Аслам семьяе ӧз ке но луы, гумырме шудо ортчытӥсько

Гондыргуртысь тылысь но ужысь ветеран Александра Алексеевна Ефремова 2-тӥ пӧсьтолэзе пусйиз аслэсьтыз 90 аресъем юбилейзэ. Сӥлы карыса, юбиляр песянай доры куное вуизы Балтась ёрослэн главаез Рамиль Нутфуллин, ёросысь социальной дурбасьтонъя ёзэтлэн кивалтӥсез Алсу Гатиятуллина. Россилэн Президентэзлэн ӟечкылан открыткаезлы но Балтась ёрослэн главаезлэн Таукарон гожтэтэзлы Александра Алексеевна пумтэм шумпотӥз, аслаз улон но ужан сюресэз сярысь лыктэм куноослы мадиз.

Арлыдоос сярысь вераськон ке потэ, соослы тужгес секыт ож вакытэ улонзы сярысь вераны, ваньзылэн огкадь шуген ортчем пинал дырзэс тодазы вайыса мылкыдзы бугырске.

Гондыргуртысь Ефремовъёслэн семьяязы вордӥськизы 5 нылпиоссы: Марфа (1931), Александра (1933), Анатолий (1936), Ольга (1938), Александр (1942). Александра Алексеевна вордӥськиз гужемлэн самой емышо но пӧсь вакытаз – пӧсьтолэзе. Бадӟым семьяын туж шудо улӥзы, сюлмысь ог-огзэс яратыса, утьыса. Доразы скал, ыжъёс, курегъёс, ӟазегъёс вордӥзы. Пӧртэм ужъёсты дэмен лэсьтылӥзы, озьы ик малпаськизы азьланез сярысь но… Шимес дыръёс вуизы 1941-тӥ аръёсы: атайзэс, Алексей Андреевичез, фронтэ басьтӥзы, улонлэн ческыт палыз пыраклы курыт шӧм кельтӥз. Ожлэн кышкыт вылтусэз копак семьялэсь рос-прос улонзэ сӧриз. Семьяязы атайзы туж бадӟым инты басьтӥз, соин ик солэн кошкемез туж юн ассэ шӧдытӥз: ужъёс йылӥзы, пудо вордыны кужымзы ӧжыт луиз. Атайзы кошкемен, быдэс уж кылиз нылпиос вылэ: корка ӝутон куспетӥ луэм бере, семьяысь нылпиослы ас кужыменызы корказэс пумаз-йылаз вуттыны тупаз. 1943-тӥ арын атайзы ивортэк ыше… «Тодӥсько на: кыкетӥ классын дышетскыкум, атайлы гожтэт гожтӥ, соку со пумитам гожтэт лэзиз, ма тон гожтэт гожтыны но быгатӥськод ни-а ма, шуыса», – синкылиосыз потымон вера Александра Алексеевна. Войналэн бервылъёсыз весяклы пиналъёслэн тодазы кышкыт даурен кылизы, соослэн сюлэмъёсазы быронтэм пытьы кельтӥз вазь ик атайтэк кылён.

Александралэн котьку тодон-валан борды кыстӥськемез адӟиськиз. 4 классэ со асьсэ гуртазы ик, Гондыргуртын, дышетскиз, собере 7 классэ Покчи Лӧзя гуртын йылпумъяз. Дышетскон сяна, пичиысен ик Александра анаезлы юрттӥськиз, покчи сузэрез но выныз понна зэмос пыкет луиз. Дышетскон мылкыдэз вуттӥз сое Малмыж ёросысь Савали дышетсконние. Жаляса верано, со дыръёсы Киров улосвылысь гинэ егитъёсты дышетскыны басьтӥллям. Сюлмыз таин соглаш луымтэ, бускель эшеныз кошкиллям Арчае. Дышетскыны пырон понна экзамен сётоно луиллям, но баллъёссы тырмымтэен, нылъёс берытскыса гуртазы ик бертӥллям. Александра Алексеевна ӝожтӥськыса уг вера, ваньмыз пыр потыны Инмар кужым, визь но чиданлык сётӥз, шуэ, соизлы шумпотыны кулэ.

Ужан сюресэз Александра Алексеевналэн туж узыр. Котькытчы вуттӥськемезлы паймод! Гуртысь колхозаз пӧртэм ужъёсты лэсьтэм, собере 1969-тӥ арын «Стахановец» артеле ужаны пыре: толалтэ – цехын, гужемзэ – нюлэс коранын, бун кесянын. Нюлэс коран уж кытчы гинэ вуттымтэ: Чапшар, Княбаш, Кукмор ёросысь Пчеловод гуртэ, Удмуртиысь Кизнер ёросэ но, пӧртэм мукет интыосы но. Ужан дыръёсыз вутто нылкышноез Карадуванысь цехе но. Пенсие потытозяз ужа Балтасьысь меховой фабрикаын, татысен ик сое лэзё юрттӥськыны Улын Ушма гуртысь кирпич поттон заводэ. Котькуд нунал пыдын трос иськемъёс ортчылӥз, дораз бертэм бераз но ужез бырымтэ на. Секыт ужъёсын ужаса но, висьытэк, эмкагазтэк (больничнойтэк) ортчытэм. Вань ужан сюресэз ӵоже котькинлы юрттӥськемез, дыраз вань ужзэ лэсьтэмез понна, кивалтӥсьсы, дано карыса, пенсие лэзем: сьӧраз трос кузьымъёсын, шуныт кылъёсын. Али ке но со дырзэ шуныт мылкыдъёсын гинэ тодаз вае.

