Азинтӥсь (Ӟаны школалы сӥзем статьялэн азинтонэз)

Ципья школалэсь 7 классэ быдтэмез бере, Арскысь педагогической училищее дышетскыны мынэ. 1940 арын училищеез йылпумъямез бере, Кургемысь начальной школаын дышетыны кутске. Уно гинэ пиосмурт дышетӥсьёслы сямен ик, Григорий Семёновичлы но яратоно ужзэ вис карытэк азинтыны уг кылды. 1942 арын май толэзе жугиськонэ кошке. Ленинградской фронтын ожмаськыкуз уно гинэ боевой операциосы пыриське, нош 1945 арын пыдыз сӧсырме. Со арын ик вордскем Кургем гуртаз бертэ, 1946 арысен Кургемысь начальной школаын ужа. 1954 арын Ӟаны сизьым аръем школалы директоре тодмояло. Та ужзэ 1958 арозь азинтэ. Татын ужан аръёсы ик Ижевскысь педагогической институтэз быдтэ. Кӧня ке ар Кургемысь школаын ужамез бере, 1963 арысен 1977 арозь Ципья шоръёзо школаын историез дышетэ, директорлэн воспитательной ужъёсъя воштӥсез луыса ужа. Кулэ 1977 арын май толэзе.

Кышноезлэн Фёкла Владимировналэн тодэ ваёнъёсысьтыз:

— Мон ачим Ӟаны школаын Григорий Семёнович директор луытозь но ужай. Отын дышетэм но дышетскем адямиосты туннэ но ӟеч тодӥсько.Соиз вунонтэм, Ӟаны, Кисаль, Кутэш, Починка гуртъёсысь калык дышетӥсьёсты туж матын каре вал, асьсэос туж секытэн улӥзы ке но, котьку юрттыны дась вал. Асьтэос малпалэ ини, радлы улон интымы но луымтэ, куинь пичи пиналъёсын семьялы дят гуртын кызьы улоно. Гурт калык ӧй ке юрттысал, милемлы туж секыт луысал, дыр. Сюлмысен тау та гуртъёсысь калыклы! Милемлы но секыт условиосын ужаны тупаз. Школамы вуж вал, классъёс но уг тырмо, классъёсысь гуръёсты эстон понна пу дасян но дышетӥсьёс, пиналъёс вылын. Озьы но коллектив мылкыдзэ ӧз куашкаты, яратоно ужмылы вань мылкыдмес сётыса ужамы. Туннэ но уг вуны 19 маез — Пионерилэсь нуналзэ шулдыр карыса ортчытъяммы. Кушкет возь вылэ васькыса, Кушкетысь дышетӥсьёсын ӵош праздник кариськомы вал, шулдыръяськиськом, чорыг лым сииськом, вань сюлмаськонъёс вуно кадь.

Григорий Семёнович Халтурин Ӟаныын олома кема ӧз ке но ужа, та гуртлы туж матын адями луиз. Педагогической коллективен кивалтон но дышетон процессэз радъян ачиз туж секыт уж луиз ке но, партилэн членэз луэмысь, уно гинэ общественной ужъёс но со вылын вал. Колхозысь партийной организациен кивалтӥз, гурт калык пӧлын агитмассовой ужъёсты туж быгатыса радъяз. Мур малпаськыны быгатӥсь, ялан выленыз тодматскыса улӥсь, дышетон ужез пыр-поч тодӥсь директорен ужаны педагогической коллективлы но капчи вал.

Вера Федотовна Захаровалэн тодэ ваёнъёсысьтыз:

— Семён Иванович но Григорий Семёнович характерзыя чылкак пӧртэм адямиос вал. Григорий Семёнович дышетӥсьёслы чурытэсь куронъёс но пуктыны быгатэ вал. Мазэ ватонэз, сыӵе директорлэсь дышетӥсьёс ӧжытак кышкасагес но ужазы. Нош урокысь яке школаысь потэм бере солэн мылкыдыз чылкак воштӥськылӥз, каньылэн вераськоз, валэктоз. Праздникъёс дыръя боз-боз куараен удмурт кырӟанъёсты кырӟаны яратылӥз.

Ачиз директор, кышноез усто дышетӥсь луиз ке но, Григорий Семёнович улонын туж огшоры адями вал. Улӥзы соос школаысь туж пичи комнатаын, тетрадьёсты эскерон, ӵуказе нуналлы дасяськон, изён, пиналъёслы шудон инты но та комнатаын вал. Мыным, та чуръёсты гожтӥсьлы, та комнатаын уно пол луылыны, школалэн директорезлэн кык пиосыныз шудылыны тупаз. Ма, Григорий Семёнович дораз изьыны гинэ бертылэ вал, уно дырзэ школаын но колхозын ортчытылӥз.

Григорий Семёнович но улонысь туж вазь кошкиз. Кӧня шуг-секытъёсты чидаса пиналъёслы тодон-валан но воспитание сётӥз, бадӟымесь общественной ужъёсы пыриськиз, пиналъёссэ пыд йылазы султытӥз. Соиз жалямон, каньыл улонэн улыны, дано шутэтсконэ потыса, мукет мӧйы адямиос сямен улыны ӧз кылды. Туннэ солэн кузпалэзлэн Фёкла Владимировналэн шумпотонэз — соослэн нылпиоссы но внукъёссы. Пиоссы Игорь, Славик но нылзы Тамара анай-атайзылэсь ӧнерзэс бырйизы. Игорь Удмурт университетлэсь художествоя факультетсэ йылпумъяз. Тамара — Ципья шоръёзо школаын химиез но биологиез дышетӥз (жаляса верано, туннэ нуналэ улэп ӧвӧл ни- ред.). Славик — гуртысьтызы начальной школаын ужаз. Почки нылзы Наташа Казаньысь химико-технологической институтэз быдтӥз, Ульяновскысь заводъёслэн одӥгаз ужаз.

Фёкла Владимировна Халтурина туннэ Славик пиеныз но Наташа нылыныз Кургем гуртын улэ.

Александр Кунаев.

(«Азьлане» газетлэн архивысьтыз)

Редакцилэсь: Гажано лыдӟисьёс, та статья «Азьлане» газетын печатласькем 12 июне 1999 арын, 20 ар талэсь азьло. Валамон, сомында ар куспын со дыре шонер луэм куд-ог фактъёс тросэз воштӥськемын. Соин но тае лыдэ басьтыса, статья интыен-интыен редактировать каремын.