Атайлэн нуналэз азьын ми адӟем карымон воргорон доры куное вуылӥм, кудӥзлы семья — со огшоры кыл гинэ ӧвӧл, со быдэс улонлэн пуштросэз. Героймы – Ципья черкогуртысь Степанов Леонид Васильевич, трос нылпиё атай, историез утись но огшоры бадӟым сюлэмо адями.
Музъемен герӟаськем выжыос
Котькуд адямилэн улон сюресэз пичи шаерысеныз кутске. Леонид вордске 1984-тӥ арын 3-тӥ толсуре чебер Янгурчи гуртын. Но улон озьы радъя: куинь арес дыръяз ини семьяез Ципьяе улыны выже, кудӥз солы бератаз вордскем гурт интыын луэ.
Будэмын со яратонэз шӧдыса но ужез гажаса. Атаез, Василий, вань улытозяз руль бергатэм — «Агрохими»-ын водитель луыса ужам. Анаез, Надежда, вуриськись луыса тыршем. Анай-атаез нотациосты ӧз лыдӟе, соос огшоры но сюлэмзыя улӥзы, нылпиоссылы – Леонидлы но солэн Елена апаезлы – пример возьматӥзы.
Ӵапак со аръёсы, песятаезлы нюкъёсысь пичи уробоен турын нуллыны юрттыса, пияш улонлэсь валтӥсь уроксэ валаз: уж – котьмалэн инъетэз, нош семья – со соос, кин котьку вӧзад.
Бадӟым улонэ сюрес
Школа бере Леонид Атняысь гурт возёс техникумез йылпумъя, техник-механиклэсь ӧнерзэ басьтэ. Профессиез кортэн но механизмъёсын ужанэз кулэ каре вал кадь, но улон ваньзэ ас сяменыз радъя: вуттэ сое отчы, кытын утиське калыклэн лулыз. 12 ар ӵоже ини со тырше Ципьяысь «Калыкъёслэн эшъяськонзы» музейын.
– Коллективмы эшлыко, – пальпотэ Леонид. – Уж тунсыко, угось ми вуоно поколениослы историмес утиськом.
Но героймылэн валтӥсь узырлыкез – со солэн семьяез, матысьёсыз. 2010-тӥ арын Леонид кышнояське яратоно Оксанаеныз. Со дырысен соослэн корказы чалмытэз уг тоды.
Ньыль сюлэм артэ
Степановъёслэн семьяязы ньыль нылпи будэ: Владислав, Евгений, Константин пиоссы но муспотон Надежда нылзы. Ньыль нылпиез будэтон – капчи ужпум ӧвӧл, Но Леонид понна со тужгес бадӟым шуд. Нырысетӥ пизы 2011-тӥ арын вордске, со дырысен семьялэн улонэз чутрак воштӥське.
– Нылпи вордӥськемен валче туж бадӟым кылкутон кылдэ, – малпаське атай мурт. – Но таин валче лыктэ пумтэм шумпотон но, кузпалыдлы но Инмарлы таукарон но.
Леонидлэн кузпалыз Оксана Петровна – дышетӥсь. Со Ципья шоръёзо школаын покчи классъёсты дышетэ. Туэ солэн – нырысетӥ классын дышетскись пиналъёс, кудъёсыз нимысьтыз бадӟым саклык висъямез кулэ каро.
Уж шоры учкытэк, кузпалъёс ваньмон дырзэс котьку ӵошен ортчытыны тыршо: чорыганы, губияны мыныны, яке огшоры инкуазе потаны.
Ужез яратыны дышетоно
Леонидлэн но Оксаналэн семьязы — тросэзлы пример. Татын нокин тэк уг пукы. Котькудӥзлэн аслаз ужез, со кужмысь уж ӧвӧл, со улонлэн школаез.
– Бадӟым пиос мыным муш вордыны юртто, – данъяськыса вера Леонид. – Покчиосыз со вакытэ анайзылы бакчаын юртто. Нош толлы турын дасян – со огъя семья ужмы, сое ваньмы ӵош ужаськом.
Степановъёс юн оско: нылпиосты ужаны дышетоно пичи дырысенызы ик. Пичи дырзэ тодаз вайыса, Леонид вала: ӵапак атаезлэн но песятаезлэн примерзы со понна сюрес возьматӥсь кизили луиз. Та эстафетаез солэн нылпиосызлы сётэмез потэ: дышетыны соосты ужзэс яратыны, бадӟымъёсты гажаны но ог-огзылы юрттыны.
«Вань улонэ – нылпиосы»
– Улытозям син азям пуктыны ӧй быгаты, трос нылпиё атай луо шуыса, – мылкыдзэ усьтэ героймы. – Мон понна огзэ мукетызлэсь золгес яратон ӧвӧл. Мон понна соос ваньзы огкадесь. Вань улонэ – со мынам нылпиосы. Мон соос понна кылкутӥсько
Леонид соос понна туж тырше адӟем карымон луыны. Со тодаз возе, кызьы пичи дыръяз ачиз атаез но песятаез шоры учкылӥз, но вала, али озьы ик со шоры ньыль пар нылпи синъёс учко шуыса.
– Нылпиосы, семьяе шудо ке, – мон но шудо, – шуэ со огшоры но сюлмысь.
Яратон огазея
Леонидлэн но Оксаналэн семьязы – со адӟем карымон пример, кызьы яратон, уж но ог-огдэ гажан ваньзэсты огазея, шунтэ. Соослэн семьязы – ачиз шудбур, кытын котькуд пинал яратонэн но сюлмаськонэн котыртэмын, нош анай-атайёс ог-огзылы кулэ луэмзэс шӧдыса уло. Атайлэн нуналаз Леонид Васильевичлы но ёросысьтымы вань атайёслы кужым, чидан но нылпиосынызы данъяськон мылкыд сӥзем потэ. Угось атай луон – со Инмарен но сюлмын сётэм призвание.
Нет комментариев