Арлыдоослы бадӟым кузьым но шумпотон (фото)

1 коньывуонэ Арлыдоослэн нуналзы пусйиськиз. Инкуазь но, аслэсьтыз шунытсэ, чебер сӥзьыл буёлъёссэ кузьмаса, арлыдоослы шудо шутэтскон нуналъёс сётӥз. Арлыдоосты сӥлы карыса, данъяса, котькуд шуымон гуртын нимысьтыз ужрадъёс ортчизы, «зарни» адямиосты праздник нуналазы ӟечкылазы но кулэ луэмзэс возьматӥзы.

Праздникез ортчытон дыр но юнме быръемын ӧвӧл, вылды. Адямиослэн верамзыя, пересьмон — со улонлэн сӥзьылэз. Соин ик арлыдоослы но нимысьтыз нунал пусъёно кариськизы — сӥзьыллэн самой зарни вакытаз. Праздниклэн валтӥсь ужпумез — дунне вылын улӥсь калыклэсь арлыдоослэн шуг-секытъёссылы нимысьтыз саклык висъян.

Сырья гуртысь арлыдоос но 3 коньывуонэ люкаськизы лулчеберетъя юртазы. Туж тунсыко луиз нылпи школа-садысь дышетскисьёслэн ӟечкыланъёссы но песяен внучкаослэн шудэмъёссы. Шуныт кылъёссэс вераны гурт поселенилэн но возёслэн кивалтӥсьёсыз вуизы. Огъя 40 пала адями люкаськиз. Гуртысь клубен кивалтӥсьлэн, Леонид Сапожниковлэн верамезъя, клубын тамында калык кемалась ӧз ни люкаськы вал. Арысен аре котькуд праздник аслэсьтыз тунсыко луэмзэ будэтэ, азьланяз арлыдоос мылысь-кыдысь котькуд ужрадъёсы пыриськозы шуыса бадӟымесь осконъёс вань.

«Борнак» возёслэн юрттэменыз Карек-Серма гуртын но котьку сямен ик арлыдоос понна узыр ӝӧк сьӧрын чай юон ортчытӥзы, Турьяын но мӧйыос понна шулдыр пумиськон ортчиз, чай юонэн, шудонъёсын но мызган гуръёс улсын.

Вукогуртын мӧйыос понна ужрад таяз шутэтскон нуналъёсы ортчытыны малпаллям — 8 коньывуонэ. Луонлыкъёссы пумозяз быдэсмизы ке, одно ик туж тунсыко но аспӧртэмлыко праздник ортчоз шуыса оскиськом.

Покчи Лӧзяын валтӥсь ужрад 9 коньывуонэ ортчытӥськоз шуыса ивортӥз гуртысь лулчеберетъя юртысь устолыкъя кивалтӥсь Галина Петрова.

Арлыдоос — будӥсь поколение понна пумтэм визьлюк. Соос, секыт вакытэ будэмъёс, троссэ адӟемъёс, улонлэн котькуд нуналэзлы шумпотыса уло. Каньыл улон сяна, соослы номыр кулэ ӧвӧл ини. Семьяязы шуныт кусыпъёс луизы ке, улонзы но трослы шундыяське, соин арлыдоосын вераськонъёсты палэнэ кельтоно ӧвӧл, кӧня ке вераськонэн ужед уз ӝега, нош песяй-бабайлэн мылкыдзы ӝутӥськоз. Та трослы пайдаё луоз!