Арлыдоослы бадӟым кузьым но шумпотон

1 коньывуонэ Арлыдоослэн нуналзы пусйиськиз. Инкуазь но, аслэсьтыз шунытсэ, чебер сӥзьыл буёлъёссэ кузьмаса, арлыдоослы шудо шутэтскон нуналъёс сётӥз. Арлыдоосты сӥлы карыса, данъяса, котькуд шуымон гуртын нимысьтыз ужрадъёс ортчизы, «зарни» адямиосты праздник нуналазы ӟечкылазы но кулэ луэмзэс возьматӥзы.

Праздникез ортчытон дыр но юнме быръемын ӧвӧл, вылды. Адямиослэн верамзыя, пересьмон — со улонлэн сӥзьылэз. Соин ик арлыдоослы но нимысьтыз нунал пусъёно кариськизы — сӥзьыллэн самой зарни вакытаз. Праздниклэн валтӥсь ужпумез — дунне вылын улӥсь калыклэсь арлыдоослэн шуг-секытъёссылы нимысьтыз саклык висъян.

Ярак-Чурмаын но Гондыргуртын 1 коньывуонэ покчи школаысь но нылпи садысь дышетскисьёсын валче «Спешим дарить радость» ӟечкылан акци ортчытӥськиз: гуртысь пиналъёс арлыдоосты сяськаос кузьмаса шумпоттӥзы. Нош 3 коньывуонэ «Ладушки-ладушки бабушки и дедушки» шудон программа радъяськиз. Шудонъёс тунсыко луизы, песяй-бабйёслы кельшымонэсь. Бератаз люкаськем куноос удмурт, пор но бигер крезьгуръёс улсын эктӥзы. Пиналъёс озьы ик быгатэмлыкъёссэс возьматӥзы: кырӟазы, эктӥзы, ӟечкылан кылбуръёс лыдӟизы.