Паймымон, уж сяна мукет пӧртэм ужрадъёсы но пыриськыны вутскиллям. Бускель гуртъёсы куное но вуылӥллям, эшъёсынызы шулдыръяськонъёсы ветлӥллям. Одӥгез самой шулдырез – Семык возь вылын шулдыръяськон. Та вакыт дыръя котькуд гуртлэн аслаз сям-йылолъёссы луиллям. Вань егитъёс огазе люкаськыса эктӥллям, пӧртэм кырӟанъёсты кырӟаллям. Возь вылын ик пӧртэм шудонъёсын шудӥллям, туж шулдыр вакыт луэм со егитъёс понна.

Туннэ нуналэ анай-атайзылэн пуктэм корказы соос куинь кузя уло: Александра Алексеевна, солэн сузэрез – Ольга Алексеевна но вынзы – Александр Алексеевич. Куинь арлыдоос, адӟем карымон семья кусыпъёсты утьыса уло, котькуд учыре ог-огзэс валаса, гажаса но кылзӥськыса. «Кыӵе учыр гинэ уг луы семьяын, ми эшшо ке котьку ӵошен улӥськом, дыраз вазьытэк но кылёно, куд-ог кыл но верано луиськод», – шуэ Александра Алексеевна. Туж данъяськымон луэ: сыӵе сӥё-дано арлыдэ вуыса но, шутэтскон уг на тодо соос: юртъер котыразы утялско, бакчаязы пӧртэм емышъёс, бакча сиёнъёс будэто, картофка но мерттэмын, курегъёссы но вань. «Гуртын улӥсь адямилы одно ик маин ке вырыны кулэ. Куное бертэм ӵыжы-выжыосыз маин ке куно карем потэ ук, соос но сьӧразы трос сиён-юонъёс ваё», – ватсаса вера Александра Алексеевна.

Жаляса верано, аслыз семья кылдытыны ӧз пӧрмы кышномуртлы, пиналъёсты вордыны Инмар ӧз сёты. Нылкышно шудбурзэ воштӥз ӵыжы-выжыосыз, матысь адямиосыз сярысь сюлмаськонэн, соослэсь нылпиоссэс утёнэн.

Александра Алексеевна вера: «Пинал но егит дыръёсы туж секытэн ортчизы. Ож трос кужыммес басьтӥз, яратоно адямиосмес. Трос пыдын ветлэмен, турын-куар сиыса (тужгес ик анис турын вал), сыӵе кузь гумыр улӥсько, дыр. Туала дыре пыдын трос уг ветло ни, соин ик трос висёнъёссы. Быдэс улон даурме вераса быдтонтэм. Дорамы ёросысь юрттӥськись (социальной ужась — ред.) арняяз кык пол ветлэ: коркамес утялтэ, ву нуллэ, али тани бакчаын уриськыны но юрттэ. Туж умой улӥськом, государство арлыдоос сярысь юн сюлмаське, юрттэт сётэ, пенсия ӧжыт ке но, улыны тырме. Али ӝӧк вылын ваньмыз вань ини, си вал, уг ни лу...»

Сузэрез, Ольга Алексеевна ватса на: «Ми понна со (Александра Алексеевна – ред.) анай но, атай но луиз. Вань ужъёсты валче ужамы. Егит дыръя химикатъёсын агуласьки, апай кӧня пол Казане нуллӥз, соин гинэ улэп кылемын ни. Тау кариськом солы ваньмыз понна, коркамес но ачиз ветлыса гинэ пумаз-йылаз вуттыны луиз, сюлмаськиз ми понна, милемыз утён понна кужымзэ чик но ӧз жаля. Валтӥсь ужысьтыз бертыса, уйёсы колхозэ юрттӥськыны ветлӥз на. Жадемзэ ноку но ӧз возьматы».

Вордскем нуналзэ Александра Алексеевна семья пӧлаз пумитаз. Юбилееныз ӟечкыласа, доразы вуизы племянникъёсыз но соослэн нылпиоссы. Шумпотыса вера: «Аслам семьяе ӧз ке но лу, гумырме шудо ортчытӥсько».

Секыт дыръёсты ортчытэм песянайлы, ужысь сӥё-дано но тылысь ветеранлы, тыршись но шуныт сюлэмо нылкышнолы, яратӥсь апайлы сӥзисько юн тазалык. Инмарен сётэм аръёссэ шудо ортчытыны мед кылдоз, котыраз матысь адямиосыныз, бускельёсыныз валаса, гажаса улыны. Котькуд нуналэз пальышась но шумпотӥсь ымнырын пумитаны мед кылдоз!

Юлия Щербакова

Фото: А. Гатиятуллина