы разрядэз ӝутон понна визьсынан ортчытӥзы, пе, мон со юанъëссылы вераны быгатӥ. Эшшо ватсаса юанзылы но шонер верай». Анаймы сизьым классэз йылпумъяны быгатэм, «ньыльлы» но «витьлы» гинэ дышетскыса. Милемыз сюдон сярысь сюлмаськонэз анайлэн нырысетӥ интыын вал. Кыӵе ческыт нянь пыже вал со гурын! Чабей ӝукен но картофкаен дасям мильымез самой ческытэз вал дыр! Али но ымын кадь солэн дасям сиëнъëсыз. Инмар анаелы туж вакчи гумыр сëтӥз ке но, солэн тусбуез, верам кылъëсыз котьку милям сюлмамы улозы. Солэн нылпиосыз но внукъëсыз уз вунэтэ ноку яратоно анаймес! Музъемозь ик йыбырттыса, тау кылме верасько анаелы: милемлы улон сëтэмез понна, улонын шонер сюрес шедьтыны дышетэмез понна!

Екатерина Иванова, Вылын Ушма гурт

Туспуктэм семья архивысь